Ibuku Lyakwe Ciili Lyakwe Samweli
13 Abusalomu mwana Devedi wakweti kaci wakwe umusuma uwi zina lyakuti Tamala, nupya Amunoni mwana Devedi watemilwe Tamala. 2 Amunoni wasakamile sana pa mulandu naTamala kaci wakwe cakuti wasusile alwala, pano Tamala wali a nacisungu nupya Amunoni atali nu kucita icili consi kuli aliwe. 3 Amunoni wakweti cuzakwe uwi zina lyakuti Yeonadabu, umwana wakwe Syimea, umwina wakwe Devedi; Yeonadabu wali u mucenjele sana. 4 Yeonadabu uzizye Amunoni ati: “U mulandu ci uno we mwana wa mwene ukulolekela umusakamale sana cila katondo? Neene icikukucuzya.” Amunoni wamwaswike ati: “Intemwa Tamala nkazi wakwe Abusalomu umwinane.” 5 Yeonadabu waswike Amunoni ati: “Ulale pa bedi nu kucita kwati watulwala. Ndi cakuti ya tata yako iza umu kukulola uyanene uti, ‘Lekini Tamala kaci wane aize ampekanyizizye ivyakulya. Ndi cakuti wiza wapekanya ivyakulya vya mulwale ale nkulolanako, namalya.’”
6 Fwandi Amunoni waizi nu kucita kwati watalwala, nu mwene waile umu kumulola. Amunoni wanenyile umwene ati: “Lekini Tamala kaci wane aize ampangile utumakeke twili ale nkulolanako pakuti indye.” 7 Lyene Devedi watumile akuyanena Tamala uku ng’anda ukuti: “Yanga uku ng’anda yakwe Amunoni solenzi ukamupekanyizizye ivyakulya.” 8 Fwandi Tamala waile uku ng’anda yakwe Amunoni isilenzi. Watozile umunya aukanda nu kupanga makeke ale Amunoni akulolanako. 9 Lyene Tamala watozile makeke nu kupeela Amunoni. Lelo Amunoni wakanyile ukulya nupya wanenyile yonsi ati: “Mwensi fumilini panzi!” Fwandi yonsi yafumile.
10 Lyene Amunoni wanenyile Tamala ati: “Ndetele ivyakulya ukukasi pakuti indye.” Fwandi Tamala watozile makeke yano wapanzile nu kutwalila Amunoni isilenzi ukukasi. 11 Lino Tamala watwaliile Amunoni ivyakulya kuti alye, wamulemile nu kumunena ati: “Iza ulaale nani.” 12 Nomba Tamala wamunenyile ati: “Awe kalume wane! Utanzewanya, pano icintu ca musango uu cisicitika umu Izlaeli. Utacita icintu cii ca winyi. 13 Uzye antu yalandola uli pa cintu cii ca muzewanya? Nupya Aina Izlaeli yalakusuula. Fwandi napaapata landa nu mwene pano atanga akane ukumpeela kuli wewe.” 14 Lelo Amunoni atuvwile kuli Tamala, nupya wamulemile uku maka nu kulaala nawe. 15 Lyene Amunoni watandike ukumupata icakuti wizile amupata sana ukucila vino wamutemilwe. Nupya Amunoni wanenyile Tamala ati: “Katuka; pitanga!” 16 Nomba Tamala wanenyile Amunoni ati: “Awe kalume wane, pano ukunzinga kwaipisya ukucila pali cino watucita kuli nene!” Lelo Amunoni wakanyile ukuvwa.
17 Lyene Amunoni wamile umuomvi wakwe nu kumunena ati: “Fumizya umuntu wii panzi, nupya uyale icisaasa nu kufungako.” 18 (Tamala wazwite ilaya iliiyele pano avino ya nacisungu ana ya yene yazwalanga.) Fwandi umuomvi wakwe Amunoni wafumizye Tamala panzi nu kufungako uku cisaasa. 19 Lyene Tamala wisile itwi pa mutwe nupya walepwile ilaya ilisuma lino wazwite; watandike ukupita ale watalema makasa pa mutwe nupya wafumile akulila.
