Kasambilizya
3 Icintu consi cakwata insita,
Insita ino icili consi cikacitikilapo umu nsi:
2 Kwaya insita ya kuvyalwa ni nsita ya kufwa;
Insita ya kulemeka ni nsita ya kwipula icalemilwe;
3 Insita ya kukoma ni nsita ya kupozya;
Insita ya kuwisha ni nsita ya kukuula;
4 Insita ya kulila ni nsita ya kuseka;
Insita ya kuloosha ni nsita ya kucina;
5 Insita ya kusumba mawe ni nsita ya kuyakolonganika;
Insita ya kukumbatana ni nsita isi ya kukumbatana;
6 Insita ya kulonda icaticiponga ni nsita ya kuta ukucilonda;
Insita ya kusunga cimwi ni nsita ya kucisumba;
7 Insita ya kulepula ni nsita ya kusuma;
Insita ya kuya mya ni nsita ya kuvwanga;
8 Insita ya kutemwa ni nsita ya kupata;
Insita ya nkondo ni nsita ya mutende.
9 I vyani vino umuomvi akazanamo umu kuombesha kwakwe? 10 Nalola umulimo uno Leza wapeela antu uwakuti yaomba lyonsi. 11 Wapanga ivintu visuma pa nsita ilinge. Wika ni nsita ya manda pe umu myenzo yao; lelo antu yatalatala yamanye vino Leza wa cumi wacita ukufuma pa kutandika ukufika pa kumalilila.
12 Niluka ukuti kutaaya icisuma uku yantu ukucila pa kusansamuka nu kucita ivisuma mu manda yano yali nu umi, 13 nu kuti umuntu wensi alinzile ukulya nu kumwa nu kusansamukila umu kuombesha kwakwe konsi. Cii i ca upe ukufuma kuli Leza.
14 Namanya ukuti vyonsi vino Leza wa cumi akacita vilatwalilila ukuyako amanda pe. Kutaya ica kulundako kuli vino Leza wapanga nanti ca kufumyako. Leza wa cumi walenga ukuti ciye vivyo pakuti antu yamoopa.
15 Consi icikucitika catala cacitikapo, ni ciliza catala cayako; lelo Leza wa cumi akalonda cino antu yakazinganya.*
16 Nupya nalola icintu cii umu nsi: Apaalinzile ukuya umulinganya paali viipe, na paalinzile ukuya ulungami paali viipe. 17 Fwandi nelenginye inti: “Leza wa cumi alapingula yonsi kwene alungami na aipe, pano icintu consi nu mulimo onsi vyakwata insita.”
18 Nupya nelenginye pa yantu yano Leza wa cumi aleezya nu kuleka yaloleke kwati inyama, 19 pano kwaya icikacitikila antu ni nyama; icikacitikila vyonsi i cili cimwi. Vino inyama ikafwa avino nu muntu akafwa; vyonsi vyakwata umupasi uuli umwi. Fwandi umuntu ataacila inyama pano vyonsi kwene i vya sile sile. 20 Vyonsi vikaya ukuli kumwi. Vyonsi vikafuma uku lukungu, nupya vyonsi vikaswilila uku lukungu kwene. 21 Uzye a weni angamanya ndi cakuti umupasi wa yantu ukaaya ukupela nupya ndi cakuti umupasi wa nyama ukatentemukila umu musili? 22 Nupya naweni ukuti kusi icili consi icingazipa uku muntu ukucila ukusansamukila umu mulimo wakwe, pano cico kwene ali cilambu cakwe; pano a weni aangalenga umuntu wiyo ukumanya ivilacitika ndi cakuti wafwa?