1 Yamwene
8 Pa nsita iiya Solomoni wakolonganike akalamba ya Ina Izlaeli, intunguluzi zya mitundu ni ntunguluzi zyuze. Yatwazile imbokosi ya upangano yakwe Yeova ku Mwene Solomoni uku Yelusalemu kufuma uku musumba wakwe Devedi, kuli kuti ku Zioni. 2 Aonsi yonsi Aina Izlaeli yakolongine uku Mwene Solomoni pa wanda wa mutebeto* mu mwezi wakwe Etanimu,* kuli kuti umu mwezi walenga 7. 3 Fwandi akalamba yonsi amu Izlaeli izile, nupya ya simapepo yanyemwile Imbokosi ya Upangano. 4 Yaleesile Imbokosi ya Upangano yakwe Yeova, itenti lya kupepelapo ni viya vyonsi ivya muzilo ivyali umwi tenti. Ya simapepo na Ina Levi aliyo yavileesile. 5 Umwene Solomoni na Ina Izlaeli yonsi yano wamile yaali pa nkoleelo ya Mbokosi ya Upangano. Fwandi imfwele izingi ni ng’ombe zyapeelwanga ukuya malambo icakuti zitaapenzilwe nu kupendwa.
6 Lyene ya simapepo yatwazile imbokosi ya upangano yakwe Yeova muno yalinzile ukuya, mu muputule wa mukasi sana, kuli kuti mu muputule wa Muzilo Sana, yaaisile umwisika lya maapa yakwe ya kelubi.
7 Fwandi maapa yakwe ya kelubi yavimvile incende apali Imbokosi ya Upangano, icakuti yacinzile Imbokosi ya upangano nu twa kuinyemwilako. 8 Twa kunyemwilako imbokosi ya upangano twali ututali sana icakuti nsongo zya tumiti tuto zyalolekanga nga umwi aali umu muputule wa Muzilo uwali pa nkoleelo ya muputule wa Muzilo Sana, lelo zitalolekanga panzi. Nupya akuno twaya ukufika na ndakai. 9 Mu Mbokosi ya Upangano mwali sile mawe yaili apapatane yano Mose wisilemo uku Holebu, lino Yeova wapangine upangano na Ina Izlaeli ala yakufuma umu mpanga ya Ijipti.
10 Lino ya simapepo yafumile umu ncende ya muzilo, ikumbi lyazuuzile umu ng’anda yakwe Yeova kumwi sile nu kunzi. 11 Ya simapepo yafizilwe ukutwalilila ukuombela umu ng’anda yakwe Yeova pano mwaziile ululumbi lwakwe Yeova. 12 Pa nsita iiya Solomoni watiile: “Yeova wewe walanzile ukuti ulikala umu mfinzi. 13 Inkukuulila ing’anda ikalamba incende apakuti uwaikala manda pe.”
14 Lyene umwene wapiliwike nu kutandika ukupaala uluko lwa Ina Izlaeli lonsi ala Aina Izlaeli yonsi iimilila. 15 Walanzile ati: “Si Yeova Leza wa Ina Izlaeli alumbanyiziwe, uwalavile ulayo kuli Devedi tata ukuomvya kanwa kakwe nupya uwatafikilizya ukuomvya ikasa lyakwe, uwalanzile ati, 16 ‘Kufuma pa wanda uno nafumizye antu yane Aina Izlaeli umu Ijipti, ntaatala nasoolola umusumba mu mitundu ya Ina Izlaeli yonsi umwa kukuulila ing’anda apa kucindikila izina lyane, lelo nasoolola Devedi kulatungulula antu yane Aina Izlaeli.’ 17 Nupya Devedi tata walondesyanga ukukuula ing’anda apa kucindikila izina lyakwe Yeova Leza wa Ina Izlaeli. 18 Lelo Yeova wanenyile Devedi tata ati, ‘Walondesyanga ukukuula ing’anda apa kucindikila izina lyane, nupya wacisile ningo pa kulondesya ukucita vivyo. 19 Lelo, asi wewe ulankuulila ing’anda, umwanako wino ulakwata aalakuula ing’anda apa kucindikila izina lyane.’ 20 Yeova wafikilizya vino walavile, pano napyana Devedi tata nu kwikala pa cilimba ca wene umu Izlaeli, wakwe viivi kwene vino Yeova walavile. Nupya inkuula ing’anda apa kucindikila izina lyakwe Yeova Leza wa Ina Izlaeli, 21 impekanya ni ncende apa kwika Imbokosi umwaya mawe ya upangano uno Yeova wapangine ni vikolwe vitu lino wavifumyanga umu mpanga ya Ijipti.”
