Yobo
9 Yobo waswike ati:
2 “Manyile ukuti vivyo kwene avino cili.
Nomba umuntu umwina kufwa angaya uli umulungami kuli Leza?
3 Ndi cakuti umwi akulonda ukupaazyanya na Leza,
Umuntu wiyo atanga aasuke iuzyo nanti alyonga pa mauzyo yakwe Leza 1,000.
4 Wene waya na mano nupya waya na maka.
A weni aangamulwisya ukwaula ukucisika?
5 Akasezya imyamba ukwaula ukuti ali wensi amanye;
Akaipiliula pa mulandu nu ukali wakwe.
6 Akatenkanya insi pano ikala,
Icakuti ni incesi zya nsi zikatenkana.
7 Akanena ilanzi ukuti litawala
Nupya akacilikila uluswepo lwa ntanda;
8 Umwineco akakonzolola iyulu,
Nupya akapita pa maimbi ya pali yemba.
9 Wapanzile intanda izikaamwa ukuti Asyi, Kesili, na Kima,*
Na maumba ya ntanda izyaya umu lwelele lwa ku kaeya;
10 Akacita ivintu vikalamba ni vintu vino antu yatanga yuvwikisye,
Ni vizungusyo ivitanga vipendwe.
11 Akapita umupiipi nani, lelo ntanga mulole;
Akampuzya, lelo nsimanya.
12 Ndi cakuti wasompola cimwi, a weni angamulesya?
A weni angamuzya ukuti, ‘I cani cino ukucita?’
13 Leza atalalesya ukali wakwe;
Na akaavwa Lahabu* kwene yalamufukamila.
14 Fwandi mfwile nu kucizyapo ukuya nu mucinzi lino nkumwasuka
Nu kusoolola ningo mazwi pakuti mpaazyanye nawe!
15 Nanti cakuti nali uwa kaele, ntanga nasukane na Leza.
Ningaleenga sile uwelelo kuli kapingula wane.
16 Ndi cakuti nalilile kuli aliwe, uzye alangasuka?
Ntazumile ukuti alakutika ukwi izwi lyane,
17 Pano akalenga nacula sana
Nupya akamvuzizya intazi apaula umulandu.
18 Asileka ukuti mpuzeko;
Lyonsi akatwalilila ukundetela ivikalenga inje nu ulanda.
19 Nga pa mulandu wa maka, wene u wa maka sana.
Nupya nga pa mulandu wa mulinganya, wene akati, ‘A weni aangampeela umulandu?’
20 Ndi cakuti nali uwa kaele, akanwa kane kangandenga ukuya uwa mulandu;
Nupya ndi cakuti natwalilile ukuya uwa kaele, alalenga cimanyikwe ukuti nene wa mulandu.
21 Nanti cakuti natwalilila ukuya uwa kaele, ntaitaila;
Nakana umi wane uu.
22 I cili cimwi kwene. Ali mulandu uno nkulandila ukuti,
‘Akaonona antu aakaele kumwi na aipe kwene.’
23 Ndi cakuti mulamba angaleta imfwa ukwaula ukwenekela,
Ale Leza angatumfya umuntu uwa kaele aatakweti uwa kumwazwa.
24 Insi yapeelwa uku mwipe;
Leza wavimba manso yakwe ya kapingula.
Ndi cakuti asi aliwe, ale lyene a weni?
25 Manda yane yakusimulisya ukucila aakasimula ulwilo;
Yakusimula ukwaula ukuti ndole ivisuma.
26 Yakusimula wa mawato ya matete,
Wakwe lyang’anda aakulonda ukulema ivyakuti alye.
27 Ndi cakuti nalanda ukuti, ‘Nkante sile ukuilizyanya,
Namacinja icinso cane nu kuya ni nsansa,’
28 Nalyo kwene ningatiina pa mulandu nu kucula kwane konsi,
Nupya namanya ukuti utanga unzane uwa kaele.
29 Unganzana nu mulandu.
Fwandi lyene u mulandu ci uno ningaicuzizya?
30 Ndi cakuti nafulala umu manzi akome aakusunguluka,
Nupya nasangulula iminwe yane muli sopo,*
31 Ungantimpika umu ciwina ca matipa,
Icakuti ningafita ni vyakuzwala vyane vinkane.
32 Pano asi muntu wakwe nene uwakuti nasukane nawe,
Uwakuti tungaya nawe uku cilye.
33 Kusi umuntu aangapingula pakasi kitu,
Aangaya kapingula witu.
34 Ndi cakuti Leza wata ukunguma
Nu kuleka ukuntiinya,
35 Lyene ningalanda kuli aliwe ukwaula intete,
Pano nsiuvwa intete pa kulanda.