2 Milandu

22 Lyene antu ya mu Yelusalemu iisile Ahaziya kasuli* wakwe Yeolamu pa wene kuti apyane pali isi, pano asilika aizile na Ina Alabya walanga yakoma ya isilenzi yonsi. Fwandi Ahaziya mwana Yeolamu watandike ukuteeka umu mpanga ya Yuda. 2 Ahaziya wali ni myaka 22 lino wizile aya umwene, nupya wateesile umwaka onga umu Yelusalemu. Nyina wali a Ataliya umwizikulu wakwe Omuli.

3 Nawe kwene wacitanga wakwe viivi kwene vino amu ng’anda yakwe Ahabu yacitanga, pano nyina u wamupandanga mano ya kucita iviipe. 4 Nupya Ahaziya watwalilile ukusosya Yeova wakwe vino amu ng’anda yakwe Ahabu yacitanga, pano aliyo yamupandanga mano pa cisila ca mfwa yakwe isi mpaka iyamuletelela. 5 Walondiile vino yamupanzile mano apita na Yeolamu mwana Ahabu umwene wa mu Izlaeli mu kulwisya Hazaeli umwene wa ku Silya ku Lamoti-gilyadi, kuno asilika aomvyanga maulapwa yaile iyacisa Yeolamu. 6 Lyene waswilile uku Yezileele pakuti akapole ivilonda vino yamucisile uku Lama lino walwisyanga Hazaeli umwene wa ku Silya.

Ahaziya* mwana Yeolamu umwene wa ku Yuda waile uku Yezileele mu kulola Yeolamu mwana Ahabu pano wacisike. 7 Lelo Leza walenzile ukuti ivintu viipile Ahaziya lino waile umu kulola Yeolamu; lino wafisile, wasukiliile Yeolamu umu kukomenkanya Yeu umwizikulu wakwe Nimisyi wino Yeova wasoolwile ukonona amu ng’anda yakwe Ahabu. 8 Lino Yeu watandike ukukoma amu ng’anda yakwe Ahabu, wazanyile ya cilolo ya mu Yuda na ana ya ina yakwe Ahaziya, kuli kuti aomvi yakwe Ahaziya nupya wayakomile. 9 Lyene watumile aakuya umu kulonda Ahaziya, nayo yaile iyamuzana uku Samaliya kuno wafisime, nupya yamulemile nu kumutwala kuli Yeu. Lyene yamukomile nu kumuziika, pano yalanzile iyati: “U mwizikulu wakwe Yeosyafati uwaombelanga Yeova nu mwenzo onsi.” Kutaali nanti aumwi uwa mu ng’anda yakwe Ahaziya uwakweti maka ya kuteeka.

10 Lino Ataliya nyina wakwe Ahaziya waweni ukuti umwanakwe wafwa, wakatwike nu kukoma ana ya mwene yonsi amu ng’anda yakwe Yuda. 11 Lelo Yeosyebati umwana wa mwene wasenzile Yeoasyi mwana Ahaziya umu umfisolo nu kumufumya pa yana ya mwene aali nu kukomwa, nupya waile amusungila umu muputule wa mukasi pamwi nu wa kumusakamala. Yeosyebati umwana umukazyana uwa Mwene Yeolamu (wali umuci wakwe Yeoyada simapepo nupya wali a kaci wakwe Ahaziya) wakwanisye ukufisa Yeoasyi pakuti Ataliya atamukoma. 12 Wali nayo pa myaka 6 ala yamufisa umu ng’anda yakwe Leza wa cumi lino Ataliya wateekanga impanga.