Yelemiya

21 Yelemiya wapokelile mazwi kuli Yeova lino Umwene Zedekiya watumile Pasyuli mwana Malikiya na Zefaniya mwana Maaseya simapepo kuti yakamunene yati: 2 “Tupaapatileko kuli Yeova pano Umwene Nebukadineza uwa ku Babiloni akutulwisya. Limwi Yeova angaomvya maka yakwe nu kulenga Nebukadineza ate ukutuzanza.”

3 Yelemiya wayanenyile ati: “Mukanene Zedekiya muti, 4 ‘Yeova Leza wakwe Izlaeli walanda wati: “Nimalenga ivyanzo vya nkondo vino muli navyo, vino mukulwisizyako umwene wa ku Babiloni na Ina Kalideya aatiyazinguluka ilinga lya musumba winu viomviwe pali mwemwe kwene. Nupya ndavikolonganika pakasi ka musumba uu. 5 Nupya ndamulwisya ni kasa lyane ilikome nupya ilya maka ala insoka sana nupya indi ni cipyu. 6 Ndafulula antu ya mu musumba uu kumwi ni nyama. Antu yalafwa uku cikuko iciipisye kumwi ni nyama kwene.”’

7 “‘Yeova walanda wati: “Pa cisila cakwe cii, Umwene Zedekiya uwa ku Yuda na aomvi yakwe na antu amu musumba uu, kuli kuti aalapusuka uku cikuko, ku lupanga nu ku cipowe ndayapeela umu minwe ya Mwene Nebukadineza* uwa ku Babiloni nu mu minwe ya yalwani yao nu mu minwe yakwe yano yakulonda ukuyakoma. Alayakoma uku lupanga. Atalayalangulukilako nanti ukuya ni cikuuku kuli aliyo nanti ukuyuvwila uluse.”’

8 “Nupya antu yaa uce uyanene uti, ‘Yeova walanda wati: “Nimalenga kuti musoololepo pa nzila iya ku umi ni nzila iyaya uku mfwa. 9 Aalasyala umu musumba uu yalafwa uku lupanga, ku cipowe nu ku cikuko. Lelo wensi uwaitwala uku Ina Kalideya atiyamuzinguluka nu kuzala, alatwalilila ukuya nu umi nupya alapususya umi wakwe.”’

10 “‘Yeova walanda wati: “Inkana umusumba uu nupya iviipe vilaucitikila asi visuma foo. Ulapeelwa umu minwe ya Mwene wa ku Babiloni nupya alaoca.”

11 “‘Mwe ya mu ng’anda ya mwene wa ku Yuda: Uvwini vino Yeova akulanda. 12 Mwe ya mu ng’anda yakwe Devedi, Yeova walanda wati:

Namwe mwemuno mukalanda imuti: “A weni alatwizila?

A weni alatuzanza muno twikala?”