20 Lino Abusalomu kalume wakwe wamuweni, wamuzizye ati: “Uzye ale a solenzi Amunoni uwatacita vivyo kuli wewe? Kaci wane suulako sile. Pano Amunoni a solenzi. Utasakamala pali cico.” Lyene Tamala wikazile wenga umu ng’anda yakwe Abusalomu kalume wakwe. 21 Lino umwene Devedi uvwile vyonsi ivyacitike, wasosile sana. Lelo atalondanga ukusosya Amunoni umwanakwe pano wamutemilwe pa mulandu wakuti u wali iyeli lyakwe. 22 Nupya Abusalomu atalanzile iciipe icili consi pali Amunoni nanti icisuma; pano Abusalomu wapasile Amunoni pa mulandu wakuti wazewanyizye Tamala kaci wakwe.
23 Lino papisile imyaka iili, aomvi yakwe Abusalomu yaile umu kupela imfwele zyakwe uku Baali-hazoli, apiipi ni mpanga ya Ina Efulemu, nupya Abusalomu wamile ana ya mwene yonsi aonsi. 24 Fwandi Abusalomu waile uku mwene nu kumunena ati: “Ne muomvi winu nkupela imfwele. Nkulenga ukuti tupite pamwi namwe pamwi na aomvi inu.” 25 Lelo umwene wanenyile Abusalomu ati: “Awe mwanane. Ndi cakuti twapita swensi, tumaya icisendo kuli wewe.” Nanti cakuti Abusalomu wapatikizyanga umwene, umwene wakanyile ukupita nawe, lelo wamupaazile. 26 Lyene Abusalomu walanzile ati: “Ndi cakuti mwemo mwakana ukupita nani, fwandi lekini tupite na Amunoni umwinane.” Umwene nawe uzizye Abusalomu ati: “U mulandu ci uno ukulonda ukupitila na Amunoni?” 27 Abusalomu wapatikizye umwene, suka umwene aleka Amunoni na ana ya mwene aonsi yonsi ukupita.
28 Lyene Abusalomu wanenyile aomvi yakwe ati: “Mwikeko sana mano, nupya ndi cakuti Amunoni wakoleka waini, namaiza imunene inti, ‘Komini Amunoni!’ Mwize mumukome. Mutuvwa intete. Pano ale nene imunena. Muye akome nupya musipe.” 29 Fwandi aomvi yakwe Abusalomu yacisile viivi kwene vino Abusalomu wayanenyile, lyene ana ya mwene asyala, yakwezile pali ya punda yao nu kuutuka. 30 Lino yacili umu nzila ilyasi lyafisile kuli Devedi ilyakuti: “Abusalomu watakoma ana ya mwene yonsi, kusi nanti awenga uwatapusuka.” 31 Lino umwene uvwile vivyo, walepwile ivyakuzwala vyakwe, nu kulaala pansi, na aomvi yakwe yonsi imilile umupiipi ala iyalepula ivyakuzwala vyao.
32 Lelo Yeonadabu umwana wakwe Syimea umwina wakwe Devedi walanzile ati: “Musambazi wane utelenganya ukuti ana yako yonsi iyafwa, Amunoni sile u watafwa. Abusalomu u wali walanda ukuti ciye vivyo, wakweti ipange lya kucita vivyo kufuma pano Amunoni wazewanyizye Tamala kaci wakwe. 33 Fwandi musambazi utika mano kuli vino antu yakulanda ukuti, ‘Ana ya mwene yonsi iyafwa’; Amunoni sile u watafwa.”
34 Alanga Abusalomu watautuka. Lyene umulinzi waweni antu aingi yakwiza umu museo uwali apiipi nu mwamba. 35 Lyene Yeonadabu wanenyile umwene ati: “Musambazi lola ana yako yawela, wakwe viivi kwene vino inalanda.” 36 Lino Yeonadabu wamazile sile ukulanda, ana ya mwene yafisile ala yakuloosya; umwene nawe kwene na aomvi yakwe yonsi yaloosizye sana. 37 Lelo Abusalomu utukiile kuli Talimai mwana Amiudi umwene wa ku Gesyuli. Devedi waloosizye umwanakwe pa manda aingi. 38 Lino Abusalomu utukiile uku Gesyuli, waile aikala kuuku kwene pa myaka itatu.
39 Lyene Umwene Devedi watandike ukuluuka Abusalomu pano alanga watateekeziwa uku mfwa yakwe Amunoni.