Mapinda
22 Cazipa ukusoolola izina lisuma ukucila ukuya ni vyuma vingi;
Kucindikwa kwazipa ukucila siuva na goldi.
2 Umukankala nu mupiina yonsi yaya icili cimwi
Yeova u wayapanzile.
3 Umucenjele akalola uzanzo nu kufisama,
Lelo aatamanya cimwi akatwalilila ukupita nupya ivintu vikamwipila.
4 Ivikafuma umu kuicefya nu koopa Yeova,
I vyuma, ucindami nu umi.
5 Imyunga ni viteyo vyaya umu nzila ya muntu umucenjezi,
Lelo wensi uwacindika umi wakwe akataaluka uku vintu vivyo.
6 Sambilizya umwana umu nzila ino alinzile ukupitamo;
Pano nanti sile alino wakota atalafumamo.
7 Umukankala akateeka umupiina,
Nupya uwakongola akaya umuzya kuli wino wamukongwesha.
8 Aakakomela iviipe alazombola intazi,
Nupya intuwa ya cipyu cakwe ilakontoka.
9 Umuntu uwaya na ukapekape alapaalwa,
Pano akapeelako apiina ivyakulya vyakwe.
10 Zinga umuntu wa mitumfyo,
Nupya patalaya ukulemanila;
Ukupaazyanya ni ntusi.
11 Umuntu uwatemwa umwenzo usanguluke nupya aakavwanga ivisuma
Alaya acuza wa mwene.
12 Amanso yakwe Yeova yakacingilila ukumanya,
Nupya akavulunganya mazwi ya yantu ya ufi.
13 Umukasu akati: “Panzi pali cisama!
Amankoma umu musolo wa mu musumba!”
14 Kanwa ka mwanaci umwipe kaya wa ciwina icizike
Wensi aakasosha Yeova amuno alaponela.
15 Uwelewele waya umu mwenzo wa mwana,
Lelo intuwa ya kusalapwilako ilautaalusha kufuma kuli aliwe.
16 Aakaiyila umupiina pakuti akwate ivyuma
Na aakapeela umukankala ivya upe
Yalaponelwa ni cipowe.
17 Kutika nu kuvwa uku mazwi ya yantu ya mano,
Pakuti waelenganya sana pali vino nkakusambilizya,
18 Pano i cisuma ukusunga ivintu vii umu mwenzo wako,
Pakuti vingatwalilila ukuya pa milomo yako lyonsi.
19 Ilelo inkulondolwela ivintu vii,
Pakuti uwataila Yeova.
20 Uzye ntakulembela mpiti,
Uku kupanda mano nu kukwazwa ukumanya,
21 Alino nu ku kusambilizya mazwi ya cumi nupya aasintililwepo,
Pakuti ungawezya amazwi ya cumi kuli wino wakutumile?
22 Mutaiyila umupiina pa mulandu wakuti umupiina,
Nupya mutaacuzya umuntu umuulizye pa mpongolo ya musumba,
23 Pano Yeova alayavwangila
Nupya alakoma yayo aakayacenjezya.
24 Utaaya pamwi nu muntu aakasoka zuwa,
Nanti ukuombela pamwi nu muntu wa cipyu,
25 Pakuti utasambilila imiyele yakwe
Nu kulemya umu citeyo.
26 Utaaya pamwi na antu aakalamukana umu minwe
Pa kulaya ukuti yalalipilila yauze inkongole.
27 Ndi cakuti utakweti ica kulipila,
Yalakupoka bedi yako!
28 Utaasezya umupaka wa mpiti
Uno ivikolwe vyako visile.
29 Uzye walola umuntu umucenjele pa mulimo wakwe?
Alimilila pa nkoleelo ya ene;
Atalimilila pa yantu aasile sile.