3 Yoani
1 Ne mukalamba nalembela Gayusi umutemwikwa, wino natemwa sana.
2 We mutemwikwa, nkupepa ukuti ivintu vyonsi vitwalilile ukukuzipila wakwe vino vikukuzipila ndakai. 3 Nasansamwike sana lino aina izile iyansimikila pa cumi cino waya naco, lino ukutwalilila ukuya umu cumi. 4 Kusi cuze icikansansamusya ukucila pa kuvwa ukuti ana yane yakutwalilila ukuya umu cumi.
5 We mutemwikwa, ukalanga ukuti wewe wa cumi muli vino ukacitila aina, nanti cakuti utayamanya. 6 Yasimika uku cilongano pali vino waya nu kutemwa. Nkukupaapata ukuti lino yakupita uwayazwa ukulingana na vino Leza akalonda. 7 Pano yapisile pa mulandu wi zina lyakwe, ukwaula ukusenda icili consi ukufuma uku yantu ya mu nsi. 8 Fwandi tulinzile ukupokelela antu ya musango uwo, pakuti twaombela pamwi nayo umu cumi.
9 Nalemvile vimwi uku cilongano, lelo Diotilefe, uwatemwa ukuya apa nkoleelo muli aliyo, asicindika icili consi icikafuma kuli sweswe. 10 Uli mulandu uno nga naca niza, ndiusya ivicitwa vyakwe, kuli kuti vino akasalanganya malyasi aipe pali sweswe. Asi cico conga, lelo akakana nu kupokelela aina umu mucinzi; nupya na aakulonda ukuyapokelela, akayalesya nu kuyazinga umu cilongano.
11 We mutemwikwa, utaakolanya akacita iviipe, lelo uwakolanya akacita ivisuma. Aakacita ivisuma wene u muntu wakwe Leza. Aakacita iviipe wene atamanya Leza. 12 Demetiliyo akasimikwa ningo uku yantu yonsi nupya cico casininkiziwa pa mulandu wakuti akaikala ukulingana ni cumi. Nupya naswe kwene tukasimika pali aliwe, nupya mwamanya ukuti vino tukasimika i vya cumi.
13 Nkweti ivingi ivya kukulembela lelo nsikulonda ukukulembela. 14 Lelo nkwenekela ukwizakulola zuwa, nupya tuli nu kwizalanzyanya naawe.
Mutende uye naawe.
Ya cuza yakulamuka. Undamukileko anji wenga na wenga.