Mapinda
1 Yaa a mapinda yakwe Solomoni mwana Devedi umwene wa Ina Izlaeli:
2 Yakalenga umuntu ukuya na mano nu kusalapulwa;
Yakalenga umuntu ukwiluka mazwi ya mano;
3 Yakalenga umwi ukupokelela ukusalapula ukungamwavwa ukwiluka,
Ukuya umulungami, kupingula ningo pa vintu nu kuya nu ufumacumi;
4 Yakalenga umuntu aatamanyikisha ivintu ukuya umucenjele;
Nu kulenga umulumendo ukuya nu kumanya nu kwelenganya ningo pa vintu.
5 Umuntu wa mano akakutika nu kusambilila ivingi;
Umuntu aakailuka akalondela utunguluzi wa mano
6 Pakuti ailuke ipinda nu mulumbe,
Kuli kuti mazwi ya yantu ya mano nu tucole twao.
7 Ukoopa Yeova ali ntandikilo ya kumanya.
Lelo aawelewele sile aasuula mano nu kusalapula.
8 Mwanane kutika uku kusalapula kwakwe ya tata yako,
Nupya utasuula masunde yakwe ya mayo yako.
9 Vyaya wa cisote icisuma uku mutwe wako
Nupya wa ciyembelo umu nsingo yako.
10 Mwanane ndi cakuti aayembu yezya uku kutuunka, utayuvwila.
11 Ndi cakuti yalanda yati: “Twapita.
Tukafisame nu kukoma antu.
Tumafisama nu kuloleela antu ya kaele pakuti tuyakome apaula umulandu.
12 Tumayamila aapuma wakwe vino Ilindi* likacita,
Kwati a yano yakuya ukwi lindi.
13 Tupoke ivyuma vyao vyonsi;
Nu kuzuuzya mang’anda itu ni vintu vino tumapoka.
14 Uombele pamwi naswe,
Nupya tulankana vyonsi vino tuliiya.”
15 Mwanane uteezya ukuyalondela
Utapita umu nzila yao,
16 Pano yakautukila uku kucita iviipe,
Yakautukila uku kukoma antu.
17 Cumi kwene u kuicuzya sile ukuteya isumbo pano icunyi cikulola.
18 Ali mulandu uno antu yaa yakateyamila auze pakuti yayakome;
Yakafisama pakuti yakome antu yauze.
19 Zii ali nzila zyakwe yayo aakazana ivyuma mu nzila ya ucenjezi,
Cikalenga ukuti yayo aakavikwata yafwe.
20 Mano ya cumi cumi yakupunda umu miseo.
Yakutwalilila ukukatusha izwi umu misolo ya mu misumba.
21 Yakupunda pa koona ya museo umukapita sana antu.
Yakupunda pa mpongolo zya musumba yakuti:
22 “Mwemuno mutakwata mano, uzye mulatwalilila ukutemwa imiyele ya uwelewele ukufika lilaci?
Mwemuno mukatumfya yauze, uzye mulatwalilila ukuzangila umu mitumfyo ukufika lilaci?
Na mwe yawelewele mwe, uzye mulapata ukumanya ukufika lilaci?
23 Uvwini ukusunda kwane.
Lyene ndapongolwela umupasi wane pali mwemwe;
Ndaleka ukuti mazwi yane yamanyikwe kuli mwemwe.
24 Pano namwamile lelo mwatwalilile ukukana,
Nakonzolwile ikasa lyane nomba kusi nanti awenga uwisileko mano,
25 Mwatwalilile ukusuula ukupanda mano kwane konsi
Nu kukana ukusunda kwane,
26 Nani kwene ndamiseka lino mulakwata intazi;
Ndamutumfya lino vino mukatiina vilamucitikila,
27 Lino vino mukatiina viliza pali mwemwe wa cimuza,
Nupya lino uzanzo uliza pali mwemwe wa mvula ya cimuza,
Na lino ulanda ni ntazi viliza pali mwemwe.
28 Pa nsita iiya yalatwalilila ukungama lelo ntalayasuka;
Yalandondesha lelo yatalanzana,
29 Pano yapasile mano,
Nupya yataasoolwile ukoopa Yeova.
30 Yakanyile ukupanda mano kwane;
Yatacindike ukusunda kwane konsi.
31 Fwandi yalapokelela icilambu ukulingana na vino yakacita,
Nupya yalikuta ukusunda kwao.
32 Pano ukupumbuka kwa yantu aatakwata mano kulayakoma,
Nu mulekelezya wa yawelewele ulayonona.
33 Lelo aakanguvwila alacingililwa
Nu kukanaopa intazi.”