Ezaya
52 Zyuka! Zyuka! Kwata maka we Zioni!
Zwala icakuzwala icisuma we Yelusalemu umusumba wa muzilo!
Kusi umuntu aatazembululwa nu mukowele aalingila muli wewe.
2 Kunta ulukungu, katuka nu kwikala we Yelusalemu.
Fumya intambo iili umu nsingo yako, we mwanaci Umwina Zioni uwasendwa umu uzya.
3 Yeova walanda wati:
“Yakusenzile ukwaula ukulipilapo icili consi,
Nupya ulaweziwa ukwaula ukulipilapo impiya.”
4 Yeova Umwene wa Papelapela walanda wati:
“Pa kutandika antu yane yaile uku Ijipti nu kuyaikala wa enyi;
Lyene Aina Asilya yatandike ukuyacuzya apaula umulandu.”
5 Yeova walanda wati: “I vyani vino namacita lyene?
Antu yane yayasenzile ukwaula ukulipilapo icili consi.”
Yeova walanda nu kuti: “Aakayateeka yakayuvwa pali vino yacisile,
Nupya cila wanda yakasaalula izina lyane.
6 Uwo kwene ali mulandu uno antu yane yalamanyila izina lyene;
Nupya umu wanda uuwo yalamanya ukuti anene kwene nkuvwanga.
Ee, a nene kwene!”
7 Iyee vino zyayemba ingazo zya muntu aali pa myamba aakuleta ilyasi lisuma,
Aakusimikila pa mutende,
Aakuleta ilyasi lisuma ilya vintu visuma,
Aakusimikila pa kupusuka,
Aakunena Zioni ukuti: “Leza wako wataya Umwene!”
8 Kutika! Alinzi yako yakupunda.
Yakupundila pamwi ni nsansa,
Pano yalailolela lino Yeova alakolonganika antu ya mu Zioni nupya.
9 Sansamukini nu kupunda ni nsansa mwe ncende izyononeka izya mu Yelusalemu,
Pano Yeova watateekezya antu yakwe; watakulula Yelusalemu.
10 Yeova watalangizya ikasa lyakwe ilya muzilo uku nko zyonsi;
Antu yonsi amu nsi yalalola vino Leza witu akapususya.
11 Piliukini, piliukini, nu kufumako, mutalema icili consi icikowele!
Fumini muli aliwe, isungini ausaka,
Mwemuno mukasenda iviya vyakwe Yeova.
12 Mutalaya ni ntete pa kufuma,
Nupya mutalalondekwa ukupuuka,
Pano Yeova alamukoleelela,
Nupya Leza wa Ina Izlaeli alamucingilila uku cisila.
13 Lolini! Umuomvi wane alaaomba ivintu na mano.
Alacindamikwa,
Alaya umukulu nupya alapeelwa icifulo icikalamba.
14 Wakwe viivi kwene vino antu aingi yamulolekesyanga ala iyazunguka
—Pa mulandu wakuti icinso cakwe capusine sana na antu yonsi
Nupya imilolekele yakwe yapusine ni ya yantu—
15 Vivyo kwene avino alalenga ni nko izingi ukuzunguka.
Ya mwene yatalakwata ivya kulanda pa nkoleelo yakwe,
Pano yalalola vino yatatala yuvwapo
Nupya yalelenganya pali vino yatuvwapo.