Ezaya
58 “Pundisya na maka yako yonsi!
Pundisya kwati ukuomvya ipenga.
Nena antu yane pali ucipondoka wao,
Na amu ng’anda yakwe Yakobo pa membu zyao.
2 Cila wanda yakandonda,
Nupya yakalonda ukumanya ukulonda kwane,
Kwati uluko ulukacita ivilungame,
Nupya kwati yatasuula masunde yakwe Leza wao.
Yakalenga ukuti njapingule nu mulinganya,
Yakacita kwati yakulonda ukupalama kuli nene ala yakuti:
3 ‘U mulandu ci uno usilolela nga twafunga?
Nupya u mulandu ci uno usilolela nga twaya nu ulanda?’
A pa mulanda wakuti wanda uno mukufunga, mukakonkelela ivingamuzipila,
Nu kucuzya aomvi inu.
4 Uwanda winu uwa kufunga ukasila ala mukulemanila nu kulwa,
Nupya mukalwa ukuomvya makofi aipe sana.
Mutanga mufunge umu nzila yii alino mwenekele ukuti amazwi inu yamauvwika umwi yulu.
5 Uzye ukufunga kuno nkalonda avino kufwile ukuya,
Wa wanda uno umuntu ali nu ulanda,
Nu kwinamika umutwe wakwe wi sote ilitali,
Nu kulaala pa masaaka nu mwi twi?
Uzye ukufunga kuko ali kuno mungati kungazanzya Yeova?
6 Awe, kufunga kuno nkalonda aeku:
Ukwa kusapula maceni ya yantu aafyengwa,
Nu kusapula imyando ukwi yoko,
Nu kuleka ukuti aakucuziwa yaye nu untungwa,
Nu kukontola mayoko yonsi;
7 Ukwa kupeela ali ni nzala ivyakulya,
Kuleta apiina na aatakwata mang’anda mu mang’anda inu,
Nu kupeela wino mwalola akupita tupu ivyakuzwala,
Nu kukanalekelezya ya lupwa inu.
8 Lyene uluswepo lwinu lulayengesa wa kutunka kwi lanzi,
Nupya mulapola zuwa.
Ulungami winu ulamukoleelela,
Nu lulumbi lwakwe Yeova lulamucingilila.
9 Lyene mulama, nani ne Yeova ndasuka;
Mulalenga uwazwilizyo kuli nene, nani ndalanda inti, ‘Apano indi!’
Ndi cakuti mwafumya mayoko yano mwazwika antu inu
Nu kuta ukusontana iminwe nu kulanda mazwi aipe,
10 Nu kupeela aali ni nzala vino mwemwe kwene mwatemwa
Nu kwikusya aakucula,
Lyene uluswepo lwinu lulayengesa nu mu mfinzi kwene,
Mfinzi inu ilaya wa musanya pakasi.
11 Lyonsi ne Yeova ndaamutungulula
Nu kumupeela vino mukalondekwa nu mu mpanga iyume kwene;
Alamukomya,
Nupya mulaya wa calo icikontelelwe ningo,
Wa kafukoka kano manzi yasisila.
12 Yalamukuulila cipya cipya incende izyononike,
Mulakuula cipya cipya imifula iyononike pa myaka iingi sana.
Mulaamwa ukuti ya kalungisya ya viumba ivyononike,
Aakazifya imiseo pakuti antu yangikala umu mbali.
13 Ndi cakuti pa mulandu ni Sabata mwata ukulondela vino imyenzo inu ikalonda pa wanda wane uwa muzilo
Nupya mumalola uwanda wi Sabata ukuti uwanda wa kusansamuka, u wanda wa muzilo wakwe Yeova, wanda ucindame,
Nupya mwaucindika ukucila ukulalondela vino imyenzo inu ikalonda nu kulanda iviipe,
14 Lyene ne Yeova ndamulenga ukuya ni nsansa,
Ndalenga ukuti mwatungulula insi.
Ndalenga ukuti muipakizye mapaalo yakwe Yakobo icikolwe cinu,
Pano ne Yeova nene nalanda.”