Danieli

8 Mu mwaka wakwe citatu uwa kuteeka kwa Mwene Belisyazali, ne Danieli, naweni icilolwa na cuze. 2 Naweni icilolwa nupya nali umwi sano lya ku Syusyani* ilyayelile umu citungu cakwe Elamu, umu cilolwa naweni indi umupiipi nu luzi lwa Ulai. 3 Lino nakatwisye manso naweni suuku aimi umupiipi nu luzi nupya wakweti impembe ziili. Impembe zizyo ziili zyali izitali, lelo longa lwali ulutali ukucila uluze nupya lulo kwene u lwamezile pa cisila. 4 Naweni suuku akusimula pakuti akazanze uku uwondaka, ku katutu nu ku kaeya, nupya kutaali icilyanyi icili consi icamulwisyanga, kutaali na ali wensi aangavipususya kuli aliwe. Wacitanga vino akulonda nupya waicindamike.

5 Lino natwalilile ukulolekesya, naweni sawe akufuma uku uwondaka* akupita umu nsi yonsi ukwaula ukukumya pansi. Sawe wiyo wakweti ulupembe pakasi ka manso ulwalolekanga sana. 6 Sawe walungamanga kuli suuku uwakweti impembe ziili wino naweni aimi umupiipi nu luzi; wasimwilanga kuli aliwe ala watasoka sana.

7 Naweni sawe wapalama kuli suuku ala watamusokela sana. Wapumile suuku nu kumukontola impembe zyakwe ziili, nupya maka yasizile kuli suuku afilwa nu kukatuka. Wamuponyizye pansi nu kumulyatoola, nupya kutaali ali wensi uwa kumupususya kuli aliwe.

8 Lyene sawe waitutumwile sana, lelo lino wizile akwata sile maka, ulupembe lwakwe ulukalamba lwakontwike; lyene wamezile impembe zyuze 4 izyalozizye uku miza 4 iya mwi yulu.

9 Uku lupembe longa pa mpembe zizyo kwamezile ulupembe na luze ulunono, ulwakuzile sana ukulozya uku kaeya nu ku ufumondaka* nu ku Mpanga Iyembe. 10 Lwakuzile sana icakuti ilufika nu ku vintu vya mwi yulu nupya lwalenzile ivintu vimwi ivya mwi yulu ni ntanda zimwi ukuponela pano nsi, iluvilyatola nu kuvilyatola. 11 Lwatandike ukuikuzya ukucila na Cilolo wa yasilika, na malambo yakwe Cilolo aakapeelwa lyonsi yaposilwe nupya incende yakwe iya muzilo yononyilwe. 12 Asilika pamwi na malambo aakapeelwa lyonsi vyapeezilwe uku lupembe pa mulandu nu kuluvyanya, lwatwalilile ukusumboola icuma umu nsi nupya lwatungulwike muli vino lwacitanga.

13 Nupya nuvwile uwa muzilo wenga akuvwanga, lyene uwa muzilo muze uzizye uwavwanganga ati: “Uzye icilolwa umuli amalambo aakapeelwa lyonsi nu uyi uukaleta uwononesi uukalenga incende iya muzilo ni vintu vya mwi yulu ukulyatolwa, cilatwalilila ukufika lilaci?” 14 Nawe wanenyile ati: “Ukufika manda 2,300 yapite, kuli kuti manguzi na katondo; lyene incende ya muzilo ilazifiwa nu kuya wakwe vino yaali.”

15 Walanga ne Danieli ncili nkulola icilolwa nu kulonda ukumanya upiliulo, umu kupumikizya naweni umwi aimi pa nkoleelo yane uwalolekanga wa muntu. 16 Lyene nuvwile izwi lya muntu pakasi ka luzi lwa Ulai likuti: “Gabilieli, lenga umuntu wii amanye upiliulo wa vintu vino watalola.” 17 Fwandi wizile umupiipi na pano naimi, lelo lino wafisile nuvwile sana intete icakuti naponyile pansi imfupama. Nawe wanenyile ati: “We mwana wa muntu, manya ukuti icilolwa cikulangilila ivilacitika uku mpela.” 18 Lelo lino acili akulanda nani, lilyo kwene sile nakaswile ala imfupama pansi. Nawe wandemile nu kuleka ukuti nimilile pano naimi. 19 Lyene wanenyile ati: “Nimalenga umanye ivilacitika uku nsita ya mpela iya upunguzi, pano icilolwa cii cikulangilila ivilacitika uku nsita ya mpela iyasoololwa.

20 “Suuku uwakweti impembe ziili wino waweni akwimililako ya mwene ya ku Medya na Pesya. 21 Sawe uwakweti sana mavumbu akwimililako umwene uwa ku Gilisi, nu lupembe luno waweni pakasi ka manso yakwe lukwimililako umwene wa kutandikilako. 22 Lyene ukulozya uku lupembe ulwakontwike ipamelelapo zyuze 4, kulaya mawene 4 aalateeka ukufuma umu luko lwakwe, lelo yene yatalakwata maka wa mwene wa kutandikilako.

23 “Nupya lino uwene uuwo ulafika uku mpela lino ya kacita ya viipe yalipisya, umwene uwakwata icinso ca koofya aakamanya upiliulo wa mazwi ya usomvi* alakatuka. 24 Alaya umukome lelo asi uku maka yakwe. Alaleta uwononesi uwipisye, nupya alatunguluka muli vino alaacita. Alonona antu ya maka kumwi na antu ya muzilo. 25 Alaomvya usomvi wakwe pakuti atunguluke; alaya ni cilumba umu mwenzo wakwe; nupya lino antu yakulola ukuti iyacingililwa* alonona aingi. Alakatuka kuti alwisye nu mukalamba wakwe ya cilolo, lelo alavungolwa, nomba asi uku maka ya muntu.

26 “Icilolwa cino waweni icalangililanga manda, kuli kuti manguzi na katondo, i ca cumi, lelo ucisunge inkama pano cikulozya uku vintu ivilacitika uku nkoleelo sana.”

27 Ne Danieli nasizile maka nupya nalwazile pa manda yamwi. Lyene nakatwike nu kutwalilila ukuomba umulimo wa mwene; lelo ivintu vino naweni vyamvulunginye nupya kutaali nanti aumwi aangavyuvwikisya.