Mapinda
7 Mwanane uwalondela mazwi yane
Nu kusunga masunde yane.
2 Uwalondela masunde yane pakuti utwalilile ukuya nu umi,
Uwacingilila masunde yane kwati imboni yi linso lyako.
3 Uyanyepelele uku minwe yako,
Nu kuyalemba umu mwenzo wako.
4 Uwanena mano uti: “Wewe nkazi yane,”
Nupya uwanena ukwiluka uti: “Wewe lupwa wane,”
5 Pakuti vyakucingilila uku mwanaci uwa miyele iipe,
Nu kukucingilila uku mwanaci umwipe, kumwi nu ku mazwi yakwe aakulyombeleka.
6 Nasungamiile api windo lya mu ng’anda yane,
Nupya nalolekishe pansi,
7 Naweni antu aatatala yakula umu mano,
Pali aliyo naweni umulumendo umwi aatakweti mano.
8 Wapitanga umu mbali ya museo uwayela umupiipi ni ng’anda ya mwanaci umwipe,
Nupya walungime uku ng’anda ya mwanaci kwene wiyo
9 Mu nsita ya manguzi,
Lino kwatandika ukufiita nupya kwaya imfinzi.
10 Lyene naweni kuno umwanaci wamukomenkanya,
ala azwite kwati iule, wali u mwanaci wa ucenjezi sana.
11 Wali u muvwangikishe nupya umupame.
Nupya asiikala na pa ng’anda.
12 Insita zimwi akaikala panzi, insita zyuze nazyo akaikala umu misolo ya mu misumba,
Akaloleelela mupiipi na mampatu yonsi amiseo.
13 Naweni wakumbatila umonsi nu kumutonsola,
Nupya wapamile nu kumunena ati:
14 “Nalindinzile ukupeela malambo ya mutende.
Ilelo nafikilizya imilapo yane.
15 Ali mulandu uno inizila kuti nkukomenkanye,
Kuti nkulole, nupya nakuzana!
16 Inanzika insalu izisuma pali bedi yane,
Insalu iziyengese sana izya ku Ijipti.
17 Insansa pali bedi yane mafuta anunkile, aapangilwa na mule, aloyi na sinamoni.
18 Twapita tukaipakizye icitemwiko suka akatondo;
Tukasansamukile pamwi umu citemwiko,
19 Pano uwane asipo pa ng’anda;
Wapita ukutali sana.
20 Wasenda na kacola ka mpiya,
Nupya atalawela ukufikila lino umwezi ulakoma.”
21 Wamubefile na mazwi ya kumutonsha.
Wamubefile ni milandile ya kulyombeleka.
22 Papo kwene umulumendo wamulondiile kwati a cipambasi wino yakuya umu kukoma,
Kwati u muwelewele wino yakuya umu kunyepa umu makoli,
23 Kufikila lino uluceto lwamutota umwi tima;
Wali wa cunyi icikuitwala umu citeyo, ataamanyile ukuti umi wakwe wali umu uzanzo.
24 Fwandi lyene yanane, kutikini kuli nene
Ikini amano kuli vino nkulanda.
25 Mutaleka imyenzo inu ipiliukile uku miyele ya mwanaci wiyo.
Mutapumbukila umu nzila zyakwe,
26 Pano walenga antu aingi ukukomwa,
Nupya yano wakoma aingi sana.
27 Ing’anda yakwe ikatungulula ukwi Lindi;*
Ikatungulula umu miputule ya mfwa.