Ezekeli
3 Lyene wanenyile ati: “We mwana wa muntu, lya cino ukulola. Lya ulupapulo luu, alino uwapita ukalande na amu ng’anda yakwe Izlaeli.”
2 Fwandi nasiime, nawe wandisizye ulupapulo. 3 Lyene wanenyile ati: “We mwana wa muntu, lya ulupapulo luu luno nkukupeela, nu kwikuta.” Fwandi natandike ukululya, nupya lwali ululyompe wa uci.
4 Lyene wanenyile ati: “We mwana wa muntu, yanga uku ya mu ng’anda yakwe Izlaeli ukayanene mazwi yane. 5 Utakutumwa uku yantu aakalanda ululimi luno utanga uuvwe nanti luno utamanya, lelo u ku ya mu ng’anda yakwe Izlaeli. 6 Usikutumwa uku yantu aingi aakalanda ivingakutalila ukuvwa nanti aakalanda ululimi ulutamanyikwa. Nga nakutumile uku yantu yayo, yanguvwa vino ukulanda. 7 Lelo amu ng’anda yakwe Izlaeli yalakana ukuvwa kuli wewe pano yasilonda ukuvwa kuli nene. Yonsi kwene yakoma imitwe nupya yakoma imyenzo. 8 Lola! Indenga icinso cako ukukoma wa vinso vyao ni cipuma cako wa vipuma vyao. 9 Indenga icipuma cako ukukoma wakwe daimondi, ukucila iwe ilikome sana. Utayopa nanti ukuvwa intete pa mulandu ni vinso vyao pano aacipondoka.”
10 Nupya watwalilile ukunena ati: “We mwana wa muntu, uvwa mazwi yonsi yano nkukunena nupya uwayelenganyapo sana. 11 Yanga uku yantu yako aasendwa umu uzya ukalande nayo. Ukayanene uti, ‘Vii avino Yeova Umwene Uwa Papelapela walanda,’ asi umulandu yaluvwa nanti foo.”
12 Lyene umupasi wansenzile nupya nuvwile iciunda icikalamba ukwi tundu lyane ni izwi ilyatangi: “Si Yeova alumbanyiziwe pa lulumbi lwakwe.” 13 Kwali ni ciunda ca maapa ya viumbwa vya umi aakumyanyanga, ni ciunda ca mateelo aali umupiipi navyo alino ni congo icikalamba. 14 Nupya umupasi wanyemwile nu kunsenda, nani napisile ala insoka nupya ala indi sana ni cipyu, lyene umupasi wakwe Yeova watandike ukuomba sana pali nene. 15 Fwandi naile uku Teli-abibi ukwali antu aasenzilwe umu uzya aikalanga umupiipi nu luzi lwa Kebali, nikazile kuuku kwene kuno ikalanga; nupya nali umuvulunganyiziwe pa manda 7.
16 Pa mpela ya manda 7 Yeova wanenyile ati:
17 “We mwana wa muntu, nakusonta ukuya umulinzi uku ya mu ng’anda yakwe Izlaeli; nga uvwa mazwi yane ulinzile ukuyacelula. 18 Nga nanena kacita wa viipe nati, ‘Ulafwa,’ naawe wakana ukumucelula nu kulanda nawe pakuti ate ukucita iviipe vino akacita nu kuya nu umi, alafwila pa luyembu lwakwe pano a kacita wa viipe, lelo uwazi wakwe ndaulonda kuli wewe.* 19 Lelo nga wacelula kacita wa viipe nawe wakana ukusenuka nu kuta ukucita iviipe vino akacita, alafwila pa luyembu lwakwe, lelo wemo ulapusuka. 20 Lelo ndi cakuti umuntu mulungame wata ukucita ivilungame nu kutandika ukucita iviipe, ndika ica kupumikako pa nkoleelo yakwe nupya alafwa. Ndi cakuti utaamucelwilepo alafwila pa luyembu lwakwe ni vilungame vino wacitanga vitaliusiwa, lelo uwazi wakwe ndaulonda kuli wewe.* 21 Lelo nga wacelula umuntu mulungame ukuti atayembuka, nawe wakana ukuyembuka, alaya nu umi pa mulandu wakuti wamucelwile, nupya naawe kwene ulapusuka.”
22 Lyene ikasa lyakwe Yeova lizile pali nene, nawe wanenyile ati: “Katuka yanga uku lwanga, kuuku kwene akuno nayalanda naawe.” 23 Fwandi nakatwike inja uku lwanga, nupya kwali ululumbi lwakwe Yeova wakwe luno naweni umupiipi nu luzi lwa Kebali, lyene nafupime pansi. 24 Umupasi wingile muli nene nu kundenga ukwimilila, nupya Leza wanenyile ati:
“Pitanga ukaiyalile umu ng’anda yako. 25 Lelo wemo, we mwana wa muntu, yalakunyepa ni myando pakuti utaca uwafuma nu kuya kuli aliyo. 26 Nupya ndalenga ululimi lwako lukambatile papela umu kanwa kako, utalaavwanga nupya utalaayakalipila pano aacipondoka. 27 Lelo lyonsi lino nalanda naawe ndaaleka ukuti utandike ukuvwanga, nupya uce uyanene uti, ‘Vii avino Yeova Umwene Uwa Papelapela walanda.’ Lekini aakulonda ukuvwa auvwe, na atakulonda ukuvwa atuvwa pano aacipondoka.