Milimo ya Atumwa
18 Lyene Paulo wafumile uku Atena aya uku Kolinto. 2 Nupya wazanyile Umuyuda umwi uwi zina lyakuti Akwila uwavyalilwe umu Ponto, ala alino wacifumile uku Itali pamwi na mamakwe Pulisila, pano Klaudi wanenyile Ayuda yonsi ukufuma umu Loma. Fwandi Paulo waile kuli aliyo, 3 nupya vino yaombanga umulimo uli umwi, wikazile pamwao ala akuomba nayo, pano yaombanga umulimo wa kupanga matenti. 4 Lyonsi pa wanda wi sabata walandanga ilyasi* umwi sunagogi,* nupya wasinilanga Ayuda na Agiliki pakuti yazumile vino akulanda.
5 Lyene lino Sailasi na Timoti izile ukufuma uku Makedoniya, Paulo watandike ukuomvya insita yakwe yonsi uku kusimikila, ala akusinila Ayuda ukuti Yesu ali Klistu. 6 Lelo lino antu yatwalilile ukumukaanya nu kumupontela, wakunsile ivyakuzwala vyakwe nu kuyanena ati: “Lekini uwazi winu uye pa mitwe inu. Nemo nene wa kaele. Nupya ukufuma ndakai namaya uku yantu amu nko.” 7 Acino wafumileko nu kuyaingila umu ng’anda yakwe Tito Yusito kapepa wakwe Leza, wino ing’anda yakwe yali apiipi ni sunagogi. 8 Lelo Klisipa umukalamba wi sunagogi wataile umu Mwene kumwi na amu ng’anda yakwe. Nupya antu aingi amu Kolinto auvwile yataile nu kubatiziwa. 9 Nupya Umwene walanzile kuli Paulo umu cilolwa usiku ati: “Utatiina, lelo twalilila ukulanda ukwaula ukuta, 10 pano indi naawe nupya kusi umuntu ali wensi alakucisa; pano nkweti antu aingi mu musumba uu.” 11 Fwandi wikazile kuuku kwene pa mwaka onga ni myezi 6 ala akuyasambilizya izwi lyakwe Leza.
12 Lino Galio wali umulasi* mu Akaya, Ayuda yakatukile Paulo nu kumutwala uku cilimba ca upinguzi, 13 ala yakuti: “Umuntu wii akutunka antu kuti yapepa Leza umu nzila ipusane ni sunde.” 14 Lelo lino Paulo walondanga ukuvwanga, Galio wanenyile Ayuda ati: “Mwe Yayuda, ndi cakuti umuntu wii wacita cimwi ciipe nanti ukutama isunde, ngi inuvwa kuli mwemwe. 15 Lelo nga mukupaazyanya pa mazwi, pa mazina na pa masunde inu, mwemwe kwene mumamanya ivya kucita. Nsikulonda ukupingula pa vintu vii.” 16 Lyene wayazinzile ukufuma pa cilimba ca upinguzi. 17 Lyene yonsi yalemile Sositeni umukalamba wi sunagogi nu kutandika ukumuma pa nkoleelo ya cilimba ca upinguzi. Lelo Galio wene atiingilemo mu vintu vii vyonsi.
18 Lelo pa cisila ca kwikala kuuku manda aingi, Paulo wapakisye aina nu kukwela uwato aya uku Silya, nupya Pulisila na Akwila yamusukilile. Lino yafisile umu Kenkeleya wapezile inyele, pano walafile umulapo. 19 Lyene lino yafisile umu Efeso, wayasile kuuku kwene; lelo wingile umwi sunagogi nu kutandika ukulanzyanya na Ayuda. 20 Nanti cakuti yatwalilile ukumulenga ukuti aikale nayo pa nsita itali, wakanyile 21 lelo wayapakisye nu kuyanena ati: “Ndawela kuli mwemwe nupya kwene ndi cakuti Yeova watemwa.” Lyene wakwezile uwato afuma uku Efeso 22 nu kuya ku Kesaliya. Nupya waile uku Yelusalemu aya alamuka amu cilongano alino aya uku Antioki.
23 Pa cisila ca kwikalako pa nsita imwi, wafumileko nu kuya umu ncende zya mu Galatiya nu mu Fulugiya ala akukomelezya asambi.
24 Lyene Umuyuda umwi uwi zina lyakuti Apolo, uwavyalilwe mu Alekizandilya wafisile umu Efeso; muntu wii wali umucenjele mu kuvwanga nupya wamanyile sana Malembo. 25 Umuntu wii wasambiliziwe inzila yakwe Yeova, nupya vino umupasi wamulenzile ukuya umucincile, walandanga nu kusambilizya ivya cumi pali Yesu, lelo wamanyile sile ulubatizyo lwakwe Yoani. 26 Lyene watandike ukulanda nu kusipa umwi sunagogi, nupya lino Pulisila na Akwila yamuvwile, yamusenzile pa mbali nu kumulondolwela ningo inzila yakwe Leza. 27 Nupya vino Apolo walondanga ukuya uku Akaya, aina amu Efeso yalemvile kalata uku ina aku Akaya nu kuyakomelezya ukuti yamupokelele ningo. Fwandi lino wafisile kuuku, wavwile sana antu aataile pa mulandu wakuti Leza wayalanzile icikuuku cikulu; 28 pa mulandu wakuti walandanga nu kusipa, wasinilanga Ayuda paswe ala akuyalanga umu Malembo ukuti Yesu ali Klistu.