Isamu

83 We Leza, utikala mya;

Utatwalilila ukwikala ukwaula ukulanda, we Leza.

 2 Pano lola! alwani yako yali mu cimvulunganya;

Aakupata yali ni cilumba.

 3 Yakaapangila antu yako mu ucenjezi;

Yakaapangila ukucitila iviipe antu yako acingililwe.

 4 Yakati: “Lekini tulovye uluko lonsi,

Pakuti kutakaye uwa kwiusya izina lyakwe Izlaeli.”

 5 Yakapandana mano;

Iyapangana cipangano pakuti yakulwisye

 6 Atiyapangana a Ina Edomu, Aina Isumaeli, Aina Moabu na Ina Hagili.

 7 Aina Gebali, Aina Amoni na Ina Amaleki,

Aina Filisti kumwi na aakaikala mu Tuli.

 8 Aina Asilya nayo kwene iyailunda kuli aliyo;

Yakutungilila ya mwana Loti. (Selah)

 9 Ucite kuli aliwe wakwe vino wacisile uku Ina Midyani,

Nupya wakwe vino wacisile kuli Sisela na Yabini pa luzi lwa Kisyoni.

10 Yayakomiile pa Eni-doli;

Izile iyaya umuvundo wa musili.

11 Leka antu yao aacindikwe yaye wakwe Olebu na Zeebu

Na ya cilolo yao yaye wakwe Zeba na Zalemuna,

12 Pano yaatile: “Lekini tupoke impanga muno Leza akaikala.”

13 We Leza wane yalenge yaye wa nsokolo izikuululwa,

Wa vipelele ivikuululwa nu muza.

14 Wakwe vino umoto ukaoca umutengo,

Na vino cimbilimbili cikaoca umwamba,

15 Avino uyazinganye ni cimuza cako ciipisye

Nupya uyatiinye ni cimuza cako.

16 Yavimbe nu muzewanya pa manso,

Pakuti yangalonda izina lyako we Yeova.

17 Si yuvwe insonyi nu kuvwa intete manda pe;

Si yazewane nu kulowa;

18 Si antu yamanye ukuti wewe wemuno izina lyako wewe Yeova,

Wewe sile wenga uli wa Papelapela umu nsi yonsi.