Ezekeli

46 “Yeova Umwene wa Papelapela walanda wati: ‘Impongolo ya mu musolo wa mukasi iyalozya uku ufumondaka ilinzile ukuyalwa pa manda 6 aakuomba, lelo pa wanda wi Sabata na pa wanda wa mwezi upya ilinzile ukuyulwa. 2 Intunguluzi ilaafuma umu musolo wa kunzi nu kwingilila pa kamuputule ka pa mpongolo iimilila na pa mulyango. Ya simapepo yalaapeela malambo ya koca na malambo ya mutende yano intunguluzi ilaapekanya. Nupya intunguluzi ilaafukama umupiipi ni mpongolo alino ifuma. Lelo impongolo italinzile ukuyalwa kufika manguzi. 3 Antu ya mu mpanga nayo kwene yalaafukama pa nkoleelo yakwe Yeova pa mpongolo pa wanda wi Sabata na pa myezi ipya.

4 “‘Ilambo lya koca lino intunguluzi ilaapeela kuli Yeova pa wanda wi Sabata lilinzile ukuya imfwele izinono izya kalume 6 na suuku wenga. 5 Lino akupeela suuku alinzile ukwikapo na makilogilamu 11 angaano ni vili vyonsi vino angapeelela pamwi ni mfwele izya kalume, kumwi na malita yatatu na afu aamafuta lyonsi lino wapeela makilogilamu 11 angaano. 6 Pa wanda wa mwezi upya alinzile ukupeela cipambasi umusuma, imfwele izinono izya kalume 6, na suuku; vyonsi kwene vilinzile ukuya ivisuma. 7 Alinzile ukupeela makilogilamu 11 angaano pali cipambasi wenga, na makilogilamu 11 angaano pali suuku, na vyonsi vino angapeela pa mfwele izinono izya kalume. Nupya alinzile ukupeela malita yatatu na afu aamafuta lyonsi lino wapeela makilogilamu 11 angaano.

8 “‘Lino intunguluzi ikwingila, ilinzile ukwingilila pa kamuputule ka pa mpongolo nupya apano ilinzile ukufumila. 9 Lino antu ya mu mpanga iza umu kupepa pa nkoleelo yakwe Yeova umu nsita ya mutebeto, aingilila uku mpongolo ya ku katutu yafwile ukufumila uku mpongolo ya ku kaeya, na aingilila uku mpongolo ya ku kaeya yalinzile ukufumila uku mpongolo ya ku katutu. Kusi alinzile ukufumila kuno wali wingilila, cila muntu alinzile ukufumila pa mpongolo ino watalozyanya nayo. 10 Ndi cakuti ingila, intunguluzi nayo kwene ifwile ukwingila, nupya nga yafuma, nayo kwene ifwile ukufuma. 11 Mu nsita ya mitebeto iikayako lyonsi ni mitebeto yuze kulinzile kwaya ukupeela makilogilamu 11 angaano pali cipambasi wenga, na makilogilamu 11 angaano pali suuku wenga, na vyonsi vino umuntu angapeela pa mfwele izinono izya kalume, nupya alinzile ukupeela malita yatatu na afu aamafuta lyonsi lino wapeela makilogilamu 11 angaano.

12 “‘Ndi cakuti intunguluzi yapekanya ilambo lya koca nanti malambo ya mutende ukuya upe wa kuitemelwa kuli Yeova, ilinzile ukuyulilwa impongolo iyalozya uku ufumondaka, nupya ilinzile ukupekanya ilambo lya koca na malambo ya mutende wakwe vino ikacita pa wanda wi Sabata. Ndi cakuti yafuma, impongolo ilinzile ukuyalwa.

13 “‘Cila wanda ulinzile ukupekanya imfwele ya kalume inono nupya isuma iili nu mwaka onga iya kupeela ngi lambo lya koca kuli Yeova. Ufwile ukulacita vikwene cila katondo. 14 Nupya cila katondo ulinzile ukulapekanya makilogilamu yaili angaano aakupeela ngu upe wa vyakulya, alino na mafuta aacizile panono pali lita wenga aakusansa pali fulaulo umusuma uwa kupeela ukuya upe wa vyakulya kuli Yeova. Lii i sunde lya manda pe. 15 Cila katondo yalinzile ukupekanya imfwele iya kalume inono, upe wa vyakulya na mafuta ivya kupeela ngi lambo lya koca lyonsi.’

16 “Yeova Umwene wa Papelapela walanda wati: ‘Ndi cakuti umuntu aakaomba ngi ntunguluzi wapeela ica upe kuli cila mwana umonsi wino wakwata kuti ciye ica upyanyi, cilaya i ca yana yakwe. I ca upyanyi cao. 17 Lelo ndi cakuti watola ica upe ukufuma pa ca upyanyi cakwe nu kupeela umuomvi wakwe, cilaya i ca muomvi wakwe ukufika umu mwaka wa kukululwa; lyene alaswilizizya intunguluzi. Suka sile ica upyanyi cino wapeela ana yakwe cene cilatwalilila ukuya i ca yana vivyo kwene. 18 Intunguluzi italinzile ukupokolola impanga iya yantu uku maka. Muntu wiyo intunguluzi alinzile ukupeela ana yakwe ica upyanyi ukufuma pa mpanga yakwe, pakuti kutaya ali wensi umu yantu yane uwa kuzingwa umu mpanga yakwe.’”

19 Lyene wanjingizye umukasi ukuomvya umulyango uwali umupiipi ni mpongolo iya kuyila uku miputule ya kuliilamo iya muzilo yakwe ya simapepo iyalozizye uku katutu, nupya ukwi tundu lya miputule iiyo lwa ku uwondaka, naweni incende imwi. 20 Wanenyile ati: “Pa ncende yii apano ya simapepo yalaelekela malambo ya pa mulandu na malambo ya pa luyembu nu kupekanyizizyapo malambo ya vyakulya, pakuti yataca yaatwala icili consi uku musolo wa kunzi nu kulenga antu ukuya aamuzilo.”

21 Wantwazile uku musolo wa kunzi nu kumpisya umu makoona 4 aamusolo, nupya naweni umusolo umupiipi na cila koona iya musolo wa kunzi. 22 Pa makoona 4 aamusolo pali utumisolo utunono utwali mamita 18 umu utali na mamita 13 umu wipi. Tonsi kwene 4 twali utulingane. 23 Tumisolo tuu twazingulwikwe ni viumba iviipi, nupya umwisika lya viumba mwali incende zino yapanzile apa kwelekela malambo. 24 Lyene wanenyile ati: “Muu ali muno aomvi ya pi tempele yakaelekela malambo yano antu yalapeela.”