1 Milandu

20 Pa kutandika kwa mwaka,* apa nsita ino ya mwene yakaya umu ulwi, Yoabu wasenzile asilika nu kuya onona impanga ya Ina Amoni; nupya waile azinguluka umusumba wa Laba ala Devedi watasyala umu Yelusalemu. Yoabu wazanzile umusumba wa Laba nu kuonona. 2 Lyene Devedi wazuzile Malikamu leza wa Ina Amoni cisote ca wene icafinyile italanti* lyonga lyakwe goldi, nupya cakweti mawe ya mutengo; nupya yazwisile Devedi cisote cico. Waposile ni vintu vingi kufuma umu musumba. 3 Nupya wasenzile antu aikalangamo nu kuleka ukuti yaomba umulimo wa kuputula mawe, nu kuomba imilimo ya kuomvya iviombelo vya cela ivikalipe ni mpasa. Vivyo kwene avino Devedi wacisile nu ku misumba yonsi ya Ina Amoni. Lyene waswilile uku Yelusalemu pamwi na asilika yonsi.

4 Pa cisila, nupya kwene ulwi wakatwike pa Ina Izlaeli na Ina Filisti uku Gezeli. Pa nsita kwene iiyo Sibekai Umwina Husya wakomile Sipai uwa mu lupwa lwa Ina Lefa nupya Aina Filisti yacimviwe.

5 Nupya kwene ulwi wakatwike pa Ina Izlaeli na Ina Filisti, nupya Elianani mwana Jaili wakomile Laimi umwina wakwe Golyati Umwina Gati uwali ni isumo ilyakweti icilemelo kwati icimuti cakwe ya kapikula.

6 Nupya kwene ulwi wakatwike uku Gati ukwali umuntu umwi uwali ipombolo, wakweti iminwe 6 ukwi kasa lyonga na lyonga, ni vikando 6 uku lwazo longa na longa, vyonsi pamwi vyali 24, nupya nawe kwene wali uwa mu lupwa lwa Ina Lefa. 7 Watwalilile ukutumfya Aina Izlaeli, fwandi Yonatani mwana Syimea umwina wakwe Devedi wamukomile.

8 Antu yaa yaali amu lupwa lwa Ina Lefa mu Gati, nupya Devedi na aomvi yakwe aayakomile.