Danieli

6 Dalyusi wapingwilepo ukusonta intunguluzi zya mu vitungu izili 120 umu wene onsi. 2 Wasonsile aomvi yatatu aakuti yazyangalila apaali na Danieli; nupya intunguluzi zizyo zyali nu kulayanena vyonsi ivikucitika pakuti ivyuma vya mwene vitononeka. 3 Lyene Danieli walolike ukuti wali umupusaneko uku yaomvi yauze nu ku ntunguluzi, pano wakweti sana umupasi, nupya umwene walondanga ukumupeela icifulo ca papela umu wene onsi.

4 Lyene aangalilanga intunguluzi ni ntunguluzi kwene zizyo yatandike ukulonda pa kupeelela Danieli umulandu kulozya uku milandu ya mu wene, lelo yataazanyile icili consi cino yangamupeelelapo umulandu nanti icili consi iciipe, pano wali umutailwe, ataali nu mulekelezya nupya wali ni cisinka. 5 Aonsi yaa yalanzile iyati: “Tutalatala tuzane icili consi muli Danieli wi ica kumupeelelapo umulandu, suka nga twalonda icikumile masunde yakwe Leza wakwe.”

6 Fwandi aangalilanga intunguluzi kumwi ni ntunguluzi kwene yailile pamwi uku mwene nu kuyamunena iyati: “We Mwene Dalyusi uye nu umi amanda pe. 7 Aomvi yonsi akwi sano, angalizi, ntunguluzi zya mu vitungu, impandamano na alasi iyazumilizyanya ukuti yakunene we mwene ukuti uwikeko isunde lyakuti pa manda 30 aali wensi uwapepa kuli leza muze nanti uku muntu ukucila kuli wewe, alinzile ukusumbilwa umu ciwina cakwe ya cisama. 8 Fwandi we mwene, ikako isunde nu kusainapo, pakuti litaca lisenulwe wakwe vino caya uku masunde ya Ina Medya na Ina Pesya aasisenulwa.”

9 Fwandi Umwene Dalyusi wisileko isunde nu kusainapo.

10 Lino Danieli uvwile sile ukuti isunde ilipangwa nu mwene watasaina, waile uku ng’anda yakwe iyakweti umuputule wa papela uwakweti mawindo aalozizye uku Yelusalemu. Nupya cila wanda apa miku itatu wafukamanga nu kupepa nu kulumbanya Leza wakwe, wakwe vino wacitanga amanda yonsi. 11 Lilyo kwene aonsi yaaya yaile iingila uku maka umu ng’anda yakwe Danieli nu kumuzana akupepa nu kupaapata kuti Leza wakwe aye ni cikuuku kuli aliwe.

12 Fwandi yaile uku mwene nu kuyamwiusyapo pali vino walanzile iyati: “Mwene uzye utisileko isunde nu kusainapo ukuti pa manda 30 aali wensi uwapepa kuli leza muze nanti uku muntu kucila kuli wewe alinzile ukusumbilwa umu ciwina cakwe ya cisama?” Umwene waswike ati: “Isunde lilyo i limanyikwe nupya litanga lisenulwe wakwe vino caya uku masunde ya Ina Medya na Ina Pesya aasisenulwa.” 13 Lilyo kwene sile yanenyile umwene iyati: “Danieli, wenga pa yazya ya ku Yuda ataakucindika we mwene nanti ukucindika isunde lino wikako, lelo akupepa imiku itatu pa wanda.” 14 Lino mwene uvwile vivyo uvwile sana ulanda, nupya wezizye ukwelenganya pa nzila zino angapususizyamo Danieli; wezizye ukulola inzila zino angamupususizyamo mpaka ilanzi iliwa. 15 Aonsi yayo yaswilile uku mwene nupya nu kuyamunena iyati: “Mwene iusya ukuti kutaya isunde lya Ina Medya na Ina Pesya lino umwene wasainapo ilingasenulwa.”

16 Lyene umwene wayanenyile ukuti yakalete Danieli nu kumusumbila umu ciwina cakwe ya cisama. Nupya wanenyile Danieli ati: “Leza wako wino ukaombela lyonsi amakupususya.” 17 Lyene yaleesile iwe nu kuliika pa mulyango wa ciwina, nu mwene wafwatike ni mbalaminwe yakwe iya kufwatikilako ni mbalaminwe ya yantu yakwe aacindikwe, pakuti kutaya nanti acimwi ca kusenula ivyapingwilwe pali Danieli.

18 Lyene umwene waswilile ukwi sano. Wakanyile ukulya usiku onsi, wakanyile ukuvwa uku vili vyonsi ivya kumuzanzya nupya ataaizi. 19 Katondotondo lino kwaswepa sile umwene wakatwike nu kuya uku ciwina cakwe ya cisama. 20 Lino wapalamile uku ciwina, wamile Danieli umwi zwi lya ulanda. Wamuzizye ati: “Danieli, we muomvi wakwe Leza wa umi, uzye Leza wako wino ukaombela lyonsi watakupususya kuli ya cisama?” 21 Lilyo kwene sile Danieli waswike umwene ati: “Mwene, uye nu umi amanda pe. 22 Leza wane wali watuma malaika wakwe nawe wali wayala utunwa twakwe ya cisama, nayo yatancisile pano nene wa kaele kuli aliwe; nupya ntacita icili consi iciipe kuli wewe, mwene.”

23 Mwene watemilwe sana, nupya walanzile ukuti yafumye Danieli umu ciwina. Lino yamufumizye yazanyile ukuti atacisike apali ponsi pano wataile Leza wakwe.

24 Lyene umwene walanzile ukuti yalete aonsi apeezile Danieli umulandu nupya yayaleesile nu kuyasumbila umu ciwina cakwe ya cisama kumwi na ana yao na aci. Lino yatatala yafika na pansi ya ciwina, ya cisama yayansile nu kuvungola mafupa yao yonsi.

25 Lyene Umwene Dalyusi walembiile antu yonsi, inko, ni mitundu ya mu nsi yonsi ati: “Muye sana nu mutende! 26 Nkwikako isunde lyakuti umu wene wane onsi antu yonsi yalinzile yaopa sana Leza wakwe Danieli pano wene a Leza wa umi nupya wayako amanda pe. Uwene wakwe utalatala wononwe na ukateeka wakwe u wa manda pe. 27 Akapokolola, kupususya, nu kucita ivimanyililo ni vizungusyo umwi yulu na pano nsi, pano watapususya Danieli kuti atakomwa na ya cisama.”

28 Fwandi vintu vyazipilanga Danieli umu wene wakwe Dalyusi nu mu wene wakwe Sailasi Umwina Pesya.