2 Milandu

9 Lyene namwene wa ku Syeba uvwile pali Solomoni, fwandi waile uku Yelusalemu uku kumuzya mauzyo akome pakuti amwezye. Wali na aomvi yakwe aingi sana ni ngamila izyasenzile mafuta yakwe basamu na goldi umwingi na mawe ya mutengo. Lyene waile kuli Solomoni nu kumunena vyonsi ivyali uku mwenzo wakwe. 2 Solomoni wamwaswike mauzyo yonsi, kutaali iuzyo ilikome lino wafizilwe ukwasuka.

3 Lino namwene wa ku Syeba waweni mano yonsi yakwe Solomoni, ing’anda ino wakuuzile, 4 vyakulya vino walyanga, pano aomvi yakwe ikalanga, mulimo uno aamupekanyizizyanga ivyakulya yaombanga na vino yazwalanga, aamupeelanga waini ni vyakuzwala vyao, na malambo ya koca yano wapeelanga lyonsi pa ng’anda yakwe Yeova, camupezizye mano. 5 Fwandi wanenyile umwene ati: “Ilyasi lino nuvwile umu mpanga yane pali vino wacita na pa mano yako i lya cumi. 6 Lelo ntaataile vino nuvwile kufikila niza nailolela nemwineco. Vino yanenyile pa mano yano wakwata vitaafisile nanti apakasi. Wacila pali vino nuvwile. 7 Ansansa aaonsi yako na aomvi yako aakaya naawe lyonsi nu kukutika uku mano yako! 8 Si Yeova Leza wako alumbanyiziwe uwaweni visuma muli wewe pa ku kwika pa cilimba cakwe ica wene kuti uye umwene wino Yeova Leza wako wasoolola. Pa mulandu wakuti Leza wako watemwa Aina Izlaeli nupya akalonda yatwalilile ukuyako amanda pe, wakusonsile ukuya umwene wao pakuti uwapingula umu mulinganya nu mu ulungami.”

9 Lyene wapeezile umwene matalanti* 120 yakwe goldi na mafuta yakwe basamu na mawe ya mutengo. Mafuta yakwe basamu yano namwene wa ku Syeba wapeezile Umwene Solomoni yaali aingi sana ukucila mafuta yonsi yano yapeelanga umwene.

10 Nupya aomvi yakwe Hilamu na aomvi yakwe Solomoni aleesile goldi ukufuma uku Ofili yaleesile ni mbao zya miti ya aligamu na mawe ya mutengo. 11 Lyene umwene wapanzile masitepu uku ng’anda yakwe Yeova ni sano lyakwe ukuomvya imbao zya muti wa aligamu, wapanzile na mazeeze na ya banjo yakwe ya kiimba. Kusi uwatazile alola ivintu ivisuma wakwe vii umu mpanga ya Yuda.

12 Umwene Solomoni nawe wapeezile namwene wa ku Syeba vyonsi vino walondanga na vino walenzile, wamupeezile ukucila na pali vino wamuletiile. Pa cisila waswilile uku mpanga yakwe pamwi na aomvi yakwe.

13 Nupya goldi wino yatwalanga kuli Solomoni umu mwaka wafikanga matalanti 666, 14 kufumyako uwafumanga uku yaculuzi na wino ya mwene ya ku Alabya ni ntunguluzi zya mu mpanga zyamuletelanga.

15 Umwene Solomoni wapanzile ivisyangu ivikalamba 200 vyakwe goldi umuiyele (cila cisyangu cakwatanga masyekele* 600 yakwe goldi), 16 wapanzile ni visyangu ivinono 300 ukuomvya goldi umuiyele (cila cisyangu cakwatanga goldi iingafina makilogilamu 1.7). Umwene wavisile umu ng’anda iyamwanga ukuti Umutengo wa Lebanoni.

17 Nupya umwene wapanzile icilimba ca wene ukuomvya amino ya nzovu nu kwikako goldi umwengululwe ningo. 18 Cilimba cakweti masitepu 6 na ka kulyatapo kakwe goldi, cakweti na pa kwika makasa mu mbali zyoili na ya cisama yaili aimilile umu mbali. 19 Kwali na ya cisama 12 aimilile pa masitepu 6, cila cisama waimi pa mpela yi sitepu. Kutaali uwene na uze uwapanzile icilimba wakwe cii. 20 Viya vyonsi vya kumwelamo Umwene Solomoni vyali ivyakwe goldi, nupya iviya vyonsi ivya mu ng’anda ya Mutengo wa Lebanoni vyali ivyakwe goldi umwengululwe ningo. Kutaali icapangiilwe na siuva, pano siuva yamulolanga ukuti uwa sile sile umu manda yakwe Solomoni. 21 Mawato ya mwene yayanga uku Tasyisyi pamwi na aomvi yakwe Hilamu. Muku onga nga papita imyaka itatu, mawato ya ku Tasyisyi yamutwalilanga goldi na siuva, mino ya nzovu, ya kolwe, ni vyunyi vino yakaama ukuti pikoko.

22 Fwandi Umwene Solomoni wakweti ivyuma na mano aingi ukucila ya mwene yonsi asyala aali umu nsi. 23 Nupya ya mwene ya mu nsi yonsi yayanga kuli aliwe pakuti yakuvwe mano yano Leza wa cumi wamupeezile. 24 Yonsi yamutwalilanga ivya upe, kuli kuti iviya vyakwe siuva, viya vyakwe goldi, vyakuzwala vya mu ulwi ni vyakuzwala vyuze, mafuta yakwe basamu, mfwalasi na ya punda, nupya vikwene avino yacitanga cila mwaka. 25 Nupya Solomoni wakweti umwa kwikala imfwalasi umwali 4,000, wakweti ni mfwalasi 12,000,* nupya wavisungiile umu misumba ya kusungilamo maceleta nu mu Yelusalemu, mupiipi na kuno wikalanga. 26 Watungululanga ya mwene yonsi kufuma uku Luzi* kufika uku mpanga ya Ina Filisti nu kufika uku mupaka wa Ijipti. 27 Umwene wavuzizye siuva umu Yelusalemu kwati amawe, ni miti ya mikedali kwati imisamvu iyaya umu Syefela. 28 Nupya antu yaletelanga Solomoni imfwalasi ukufuma uku Ijipti nu ku mpanga zyonsi.

29 Ilyasi lyonsi ilyasyala ilikalanda pali Solomoni ukufuma pa kutandika ukufika pa mpela, lyalembwa umu mazwi yakwe Natani kasesema, umu usesemo wakwe Ahiya Umwina Syilo nu mu vyalembwa vyakwe Ido kasesema uwaweni ivilolwa ivyalandanga pali Yeloboamu mwana Nebati. 30 Solomoni wateesile Aina Izlaeli yonsi umu Yelusalemu pa myaka 40. 31 Lyene Solomoni wafwile nu kuziikwa ukwalaala ivikolwe vyakwe mu Musumba Wakwe Devedi isi; nupya Leoboamu umwanakwe wamupyanyile pa wene.