Milimo ya Atumwa
4 Lino Petulo na Yoani yacili yakulanda uku yantu, kwizile ya simapepo, mukalamba wa yalinzi ya pi tempele alino na Asaduki. 2 Antu yaa yasosile sana pano atumwa yasambilizyanga antu nu kulanda apaswe pa kutuutuluka kwakwe Yesu ukufuma uku yafwe. 3 Fwandi yayalemile nu kuyayalila umu cifungo kufikila uwanda uwalondelilepo, pano cali a manguzi. 4 Lelo aingi auvwile vino yalanzile yataile, nupya cipendo ca onsi cafisile umupiipi na 5,000.
5 Lyene uwanda uwalondelilepo, intunguluzi zya Yayuda na ya kalemba yakolongine umu Yelusalemu, 6 paali na Anasi wino wali a simapepo mukalamba, Kayafa, Yoani, Alekizanda na ya lupwa yakwe simapepo mukalamba yonsi. 7 Lyene iimike Petulo na Yoani pa nkoleelo yao nu kutandika ukuyuzya iyati: “U ku maka ci nanti umwi zina lyakwe weni muno mwacitiile cii?” 8 Lyene umupasi wa muzilo wizile pali Petulo nu kumulenga ukulanda ati:
“Mwe ntunguluzi zya yantu, 9 ndi cakuti ilelo mukulonda ukumanya icintu icisuma cino twacitiile umuntu uwali umulemale, nu kumanya uwamupozizye, 10 lekini cimanyikwe kuli mwensi nu ku yantu yonsi amu Izlaeli ukuti Yesu Klistu uwa ku Nazaleti, wino mwapoopiile pa cimuti, lelo wino Leza watuutulwile ukufuma uku yafwe, u watalenga ukuti umuntu wii uwataimilila pa nkoleelo inu apole. 11 Lii ali ‘iwe lino mwe ya kakuula mwakanyile ilizile iliya iwe licindame ilya pa koona.’* 12 Nupya kutaya muze angalenga antu yapusuke, pano kutaya izina lyuze pano nsi ilyapeelwa uku yantu muno tungapusukila.”
13 Lyene lino yaweni ukusipa kwakwe Petulo na Yoani nu kumanya ukuti yataali asambilile* nupya yataali acindame, yazungwike. Nupya yilwike ukuti yaali pamwi na Yesu. 14 Lino yalolekesyanga umuntu uwapoziwe uwaimi nayo, yataakweti vya kulanda. 15 Fwandi yayanenyile ukufuma umu cikuulwa ca Sanihedilini, nupya yatandike ukuzyanya 16 iyati: “Tumayacita uli antu yaa? Pano icacumi iyacita icizungusyo icikalamba, amu Yelusalemu yonsi iyamanya, nupya tutanga tucikaane. 17 Pakuti ilyasi lii litasalangana uku yantu na yauze, lekini tuyatiinye nu kuyanena ukuti yataalanda uku yantu ali yonsi umwi zina lii.”
18 Lyene yayamile nu kuyakonkomezya ukuti yataalanda icili consi nanti ukusambilizya umwi zina lyakwe Yesu. 19 Lelo Petulo na Yoani yaswike iyati: “Ndi cakuti cili ningo mu manso yakwe Leza ukuvwila mwemwe ukucila ukuvwila Leza, pingulini mweineco. 20 Nomba swemo tutanga tute ukulanda pa vintu vino twalola nu kuvwa.” 21 Pa cisila ca kuyatiinya nupya kwene, yayatiile, pano yatayazanyile nu mulandu wa kuyafulwilapo nupya yatiinanga antu pano yonsi yalumbanyanga Leza pali vino vyacitiike. 22 Nupya umuntu uwapoziwe umu cizungusyo wali ni myaka ukucila pali 40.
23 Pa cisila ca kuyata, yaswilile uku yasambi yauze nupya yayanenyile vino intunguluzi zya Yayuda na ya simapepo akalamba yayanenyile. 24 Lino yuvwile vivyo, yatandike ukupepa kuli Leza ala yakupunda iyati:
“Mwene wa Papelapela, wewe waumvile iyulu ni nsi na yemba na vyonsi ivyayamo, 25 nupya wewe walandiile mu cikolwe citu Devedi umuomvi wako ukuomvya umupasi wa muzilo, lino watiile: ‘U mulandu ci uno amu nko yasokela nupya u mulandu ci uno antu amu mpanga izipusanepusane yakwelenganyizizya pa vintu vyasile sile? 26 Ya mwene amu nsi yaipekanyizye, ni ntunguluzi zya Yayuda nazyo kwene zyakolongine pakuti yalwisye Yeova nu mupakwe* wakwe.’ 27 Pano mu cumi Helodi na Ponti Pilato na antu amu nko alino na antu amu Izlaeli yakolongine umu musumba uu pakuti yalwisye Yesu umuomvi wako uwa muzilo, wino wasoolwile, 28 ku kucita vino walandiile limwi ukuti vilacitika uku maka yako nupya ukulingana nu kulonda kwako. 29 Lyene, we Yeova, lolekesya pa vintiinya vyao, nupya leka aomvi yako yatwalilile ukulanda api zwi lyako nu kusipa, 30 lino ukupozya alwale ukuomvya maka yako na lino ivimanyililo ni vizungusyo vikucitilwa umwi zina lyakwe Yesu umuomvi wako uwa muzilo.”
31 Lyene lino yamazile ukupepa,* incende ino yakolonginepo yatenkanyile, nu mupasi wa muzilo wizile pali yonsi nupya yalandanga api zwi lyakwe Leza nu kusipa.
32 Nupya antu aingi ataile yaali nu mwenzo onga nupya kutali nanti aumwi uwalandanga ukuti vintu vino wakweti vyali ivyakwe, lelo yankananga vyonsi vino yakweti. 33 Nupya atumwa yatwalilile ukuomba ningo umulimo wa kusimikila pa kutuutuluka kwa Mwene Yesu, nupya icikuuku cikulu cali sana pali yonsi. 34 Pali aliyo pataali uuliizye, pano yonsi aakweti vyalo nanti mang’anda yakazyanga nu kuleta impiya, 35 yapeelanga impiya zizyo uku yatumwa. Atumwa nayo yapeelanga cila muntu ukulingana na vino walondekwanga. 36 Jozefu wino atumwa yamanga nu kuti Banaba (icikapiliula ukuti “Aakakomelezya Auze”), umwina Levi uwavyalilwe uku Kupulo, 37 wakweti mpanga nupya waikazizye nu kupeela impiya uku yatumwa.