Isamu
Lwimbo luno Devedi wimvile.
27 Yeova ali luswepo lwane nupya kapususya wane.
A weni wino ningoopa?
Yeova ali mwakufisama mwane.
A weni wino ningoopa?
2 Lino antu aipe yanzanzile pakuti yonone umwili wane,
Alwani yane aliyo yapumiike nu kupona.
3 Nanti cakuti asilika yangampangila inkambi,
Ntaloopa.
Nanti cakuti ulwi ungakatuka pali nene,
Nalyo kwene ndatwalilila ukuya umusipe.
4 Nalenga icintu conga kuli Yeova
Nupya cico kwene acino nkalondesya
Ukuti ningikala umu ng’anda yakwe Yeova manda yonsi aa umi wane,
Pakuti nalolekesya pa usuma wakwe Yeova
Nu kutaizya ndi cakuti nalola itempele lyakwe.
5 Pano alamfisa umu ncende yakwe pa wanda wa ntazi;
Alamfisa umu ncende icingililwe iyaya umwi tenti lyakwe;
Alanjika papela ya ciliwe.
6 Lyene incimvya alwani yane atiyanzinguluka;
Ndapeela malambo api tenti lyakwe ni nsansa;
Ndiimba inyimbo zya kulumbanya Yeova.
7 Uwanguvwa, we Yeova, lino nalilila kuli wewe;
Uwanguvwila uluse nu kungasuka.
8 Nkaiusya umu mwenzo wane ukuti, walanzile uti:
“Londa icinso cane.”
Ndalonda icinso cako, we Yeova.
9 Utafisa icinso cako kuli nene.
Utazinga ne muomvi wako pa mulandu nu ukali wako.
Wewe uli kazwa wane;
Utandekelezya nanti ukunsya, we Leza wane, wemuno ukampususya.
10 Nanti cakuti mayo na tata yansya,
Yeova alantola.
11 Nsambilizye inzila yako, we Yeova,
Ntungulule umu nzila ilungame pa mulandu na alwani yane.
12 Utampeela uku yalwani yane,
Pano ya kambone ya ufi iyankatukila,
Yakulonda ukunkoma.
13 Uzye nga aekwi kuno indi nga ntakweti utailo
Uwakuti ningalola usuma wakwe Yeova lino ncili nu umi?
14 Uwataila Yeova;
Usipe nupya uye umukome.
Uwataila Yeova.