Kasambilizya
1 Mazwi yakwe kakolonganika, mwana Devedi umwene umu Yelusalemu.
2 Kakolonganika walanda wati: “Ivintu vyonsi i vya sile sile!”
“I vya sile sile! Vyonsi kwene i vya sile sile!”
3 I cilambu ci cino umuntu akakwata
lino akuombesha umu nsi?
4 Inkulo ikupita, nupya inkulo yuze ikwiza
Lelo insi ikalilila amanda pe.
5 Ilanzi likatunka nu kuwa;
Nupya likaswilila zuwa zuwa kuno likatunkila.
6 Umuza ukaya uku kaeya nupya iuzinguluka ukuya uku katutu;
Ukazinguluka lyonsi; ukatwalilila ukuzinguluka.
7 Inguzi zyonsi zikatwala manzi muli yemba lelo yemba asizuula.
Manzi yakaswilila uku ntulo ya nguzi pakuti yatandike ukupita nupya kwene.
8 Ivintu vyonsi vikatonsha;
Kusi aangavilondolola.
Ilinso lisitonta ukulola;
Ni ikutwi lisitonta ukuvwa.
9 ivyayako vilatwalilila ukuyako,
Ni vyaombwa vilaombwa nupya kwene;
Umu nsi mutaya icipya.
10 Uzye kwaya icili consi cino umwi angalanda ati, “Lolini cii icipya”?
Na mpiti kwene akuno cali;
Caliko ala tutatala twayako.
11 Kusi aakaiusha antu ya mpiti
Nupya kusi aaliusha antu aalalondelelapo;
Nanti sile a yayo kwene aalalondelelapo, yauze aalayalondelelapo yatalayiusha.
12 Ne kakolonganika, nene nkateeka Aina Izlaeli umu Yelusalemu. 13 Nisile umwenzo wane pa kusambilila nu kulondelezya na mano pa milimo yonsi iikaombwa umu nsi kuli kuti imilimo itale ino Leza wapeela ana ya yantu iikalenga ukuya aapamviwe.
14 Naweni imilimo yonsi iyaombwanga umu nsi,
Nupya lolini! Vyonsi vyali i vya sile sile, cali kwati ukuzinganya sile umuza.
15 Iciyongane citanga cololwe,
Ni cisipo citanga cipendwe.
16 Lyene nelenginye inti: “Nkweti mano aingi ukucila yonsi aankoleliile umu Yelusalemu, nupya nakwatiileko mano aingi nu kumanya ivintu vingi.” 17 Nalondeshanga ukumanya mano, ucipena nu uwelewele, nupya na cikwene caya wa kuzinganya umuza.
18 Kukwatisha mano kukaleta sana ulanda,
Nupya ukumanya ivintu vingi kukaleta intazi zingi.