Ezekeli
10 Lino ncili nkulolekesya, naweni cimwi papela ya mitwe yakwe ya kelubi icalolekanga wi we lyakwe safilo icakoline ni cilimba ca wene. 2 Lyene Leza wanenyile umonsi uwazwite ivyakuzwala ivisuma ati: “Yanga pakasi ka mateelo umwisika lyakwe ya kelubi, ukatole malasya aakwaka pakasi kakwe ya kelubi ukuomvya makasa yako yoili nu kuyasumbila umu musumba.” Fwandi wacisile vino wamunenyile ala nkulolako.
3 Lino umonsi wingiile umwi tempele wazanyile ya kelubi iimilila ukwi lunji ni kumbi lyazuuzile umu musolo wa mukasi. 4 Nupya ululumbi lwakwe Yeova lwafumile pali ya kelubi iluya pa mulyango wi tempele, ni kumbi lyatandike ukuzuula panono panono umwi tempele, nupya pa musolo pali uluswepo lwa lulumbi lwakwe Yeova. 5 Icongo ca maapa yakwe ya kelubi cuvwikanga umu musolo wa kunzi, wakwe vino Leza wa maka yonsi akauvwika nga akulanda.
6 Lyene wanenyile umonsi uwazwite ivyakuzwala ivisuma ati: “Katole umoto pakasi ka mateelo pakasi kakwe ya kelubi,” nawe wingiile aya aimilila uku mbali iiteelo. 7 Lyene kelubi wenga watwazile ikasa lyakwe lwa ku moto uwali pakasi kakwe ya kelubi. Watozile umoto umwi nu kwika umu minwe ya monsi uwazwite ivyakuzwala ivisuma, nawe wausenzile nu kupita. 8 Ya kelubi yakweti ivyalolekanga wa makasa ya muntu mwisika lya maapa yao.
9 Lyene naweni mateelo 4 mu mbali yakwe ya kelubi, cila teelo lyali umupiipi na kelubi nupya mateelo yayengesanga wi we lyakwe kilisoliti. 10 Mateelo yonsi 4 yalolekanga icili cimwi, yalolekanga kwati iteelo lyonga ilicingaana umu lyuze. 11 Lino yakupita yayanga uku ntunga ili yonsi ukwaula ukukoneka, yayanga kuno icinso icilozya ukwaula ukukoneka. 12 Mili yao, matundu, makasa, na maapa vyakweti manso monsi monsi, kumwi sile na mateelo yonsi 4. 13 Lyene nuvwile izwi likunena mateelo likuti, “Mwe mateelo tandikini ukupita!”
14 Cila wino* wakweti vinso 4. Ica kutandikilapo cali icinso cakwe kelubi, cakwe ciili cali ica muntu, cakwe citatu cali cakwe cisama, na cakwe 4 cali cakwe lyang’anda.
15 Nupya ya kelubi yakatukanga—yaali ali viumbwa vya umi vino naweni uku luzi lwa Kebali— 16 lino ya kelubi yapita, mateelo yapitilanga pamwi nayo; lelo lino ya kelubi yakatusya maapa kuti yaye umupela, mateelo yene yatakonekanga nanti ukusunkaana. 17 Ndi cakuti vya umi vimilila mateelo nayo kwene imililanga; ndi cakuti vyakatuka, mateelo nayo kwene yakatukanga, pano umupasi uwatungululanga ivya umi wali nu mu mateelo kwene.
18 Lyene ululumbi lwakwe Yeova lwafumile pa mulyango wi tempele nu kuyaikala papela yakwe ya kelubi. 19 Ya kelubi yakatwisye maapa nu kuya umupela ala nkulolanako. Mateelo yakatukiile pamwi nayo. Yaile iimilila uku mpongolo ya pa ng’anda yakwe Yeova iyali uku ufumondaka nupya lulumbi lwakwe Leza wakwe Izlaeli lwali papela yao.
20 Vii ali viumbwa vya umi vino naweni umwisika lyakwe Leza wakwe Izlaeli ku luzi lwa Kebali, lyene nizile iniluka ukuti aakelubi. 21 Vyonsi kwene 4 vyakweti vinso na maapa 4, ni vyalolekanga wa makasa ya muntu mwisika lya maapa. 22 Vyakweti vinso wakwe vino naweni umupiipi nu luzi lwa Kebali. Vyonsi vyayanga sile inkoleelo.