Danieli

12 “Pa nsita iiya Mikaeli* alakatuka, kuli kuti cilolo mukalamba aakaazwilizya antu yako. Nupya kulaya insita lino kulaya ucuzi utaatala wayako ukufuma pano uluko ululi lonsi lwayelileko ukufika pa nsita kwene iiyo. Pa nsita iiyo antu yako yalapusuka, kuli kuti wensi uwalembwa umwi buku. 2 Aingi alaala umu musili yalazyuka, yamwi yalazyuka nu kuya nu umi wa pe, yauze nayo yalazyukila uku kuzewana kwa pe.

3 “Nupya yayo aakailuka yalaayengesa wa mwi yulu, na aakalenga aingi ukuya aalungami yalaayengesa wa ntanda manda pe.

4 “Lelo wemo Danieli, usunge mazwi yaa ukuya inkama, nupya uyale ibuku lii ukufika uku nsita ya ku mpela. Aingi yalaapitaana* nupya ukumanya kwa cumi kulavula.”

5 Lyene ne Danieli nakatwisye manso nu kulola antu na yauze yaili iimilila paapa kwene, wenga wimiliile uku mbali yonga iya luzi, umuze nawe uku mbali yuze. 6 Lyene wenga pali yayo uzizye uwazwite icakuzwala ca nsalu isuma uwaimi pa manzi ati: “Uzye ivintu vii ivya kuzungusya vilasila lilaci?” 7 Lyene nuvwile uwazwite icakuzwala ca nsalu isuma uwaimi pa manzi akulanda ala wataimika makasa umupela nu kulapa kuli wino wayako manda pe ati: “Palapita insita yonga, insita ziili na afu izisoololwe.* Lino yalamala sile antu ya muzilo maka, ivintu vii vyonsi vilasila.”

8 Lelo nemo nuvwile, nomba ntamanyile vino vyapiliulanga; fwandi namuzizye inti: “Musambazi wane, i vyani lyene ivilacitika?”

9 Nawe watiile: “Pitanga Danieli, pano mazwi yaa yalinzile ukuya inkama nupya yalinzile ukuyalilwa ukufika nu ku mpela. 10 Aingi yalaisangulula nu kuiswefya nupya yaleziwa. Aipe yalaacita iviipe, nupya kusi umwipe nanti a wenga alamanya vino mazwi yaa yakupiliula; lelo antu ya mano yaliluka.

11 “Kufuma pa nsita ino malambo aakapeelwa lyonsi yalafumiziwako na lino ica winyi icikaleta uwononesi cilayako, palaya manda 1,290.

12 “Uwa nsansa u muntu aakatwalilila ukuloleela mpaka manda 1,335 yace yasile!

13 “Lelo wemo twalilila ukuzizimizya ukufika nu ku mpela. Ulafwa, lelo ulazyuka nu kupoka ica upyanyi cako ku manda ya ku mpela.”