Ezaya
51 “Uvwini kuli nene mwemuno mukalonda ulungami,
Mwemuno mukalonda Yeova.
Elenganyini pa ciliwe cino mwafumileko
Ni ciwina cino mwafumilemo.
2 Elenganyini pali Abulahamu tata winu
Na pali Sala uwamuviile.
Abulahamu wali sile wenga lino namwamile,
Nupya namupaazile nu kuvuzya ana yakwe.
3 Yeova alateekezya Zioni,
Alawezya ivintu vyakwe vyonsi ivyononeka,
Nupya alaleka ulwanga lwakwe luye wa calo ca Edeni
Ni ncende yakwe umutaaya icili consi ilaya wa calo cakwe Yeova.
Mu Zioni mulaya ukuzevya ni nsansa.
Kutaizya ni nyimbo izisuma.
4 Kutikini kuli nene mwe yantu yane,
Uvwini kuno, mwe luko lwane.
Pano masunde yalafuma kuli nene,
Nupya ndika umulinganya pa yantu wa luswepo.
5 Ulungami wane iupalama.
Ndamupususya,
Makasa yane yalapingula antu.
Ivilila vilataila muli nene,
Nupya vilalolela maka yane.
6 Lolini umwi yulu,
Mulolekesye nu mu nsi.
Iyulu lilasunguluka nu kusalangana wa cunsi;
Insi ilasila wa nsalu,
Nupya aakaikalamo yalafwa wakwe undu.
Lelo ukupususya kwane kulatwalilila ukuyako,
Nu ulungami wane utalasila.
7 Uvwini kuno mwemuno mwamanya ulungami,
Mwemuno mwakwata masunde yane umu myenzo inu.
Mutuvwa intete pa mulandu ni miponto ya yantu,
Nupya mutazakaza pa mulandu ni ntusi zyao.
8 Tupeepelya tulayalya wa cakuzwala;
Tupeepelya utukalya ivyakuzwala tulayalya wakwe kotoni.
Lelo ulungami wane ulayako manda pe
Nu kupususya kwane kulayako umu nkulo zyonsi.
9 Katuka! Katuka! Kwata maka,
We kasa lyakwe Yeova!
Katuka wakwe vino wacisile uku cisila, uku nkulo izyaliko mpiti.
Uzye asi wewe waputozile Lahabu* mu vipimfya,
Wemuno watotozile iciumbwa ica muli yemba?
10 Uzye asi wewe wakamizye yemba umuzike sana?
Nupya uzye asi wewe walenzile yemba umuzike ukuya umuseo pakuti antu yano wakulwile yalambe?
11 Antu yano Yeova wakulula yalawela.
Yaliza uku Zioni ala yali sana ni nsansa,
Nupya insansa zyao zitalasila.
Yalaazevya nu kusansamuka,
Ulanda nu kuloosya vilasila.
12 Nene nkumuteekezya.
U mulandu ci uno mungatiinila umuntu aakafwa
Nu mwana wa muntu aakauma wi sote iliteku?
13 U mulandu ci uno mukaililila Yeova Kaumba winu
Uwapanzile mayulu nu mufula wa nsi?
Uwanda onsi mwayanga ni ntete pa mulandu na aakumucuzya,
Kwati yangamulovya.
Uzye lyene ukali wao uli kwi?
14 Uwanyepwa umu maceni wasya asapulwe;
Atalafwa nu kuziikwa,
Nupya atalulizyapo ivyakulya.
15 Lelo nene Yeova Leza winu,
Aakasunkanya yemba nu kulenga maimbi aayamo ukupanga sano icongo,
Nene Yeova wa maumba.
16 Ndika mazwi yane umu kanwa kako,
Nu ku kuvimba ni cinzingwa ci kasa lyane,
Pakuti mayulu yayeko nu mufula wa nsi upangwe
Nu kunena antu ya mu Zioni ukuti, ‘Mwemwe yantu yane.’
17 Zyuka! Zyuka! Katuka we Yelusalemu,
Wemuno wamwa muli kapu wa ukali aali ukwi kasa lyakwe Yeova.
Wamwa ivyaya umu civiya;
Wamwa vyonsi ivyaya muli kapu ivikalenga umuntu ukupempezyoka.
18 Kusi umwana nanti a wenga apa yana aonsi yano wavyala aakukutungulula,
Nupya kusi umwana nanti a wenga apa yana aonsi yano wakuzya uwatakulema ikasa.
19 Kuli ivintu viili ivilakucitikila.
A weni aalalilila pamwi naawe?
Uwononesi na mazanzo, ni nzala nu lupanga!
A weni aalakuteekezya?
20 Ana yako yalafwa icipafi.
Yalalaala umu makoona yonsi aamiseo
Wa mfwele iya mpanga iyatilemya umwi sumbo.
Icipyu cakwe Yeova nu ukali wakwe Leza wako vyaya pali wewe.”
21 Fwandi uvwa kuno,
We mwanaci aakacuziwa nupya uwakoleka, nanti cakuti asi waini wino wakoleka.
22 Yeova Leza Umwene wako, aakacingilila antu yakwe walanda wati:
“Ndakupoka kapu aakalenga ukuti wapempezyoka,
Iciviya, kuli kuti kapu wa ukali wane;
Utalatala umwemo nupya.
23 Ndapeela kapu wiyo uku yantu aakakucuzya sana,
Aakunenyile iyati, ‘Laala pansi pakuti tupite pali wewe!’
Fwandi itundu lyako lyali wa musili,
Wa museo apakuti yaapita.”