1 Yamwene
13 Yeova watumile umuntu wakwe ukufuma uku Yuda kuya uku Betele ala Yeloboamu aimi umupiipi nu ulambo akupeela ilambo lya koca. 2 Lyene wapunzile uku ulambo ukulingana na vino Yeova wamunenyile ati: “We ulambo, we ulambo! Yeova walanda wati: ‘Lola! Umwana umonsi uwi izina lyakuti Yosiya alavyalwa umu ng’anda yakwe Devedi! Alapeelela ya simapepo pali wewe aakaombela pa ncende izikalolwa ukuti izya muzilo, kuli kuti aakapeela malambo ya koca pali wewe, nupya pali wewe apano alocela mafupa ya yantu.’” 3 Pa wanda kwene uuwa umuntu wakwe Leza walanzile pa cizungusyo icali nu kucitika ati: “Cizungusyo cino Yeova watalanda aeci: Lola! Ulambo umalepuka ni itwi limasalangana.”
4 Lino umwene Yeloboamu uvwile sile mazwi yano umuntu wakwe Leza wa cumi walanzile uku ulambo ku Betele, wakonzolwile ikasa ukufuma uku ulambo nu kulanda ati: “Mulemini!” Lilyo kwene ikasa lino wakonzolwile lyumile nupya wafizilwe ukuliwezya. 5 Lyene ulambo walepwike ni itwi ilisalangana kulingana na vino Yeova walanzile ukupitila umu muntu wakwe.
6 Umwene wanenyile umuntu wakwe Leza wa cumi ati: “Nkulenga umpaapatileko kuli Yeova Leza wako nupya umpepeleko pakuti ikasa lyane lipole.” Nawe wamupaapatileko kuli Yeova, nupya ikasa lya mwene lyawezile vino lyali. 7 Lyene umwene wanenyile umuntu wakwe Leza wa cumi ati: “Twapita uku ng’anda ukalye ivyakulya, nkakupeele ni ca upe.” 8 Lelo umuntu wakwe Leza wa cumi waswike umwene ati: “Nanti cakuti wampiile afu wi sano lyako, ntanga mpite naawe umu kulya umukate nanti ukumwa manzi umu ncende yii. 9 Pano Yeova wanenyile ati: ‘Utaca ulye ivyakulya nanti ukumwa manzi, nupya utaca uweluluke ukuomvya inzila ino ulaomvya pa kuya.’” 10 Fwandi wapisile ukuomvya inzila yuze, ataawezile ukuomvya inzila ino wapisilemo pa kuya uku Betele.
11 Kwali kasesema umwi umukote uwikalanga umu Betele, nupya anakwe aonsi yaile iyamunena vyonsi vino umuntu wakwe Leza wa cumi wacisile umu Betele uwanda uuwa, na vino wanenyile umwene. Lyene pa cisila, 12 isi wayuzizye ati: “I nzila ci ino wataomvya?” Anakwe yamulanzile inzila ino umuntu wakwe Leza wa cumi uwafumile uku Yuda waomvizye. 13 Lyene wanenyile anakwe ati: “Mpekanyizizyini punda.” Nayo yamupekanyizizye punda nupya wakwezilepo.
14 Wakonsile umuntu wakwe Leza wa cumi nupya waile amuzana umwisika lya cimuti. Lyene wamuzizye ati: “Uzye wewe uli muntu wakwe Leza wa cumi uwafumile uku Yuda?” Nawe waswike ati: “Ee a nene kwene.” 15 Wamunenyile ati: “Twapita uku ng’anda ukalye ivyakulya.” 16 Nawe wamunenyile ati: “Ntanga nswilile pamwi naawe nanti ukuya uku ng’anda ukwako, nupya ntanga indye ivyakulya nanti ukumwa manzi pamwi naawe uku ncende yii. 17 Pano Yeova wanenyile ati: ‘Utaca ulye ivyakulya nanti ukumwa manzi. Nupya utaca uweluluke ukuomvya inzila ino ulaomvya pa kuya.’” 18 Nawe wamunenyile ati: “Nani kwene nene kasesema wakwe wewe, nupya Yeova watanena ukupitila muli malaika ati, ‘Umulete uku ng’anda ukwako pakuti alye ivyakulya nu kumwa manzi.’” (Nomba wamubefile.) 19 Fwandi wapisile nawe uku ng’anda ukwakwe mu kulya ivyakulya nu kumwa manzi.
