Isamu
Ku mukalamba wakwe ya kiimba. Lwimbo luno Devedi wimvile.
41 Uwa nsansa u muntu akalangulukilako umupiina;
Yeova alamupususya umu wanda wa ntazi.
2 Yeova alamucingilila nu kuleka ukuti atwalilile ukuya nu umi;
Antu ya mu nsi yalalanda ukuti umuntu wiyo u wa nsansa;
Utalatala umupeele uku yalwani yakwe.
3 Yeova alamusakamala lino watalwala nupya lino watalaala pali bedi;
Pa nsita ino watalwala ulamusakamala pakuti ace auvweko ningo.
4 Nalanzile inti: “We Yeova nguvwile uluse.
Mpozye pano nakuyembukila.”
5 Lelo alwani yane yakalanda iviiipe pali nene
Yakati: “Uzye alilaci lino alafwa nupya lino izina lyakwe lilalowa?”
6 Ndi cakuti umulwani wiza umu kundola, akalanda ivya ufi.
Akalondelezya iviipe ivyakuti alande pali nene;
Lyene akapita akusalanganya ilyasi lya ufi.
7 Yonsi ampata yakutotozana;
Yakupanga ukuncitila iviipe, yakuti:
8 “Cintu ca kutiinya caticimuponela;
Watapona atalatala akatuke nupya.”
9 Nanti sile umuntu uwali pa mutende nani, wino nataile,
Uwalyanga pamwi nani wamfutuka.*
10 Lelo we Yeova nguvwile uluse nupya nkatusye,
Pakuti njafulule pali vino yancitila.
11 Cino namamanyilako ukuti wantemwa aeci:
Ndi cakuti nalola umulwani wane asikusansamukila pali nene.
12 Ukancingilila pa mulandu na ukaele wane;
Ulatwalilila ukunjika pa nkoleelo yako amanda pe.
13 Si Yeova Leza wa Ina Izlaeli,
alumbanyiziwe amanda pe.
Ameni, Ameni