22 Lyene Solomoni wimilile umupiipi nu ulambo wakwe Yeova pa nkoleelo ya Ina Izlaeli yonsi, nupya wakatwisye makasa umupela, 23 nupya walanzile ati: “We Yeova Leza wa Ina Izlaeli, kutaaya Leza uwaya wakwe wewe umwi yulu na pano nsi, wemuno ukasunga upangano nupya wemuno waya nu kutemwa kwa cumi uku yaomvi yako aakakuombela ni myenzo yao yonsi. 24 Wasunga ulayo uno walavile Devedi umuomvi wako nupya tata. Walavile ulayo kuomvya kanwa kako, nupya ilelo watuufikilizya ukuomvya ikasa lyako. 25 Acino we Yeova Leza wa Ina Izlaeli fikilizya ulayo uno walavile Devedi muomvi wako nupya tata lino walanzile uti: ‘Lyonsi umu lupwa lwako mulaaya uwa kwikala pa cilimba ca wene umu Izlaeli ndi cakuti ana yako yali ni miyele isuma wakwe vino waya.’ 26 Fwandi napaapata, we Leza wa Ina Izlaeli si fikilizya ulayo uno walavile Devedi muomvi wako nupya tata.
27 “Uzye Leza angikala pano nsi? Ndi cakuti iyulu ilitanga likukumane, uzye ing’anda ino inkuula i ngakukumana? 28 Fwandi we Yeova Leza wane, uvwa ipepo lya muomvi wako na kuli vino akupaapata, nupya uvwa kuli vino akulila ukuti umwazwe nu kwi pepo lino umuomvi wako akupepa ilelo. 29 Si uwalola ing’anda yii usiku nu musanya, incende ino walanzile uti, ‘Apalaya izina lyane,’ uwauvwa ni pepo lino umuomvi wako wapepa ala atalozya pa ncende yii. 30 Uwauvwa kuli vino umuomvi wako akupaapata na kuli vino antu yako Aina Izlaeli yakupepa ala iyalozya pa ncende yii nupya uwauvwa ukufuma ukwi yulu kuno ukaikala, uwauvwa nu kwelela.
31 “Ndi cakuti umwi wayembukila umuze nupya yamulapiisya,* lyene lino iyamulapiisya wiza kuli wewe pa nkoleelo ya ulambo wako umu ng’anda yii, 32 uce uwauvwa ukufuma ukwi yulu nu kupingula aomvi yako, kuli kuti kupingula uwa mulandu nu kumufulula alino nu kuleka uwa kaele nu kumulambula pali ukaele wakwe.
33 “Ndi cakuti antu yako Aina Izlaeli yacimviwa uku yalwani pa mulandu wakuti yakuyembukiile, nupya iiza kuli wewe nu kucindika izina lyako, lyene yapepela umu ng’anda yii nu kupaapata ukuti uyuvwile uluse, 34 uce uwauvwa ukufuma ukwi yulu nu kwelela antu yako Aina Izlaeli pa membu zino yacisile nupya uce uwayaswilizya uku mpanga ino wapeezile ivikolwe vyao.
35 “Ndi cakuti kwaya icilala pa mulandu wakuti aomvi yako yakuyembukiile nupya yapepa ala iyalozya uku ncende yii nu kucindika izina lyako, yata nu kucita imembu pa mulandu wakuti wayasalapwile, 36 uce uwauvwa ukufuma ukwi yulu nu kwelela aomvi yako Aina Izlaeli pa membu zyao pano ulayasambilizya ivisuma vino yalinzile ukulacita; nupya uce uyaletele imvula mu mpanga yako ino wayapeezile.
37 “Ndi cakuti kwaya icipowe, nanti nga kwaya icikuko, vilimwa nanti vimelwa vyuma, kwaya makanta; nanti nga alwani yao yayazanza umu musumba uli onsi mu mpanga nanti kwaya icikuko cili consi, 38 nanti antu yako yonsi Aina Izlaeli yapepa ipepo nanti ukupaapata (pano cila muntu wamanya icikamucuzya) ala iyakatusya makasa nu kulozya uku ng’anda yii, 39 lyene uce uuvwe kufuma ukwi yulu kuno wikala nu kuyelela alino nu kuombelapo ukulingana na vino umulandu uli; nupya uce upeele cila muntu icilambu kulingana ni milimo yakwe pano wamanya umwenzo wakwe (wewe sile wenga wamanya ningo imyenzo ya yantu yonsi), 40 pakuti yakutiina amanda yonsi yano yali nu umi umu mpanga ino wapeezile uku vikolwe vitu.
41 “Nupya ukulozya uku muntu aatafuma umu yantu yako Aina Izlaeli uwafuma uku mpanga ya kutali pa mulandu ni zina lyako 42 (pano yaluvwa pi zina lyako ilikalamba, pa ukulu wako na pa maka yako), uwiza nu kupepa ala watalozya uku ng’anda yii, 43 uce uuvwe ukufuma ukwi yulu kuno ukaikala, nu kucita vyonsi vino alakulenga pakuti antu yonsi umu nsi yace yamanye izina lyako nu kukutiina wakwe vino Aina Izlaeli antu yako yakacita, na pakuti yamanye ukuti ng’anda yii ino nakukuulila ikacindika izina lyako.
