Ezaya
29 “Kalanda kuli Alyeli umusumba uno Devedi wapangiilemo inkambi!
Lekini imyaka itwalilile ukupita;
Mwazevya imitebeto cila mwaka.
2 Lelo ndaleta intazi pali Alyeli,
Nupya kulaya ukulila ni ndoosya
Alaya kuli nene wa ulambo wakwe Leza.
3 Ndapanga inkambi uku kuzinguluka,
Nupya ndakuzinguluka ni vimiti ivisongole
Nu kukuzinguluka ni vintu vyuze pa kukuzanza.
4 Ulapona pansi nu kuzewana;
Ulaavwanga ala uli pansi.
Nupya vino ukuvwanga vitalaauvwika pa mulandu nu lukungu,
Izwi lyako lilaauvwika ukufuma pansi
Nupya lilaya wi zwi lyakwe wino akauvwana ni mipasi
Nupya mazwi yako yalaauvwika kwati ukutotoza umu lukungu.
5 Iumba lya yalwani yako lilaya wa lukungu,
Iumba lya yantu aaya nu unkalwe lilaya wa vipumbu ivikuuluka.
Nupya cilacitika zuwa umu kupumikizya,
6 Yeova wa maumba alakwiusya nu kukupususya
Ukuomvya ukupangalakansya, cilundumusi, ni congo icikalamba,
Nu kuomvya cimuza, cipunga, ni cimbilimbili ca moto.”
7 Lyene inko zyonsi izikulwisya Alyeli,
Kuli kuti yonsi aakumukatukila,
Na aakupanga impungu zya kuomvya pa kumuzanza
Na yonsi aakuleta macuzi pali aliwe
Yalaya wa ciloto, wa cilolwa ca usiku.
8 Cilaya wa muntu uwakuti ali ni nzala akulota akulya,
Lelo aiza azyuka ni nzala,
Na wa muntu wakuti ali nu lusala akulota akumwa,
Lelo aiza azyuka watatonta nupya ali nu lusala.
Vikwene i vilacitikila inko zyonsi
Izikalwisya Umwamba wa Zioni.
9 Zungukini nupya mupeziwe mano;
Ilengini ukuya impafu nupya pafulini.
Iyakoleka, lelo asi pa mulandu wa kumwa waini;
Yakupempezyoka, lelo asi pa mulandu wa kumwa ivintu ivikakola.
10 Pano Yeova watamulenga ukulaala utulo twa mfwa;
Watayala manso inu mwe ya kasesema,
Nupya watamuvimba uku mitwe mwe ya kalola ya vilolwa.
11 Cilolwa consi cikaya kuli mwemwe wa mazwi aali umwi buku ilipombwe. Lino nga yapeela umwi uwamanya ukubelenga, yamunena yati: “Belenga umwi izwi lyuvwike,” ala amati: “Ntanga mbelenge pano ilipombwe.” 12 Nupya nga yapeela muze ataamanya ukubelenga yati: “Belenga,” ala amati: “Ntamanya ukubelenga.”
13 Yeova walanda wati: “Antu yaa yakampepa ukuomvya utunwa twao
Nu kuncindika sile pa kanwa,
Lelo imyenzo yao yataaluka sana kuli nene;
Nupya yakantiina pa mulandu sile na masunde yano antu yakayasambilizya.
14 Fwandi nene ndacita ivizungusyo uku yantu yaa,
Ndacita ivizungusyo ivingi;
Nupya ndonona mano ya yantu yao aamano,
Na antu yao acenjele yatalaailuka.”
15 Kalanda uku yantu aakafisa mapange yao kuli Yeova.
Yakacita ivintu umu mfinzi,
Ala yakuti: “A weni aakutulola?
A weni aamanyile vino tukucita?”
16 Mukanyonganya imilandile!
Uzye mungalanda ukuti nakamata icili cimwi ni ivu?
Uzye cino iyapanga cinganena uwatacipanga citi:
“Atampanzile”?
Nupya uzye cino iyaumba cinganena uwataciumba citi:
“Pasi vino wamanya”?
17 Mu nsita sile inono Lebanoni alaya icalo ca miti ya vizao,
Nupya icalo ca miti ya vizao cilaya wa mutengo.
18 Mu wanda uuwa, ya cipuuli yaluvwa mazwi ya mwi buku,
Ni mpafu zilalola umu mfinzi nu mu kaanda.
19 Aafuuke yalasansamuka sana pa mulandu na Yeova,
Nupya apiina yalasansamuka sana pa mulandu nu wa Muzilo wakwe Izlaeli.
20 Pano ankalwe yatalayako,
Na aacilumba alayonona,
Na yonsi aakalondesya ukucita iviipe uku yauze yalononwa,
21 Aakabepezya auze,
Aakaika iviteyo uku muntu aakulonda ukuipokolola pa mpongolo ya musumba
Na antu yano ukwaula imilandu yampomvu yakalenga umulungami ukufyengwa nayo kwene yalononwa.
22 Yeova uwapuswisye Abulahamu watalanda uku ya mu ng’anda yakwe Yakobo ati:
“Yakobo atalayapo ni nsonyi nupya,
Nupya icinso cakwe citalatala ciloleke nsonyi nsonyi.
23 Pano lino Yakobo alalola ana yakwe
Yano naumba ala yaali nawe,
Ana yakwe yalacindika izina lyane;
Yalacindika Uwa Muzilo wakwe Yakobo,
Nupya yalimilila ala yali ni ntete pa mulandu wakwe Leza wakwe Izlaeli.
24 Yayo aafuma umu nzila yaliluka,
Na aakailizyanya yalazumila ukusundwa.”