Mapinda
24 Utauvwila antu aipe uzuwa,
Nupya utakumbwa ukuya pamwi nayo.
2 Myenzo yao ikalanga ivya unkalwe,
Ni milomo yao ikalanda pa kucitila yauze iviipe.
3 Ing’anda ikakuulwa pa mulandu na mano,
Nupya ikacingililwa pa mulandu nu kwiluka.
4 Pa mulandu nu kumanya, mu miputule ya mu ng’anda iiyo
Mukazuula ivintu vipusanepusane ivya mutengo nupya ivisuma.
5 Umuntu wa mano wakwatisha amaka,
Nupya pa mulandu nu kumanya, umuntu akakwatilako amaka.
6 Ungacimvya ulwi ndi cakuti walondela utunguluzi wa mano,
Nupya ukuli ya mpandamano aingi kukaya ukucimvya.
7 Umuwelewele atanga akwate amano ya cumi;
Atanga alande icili consi pa mpongolo ya musumba.
8 Wensi aakapanga ukucita iviipe
Alaamwa ukuti umwineco wa mapange aipe.
9 Mapange ya uwelewele u luyembu,
Nupya antu yapata umuntu wa mitumfyo.
10 Ndi cakuti watoovoka umu nsita ya ntazi,
Amaka yako yalacepa.
11 Pusushini yano yakutwala uku mfwa,
Nu kupususha aakuya umu kukomwa.
12 Ndi cakuti mwalanda mwati, “Tutaamanyile cii,”
Uzye aakaceceta imyenzo ataliluka?
Leza aakamulola alamanya
Nupya alalambula umuntu wensi ukulingana ni vicitwa vyakwe.
13 Mwanane uwalya uci pano usuma;
Uci wa kwi lela walyompa.
14 Manya ukuti vikwene avino na mano yazipa kuli wewe.
Nga wayazana ivintu vilakuzipila uku nkoleelo nupya ulatwalilila ukuya nu upaalilo.
15 Utaateyamila umupiipi ni ng’anda ya mulungami ni pange iliipe;
Utaonona incende yakwe apa kupuuzila.
16 Umulungami angapona imiku 7 nu kukatuka nupya,
Lelo umwipe alapumika umu nsita ya ntazi.
17 Umulwani wako nga wapona utalinzile ukusansamuka,
Nupya ndi cakuti wapumika utalinzile ukusansamuka;
18 Pano Yeova alalola nupya alasoka,
Alafumya ni cipyu cakwe pali aliwe.*
19 Utaasoka pa mulandu na antu aipe;
Nupya utauvwila antu aipe uzuwa.
20 Pano antu aipe yonsi ivintu vitalayazipila uku nkoleelo;
Lampi wa yantu aipe yalamuzimya.
21 Mwanane uwaopa Yeova nu Mwene.
Nupya utauvwana na ya cipondoka,
22 Pano intazi iliza pali aliyo ukwaula ukwenekela.
A weni amanyile uononesi uno yoili* yalaleta pali aliyo?
23 Mazwi yaa nayo kwene aamuntu wa mano, aakuti:
Ukuya na kapaatulula pa kupingula kutazipa.
24 Wensi uwanena umwipe wati, “Wewe mulungami,”
Antu yalamutiipa nupya inko zilamukaana.
25 Lelo yayo akumusunda;
Yalapokelela ivintu visuma.
26 Antu yalatonsola imilomo ya muntu akaasuka umu cisinka.
27 Inkoleelo uombeshe umu vyalo vyako, nupya ulime;
Alino ukuule ing’anda.
28 Utasinila umuzo lino utakweti ivisinka.
Utabepa auzo.
29 Utaalanda uti: “Ndacita kuli aliwe wakwe vino watacita kuli nene;
Ndamupezya pali vino wacisile.”
30 Napisile umupiipi ni calo ca mukasu,
Mupiipi ni calo ca myangazi ica muntu aatakwata mano.
31 Naweni ukuti mu calo consi mwamezile ivikoona;
Musili onsi wakweti imyunga,
Ni linga lya mawe ilyazingulwike icalo cico lyaongolwike.
32 Nalolekishe ivintu vii nupya navisunzile umu mwenzo;
Naweni nupya vino nasambilileko aevi:
33 Nga wati ndaaleko panono, nsipuleko panono,
Njipete makasa pakuti mpuuzeko panono,
34 Upiina uliza pali wewe kwati icipondo,
Ni vyuma vyako vilaya kwati umuntu aali ni vyanzo.