44 “Ndi cakuti watuma antu ukuli konsi ku kulwa na alwani yao, nupya yapepa kuli wewe we Yeova ala iyalozya uku musumba uno wasoolola nu ku ng’anda ino nakuula apa kucindikila izina lyako, 45 uce uuvwe ukufuma ukwi yulu nu kwasuka ipepo lyao na vino yakulenga nu kuyalwilako.
46 “Ndi cakuti yakuyembukila (pano kusi umuntu asiyembuka), nupya wayasokela sana nu kuyapeela uku yalwani yao, nayo yayasenda umu uzya ku mpanga yao, kutali nanti umupiipi; 47 nupya lino yali uku mpanga kuno yasenzilwe umu uzya iluka vino yacisile nu kuwela kuli wewe, nu kukupaapata iyati, ‘Ituyembuka nupya ituluvyanya; itucita iviipe,’ 48 nupya yawela kuli wewe ni myenzo yao yonsi lino yali uku mpanga ya yalwani yao kuno yasenzilwe umu uzya, lyene yapepa kuli wewe ala iyalozya uku mpanga yao ino wapeezile ivikolwe vyao nu ku musumba uno wasoolola nu ku ng’anda ino nakuula apa kucindikila izina lyako, 49 uce uuvwe ukufuma ukwi yulu kuno ukaikala nu kwasuka ipepo lyao na vino yakulenga nu kuyalwilako 50 nupya uce uwelele antu yako pali vino yakuyembukila, uce uyelele pa viipe vyonsi vino yakucitila. Uce uleke na ayasenda umu uzya yayuvwile uluse 51 (pano yene antu yako yano wafumizye umu Ijipti, muno yaculanga sana kwati yali umwi lungu lya moto). 52 Uwakutika lino umuomvi wako akulenga ukuti umuvwile uluse na lino antu yako Aina Izlaeli yakulenga ukuti uyuvwile uluse lyonsi lino yapepa kuli wewe. 53 Pano wayapaatula ukuya antu yako kufuma umu yantu yonsi amuno nsi, wakwe vino we Yeova Mwene wa Papelapela walanzile ukupitila muli Mose umuomvi wako lino wafumyanga ivikolwe vitu mu Ijipti.”
54 Lino Solomoni wamazile sile ukupepa kuli Yeova nu kupaapata, wakatwike pa nkoleelo ya ulambo wakwe Yeova pano wafukime ala watakatusya makasa umupela. 55 Lyene wimilile nu kupaala Aina Izlaeli yonsi umwi zwi likalamba ati: 56 “Alumbanyiziwe Yeova uwatalenga antu yakwe Aina Izlaeli ukupuuza wakwe vino walavile. Amazwi yonsi asuma yano walanzile ukupitila muli Mose umuomvi wakwe yafikiliziwe. 57 Si Yeova Leza witu aye naswe wakwe vino wali ni vikolwe vitu. Atatutazyela nanti ukutulekelezya. 58 Si atupeele umwenzo wa kulondesya ukumuombela pakuti twalondela masunde yakwe yano wapeezile uku vikolwe vitu. 59 Si Yeova aiusya amazwi yaa umusanya nu usiku, yano impaapata kuli Yeova Leza witu pakuti apingwilako umuomvi wakwe na Ina Izlaeli antu yakwe lyonsi lino calondekwa, 60 pakuti antu yonsi umu nsi yamanye ukuti Yeova ali Leza wa cumi. Kutaya muze! 61 Mwaombela Yeova Leza witu ni myenzo inu yonsi kupitila umu kulondela masunde yakwe, wakwe vino mukucita ilelo.”
62 Lyene umwene na Ina Izlaeli yonsi aali nawe yapeezile malambo aingi pa nkoleelo yakwe Yeova. 63 Malambo ya mutende yano Solomoni wapeezile kuli Yeova aeya: ing’ombe 22,000 ni mfwele 120,000. Fwandi umwene na Ina Izlaeli yonsi yapeezile ing’anda yakwe Yeova. 64 Pa wanda kwene uuwa umwene wasangulwile incende iyali pakasi ka musolo uwali pa nkoleelo ya ng’anda yakwe Yeova, pano paapa kwene apano wapeelile malambo ya koca, malambo ya vyakulya, na mafuta ya nyama yano wapeezile ukuya malambo ya mutende, pa mulandu wakuti ulambo wakwe koopa uwali pa nkoleelo yakwe Yeova utaali nu kukumana malambo ya koca, malambo ya vyakulya, na mafuta ya nyama apeezilwe ukuya malambo ya mutende. 65 Pa nsita kwene iiya, Solomoni wapanzile umutebeto pa nkoleelo yakwe Yeova pa manda 14 pamwi na Ina Izlaeli yonsi aafumile uku Lebo-hamati* kufika nu ku mukonko wa Ijipti. 66 Pa wanda uwalondelilepo* walesile kuti antu yapita, nupya yapaazile umwene nu kuswilila uku mang’anda yao ala iyasansamuka nupya iyatemwa pa visuma vyonsi vino Yeova wacitiile Devedi umuomvi wakwe na Ina Izlaeli antu yakwe.