20 Walanga yacili yakulya ivyakulya, Yeova walanzile kuli kasesema uwamuwezizye, 21 nupya wanenyile umuntu wakwe Leza wa cumi uwafumile uku Yuda ati, “Yeova walanda wati: ‘Pa mulandu wakuti utuvwilile Yeova nupya utalondiile vino Yeova Leza wako wakunenyile, 22 lelo watuswilila umu kulya ivyakulya nu kumwa manzi ku ncende ino nakunenyile ukuti, “Utaca ukalye ivyakulya nanti ukumwa manzi,” utalaziikwa umu ncende ino ivikolwe vyako vyazikwamo.’”
23 Pa cisila cakuti muntu wakwe Leza wa cumi walya nu kumwa, kasesema umukote wamupekanyizizye punda. 24 Lyene wakatwike atwalilila nu ulendo, lelo cisama wamutenzile umu museo nu kumukoma. Citumbi cakwe cali umu museo nupya punda wimilile umupiipi ni citumbi; na cisama kwene wimilile umupiipi ni citumbi. 25 Kwali aonsi aapitanga aaweni icitumbi ala cili umu museo ala na cisama ataimilila umupiipi naco. Yaile umu musumba umwikalanga kasesema umukote nu kusimika vino yaweni.
26 Lino kasesema uwamuwezizye ukufuma umu museo uvwile ilyasi lilyo, lilyo kwene sile walanzile ati: “U muntu wakwe Leza wa cumi aataali uvwila vino Yeova wamunenyile; fwandi Yeova watamutumila cisama pakuti amucise nu kumukoma, kulingana na vino Yeova walanzile.” 27 Lyene wanenyile anakwe ati: “Mpekanyizizyini punda.” Nayo yamupekanyizizye. 28 Lyene wapisile aya azana citumbi cili umu museo, nupya punda na cisama vyaimi umupiipi naco. Cisama ataalile icitumbi nanti ukucisa punda. 29 Kasesema wanyemwile icitumbi ca muntu wakwe Leza wa cumi nu kucika pali punda, nupya waciwezizye umu musumba wakwe pakuti yaloosye nu kumuziika. 30 Fwandi wisile icitumbi umwi lindi lyakwe, nupya yatwalilile ukuloosya iyati: “Iye caipa mwinane!” 31 Pa cisila ca kumuziika, wanenyile anakwe ati: “Nga naca nafwa, muce munziike pano umuntu wakwe Leza wa cumi wataziikwa. Muce muleke mafupa yane yaye umupiipi na mafupa yakwe. 32 Amazwi yakwe Yeova yano walanzile ukulozya uku ulambo wa mu Betele nu kulozya uku mang’anda yonsi akupepelamo aaya pa ncende izikalolwa ukuti izya muzilo mu misumba ya mu Samaliya yalafikiliziwa.”
33 Na lino vii vyacitike, nalyo kwene Yeloboamu watwalilile ukucita iviipe, nupya wasontanga ya simapepo ukufuma umu yantu yonsi aakuti yaombela pa ncende izyalolwanga ukuti izya muzilo. Wasontanga ali wensi ukuya simapepo ala akuti: “Lekini aye simapepo uwa kulaombela pa ncende zya muzilo.” 34 Luyembu luu luno amu ng’anda yakwe Yeloboamu yaacisile lwalenzile ukuti yononwe.