Obadiya
1 Icilolwa cino Obadiya* waweni:
Vii ali vino Obadiya walanda pa mazwi yakwe Yeova Umwene wa Papelapela ukulozya kuli Edomu, walanda wati:
“Ituvwa mazwi ukufuma kuli Yeova,
Inkombe yatitumwa uku yantu ya mu nko:
‘Katukini lekini tuipekanye umu kulwa na Edomu.’”
2 Leza walanda wati: “Lola! Inkulenga ukuya umucepesye sana umu yantu ya mu nko;
Wewe musuulwe sana.
3 Icilumba cako icikubepa,
Wemuno ukaikala umu ciliwe umucingililwe,
Ukaikala papela ala ukwelenganya ukuti,
‘A weni alamponya pansi?’
4 Nanti icakuti ungikala umupela* wakwe lyang’anda,
Nanti icakuti ungapangila icinsanzo umu ntanda,
Ndakuponya pansi,” avino Yeova walanda.
5 “Ndi cakuti ivipondo vizile kuli wewe usiku,
(Vingakonona icipisye!)
Na apuupu nga izile kuli wewe, uzye yatanga yiye sile vino yakulonda?
Nanti ndi cakuti aakakulula myangazi ali yano iizile kuli wewe,
Uzye yatanga yasye imyangazi imwi?
6 Iye mwe, iyazana ivyuma vyakwe Esau!
Nupya iyavisenda vyonsi!
7 Iyakuzinga umu mpanga yao.
Yonsi yano wapangana nayo icipangano iyakubepa.
Yano wikalanga nayo umu mutende iyakucimvya.
Antu yano ukalya nayo yalakuteya,
Lelo utaliluka.”
8 Yeova walanda wati: “Umu wanda uwa,
Ndonona antu ya mano amu Edomu
Nupya ndonona antu acenjele aakaikala umu myamba umu mpanga yakwe Esau.
9 We Temani, asilika yako yaluvwa intete,
Pano antu yonsi aikala umu myamba umu mpanga yakwe Esau yalakomwa.
10 Ulazewana pa mulandu nu unkalwe uno wacisile kuli Yakobo mutowako,
Nupya ulononwa manda pe.
11 Pa wanda uno wimilile katalamukila,
Pa wanda uno aenyi yasenzile asilika yakwe umu uzya,
Lino aku mpanga yuze iingile pa mpongolo nu kupendola pali Yelusalemu,
Wacisile kwati aliyo.
12 Utafwile ukusansamuka pa wanda uno iviipe vyacitikila umwinako,
Utafwile ukusansamuka pa wanda uno antu ya mu Yuda yononwa,
Nupya utafwile ukulanda ni cilumba pa wanda uno yaponelwa ni ntazi.
13 Utalinzile ukwingila umu musumba wa yantu yane pa wanda uno yaponelwa ni ntazi,
Utalinzile ukusansamuka pa ucuzi wao pa wanda uno yaponelwa ni ntazi,
Nupya utalinzile ukutola ivyuma vyao pa wanda uno yaponelwa ni ntazi.
14 Utalinzile ukwimilila pa mampatu pakuti ukome antu aakupuuka,
Nupya antu atiyapusuka, utalinzile ukuyatwala uku yalwani yao pa wanda uno yaponelwa ni ntazi.
15 Pano uwanda wakwe Yeova uwa kupingula inko zyonsi uli umupiipi.
Vino wacita, ivilakucitikila nawe kwene,
Vino wacitiile yauze, ivilakucitikila nawe kwene.
16 Wakwe vino mwamwela pa mwamba wane uwa muzilo,
Avino ni nko zyonsi zilatwalilila ukumwelapo.
Zilamwa nu kwikuta,
Nupya zilaya kwati zitatazile ziyeko.
17 Nupya pa Mwamba wa Zioni, palaya alapusuka,
Nupya ulaya uwa muzilo;
Na amu ng’anda yakwe Yakobo yalatola ivyuma vino vyali ivyao.
18 Amu ng’anda yakwe Yakobo yalaya wa moto,
Amu ng’anda yakwe Jozefu yalaya wa cimbilimbili,
Nupya amu ng’anda yakwe Esau yalaya wa vipelele, yalayasonteka nu kuyoca;
Nupya kutalaya alapusuka umu ya mu ng’anda yakwe Esau,
Pano Yeova umwineco u watavwanga.
19 Yalatola impanga ya Negebu ni mpanga ya myamba yakwe Esau,
Impanga ya Syefela ni mpanga ya Ina Filisiti.
Yalatola impanga ya Efulemu ni mpanga ya Samaliya,
Nupya Benjamini alatola impanga ya Gilyadi.
20 Azya aikala umwi linga,
Kuli kuti Aina Izlaeli, aalatola impanga ya Kenani ukufika nu ku Zalefati.
Nupya azya amu Yelusalemu, aikalanga umu Sefaladi, yalatola imisumba iya Negebu.
21 Nupya ya kapususya yalaya uku Mwamba wa Zioni
Ukuyapingula antu aikala umu mpanga ya myamba yakwe Esau,
Nupya Yeova aliwe alaya kateeka.”