Ezaya
10 Kalanda kuli yayo aakapanga masunde aipe,
Aakapanga masunde aakalenga yauze ukucula,
2 Aakakana ukuvwangila umupiina,
Nupya aasipingula alanda aaya umu yantu yane umu mulinganya,
Aakapokolola ivyuma vyakwe ya mukamfwilwa
Na ana ya nsiwa!
3 Mulacita uli pa wanda uno mulafululwa,
Lino uwononesi ulamwizila ukufuma ukutali?
Aekwi kuno mulutukila pakuti mwazwiwe,
Nupya aekwi kuno mulasya ivyuma vinu?
4 Yonsi yalafukama umu yafungwa
Nanti ukukomwa.
Pa mulandu na ucipondoka wao, ukali wakwe utaasila,
Lelo watwalilila ukukonzolola ikasa lyakwe pakuti ayakome.
5 “Lolini! Aina Asilya,
Yaya kwati umukota uno nkalangilamo ukali
Nupya intuwa iili umu minwe yao nkaiomvya uku kufulwilako.
6 Ndayatuma uku luko umwaya antu asangu,
Uku yantu aansosya sana;
Ndayatuma ukuti yakapokolole ivyuma ni vintu ivingi
Nu kuyayalyatola wa matipa ya mu museo.
7 Nanti cakuti yaa yatalaya amapange yao yalacita vivyo kwene
Nupya nanti cakuti mapange yakwe yalaya aapusane;
Alapanga ukuyazanza pano yakalonda ukuyalovya,
Nu kulovya inko izingi sana.
8 Pano yakalanda ukuti,
‘Uzye ya cilolo itu yonsi asi ya mwene?
9 Uzye Kalino ataaya wakwe Kelikemisyi?
Uzye Hamati ataaya wakwe Alipadi?
Nupya uzye Samaliya ataaya wakwe Damasika?
10 Napoka mawene yakwe ya leza ya sile sile,
Umwali ivilubi vingi ukucila umu Yelusalemu nu mu Samaliya!
11 Uzye ntalacita uku musumba wa Yelusalemu nu ku vilubi ivyayamo
Wakwe vino nacisile uku musumba wa Samaliya na kuli ya leza ya sile sile aalimo?’
12 “Lino Yeova alamala ukuomba imilimo yakwe yonsi pa Mwamba wa Zioni nu mu Yelusalemu, alafulula umwene wa ku Asilya pa mulandu na vino wakoma umwenzo, vino waya ni cilumba, na vino akayuvwa. 13 Pano akalanda ukuti,
‘Ndacita vii uku maka yane
Nu ku mano yane pano nakwata mano.
Ndafumyako imipaka ya yantu
Nu kupoka ivyuma vyao,
Nupya ndacimvya antu aakaikalamo wa muntu wa maka.
14 Ikasa lyane lilapokolola ivyuma vya yantu,
Wakwe vino umuntu akatwala ikasa lyakwe pa cinsanzo;
Ndakolonganika ivintu vyonsi ivya mu nsi,
Wakwe vino umuntu akakolonganika mayai atiyasyala pa cinsanzo!
Antu yonsi yalaya wa vyunyi ivitanga viicingilile.’”
15 Uzye impasa ingaitutumula pa muntu aakuiomvya ukukomelako?
Uzye soo angaitutumula pali wino akamuomvya?
Uzye intuwa ingatungulula wino akaisenda?
Nanti uzye intuwa inganyemula umuntu aakaisenda?
16 Fwandi Umwene wa cumi, Yeova wa maumba,
Alalenga antu yakwe aine ukuya aonde,
Aina Asilya yatalakwata ululumbi nupya, yalaya kwati iyapya yonsi.
17 Luswepo lwa mu Izlaeli lulaya wa moto,
Nupya Leza wao uwa Muzilo alaya wa cimbilimbili;
Luloca ivikoona ivyayamo ni vimiti vya myunga umu wanda sile onga.
18 Alonona imitengo umwaya imiti isuma ni vyalo vya miti;
Lulumbi lwao lulasila wakwe vino umulwale akaaya akusila pa mulandu nu ulwale wakwe.
19 Miti iilasyala umu mutengo
Ilaya inono icakuti nu mwance angaipenda.
20 Mu wanda uuwa aalasyala umu Izlaeli
Na aalapusuka umu ng’anda yakwe Yakobo
Yatalalenga uwazwilizyo uku mpanga iyayazanzile;
Lelo yalalenga uwazwilizyo kuli Yeova,
Uwa Muzilo wakwe Izlaeli, nupya yalaya na ucisinka kuli aliwe.
21 Anono sile aalaswilila,
Aalasyalako sile umu ya mu lupwa lwakwe Yakobo aalaswilila kuli Leza wa Maka.
22 Nanti cakuti antu yakwe Izlaeli
Yavula wa mucanga wa muli yemba,
Anono sile aalaswilila.
Leza watapingula ukuti kuce kuye uwononesi,
Nupya yalapingulwa umu mulinganya.
23 Uwononesi uno Umwene wa Papelapela, kuli kuti Yeova wa maumba,
Watapingula ukuti uce uyeko ulayako umu mpanga yonsi.
24 Yeova wa maumba Umwene wa Papelapela, walanda wati: “Mwe yantu yane aakaikala umu Zioni, mutuvwa intete pa mulandu na Ina Asilya aamumanga ni intuwa nu mukota wakwe vino Aina Ijipti yacisile. 25 Mu nsita sile inono ukali wane ulasila; lino yalononwa. 26 Yeova wa maumba alayacapa wakwe vino wacisile uku Ina Midyani mupiipi ni iwe lya ku Olebu. Nupya alakatusya intuwa yakwe pali yemba wakwe vino wacisile uku Ina Ijipti.
27 Mu wanda uuwa icisendo ca Ina Asilya cilafuma pa ciye cako,
Ni yoko lyao lilafuma umu nsingo yako,
Nupya iyoko lilavunika pa mulandu na mafuta.”
28 Iiza uku Aiyati;
Iyapita umu Migiloni
Iyasya ivintu vyao umu Mikimasyi.
29 Iyalamba nu kuyalaala uku Geba;
Lama akuzakaza;
Antu ya mu Gibeya umusumba wakwe Saulo iyutuka.
30 Lilini nu kupunda mwe yanaci ya mu Galimu!
Kutikisyini mwe yantu ya mu Laisya!
Na mwe yantu ya mu Anatoti aacuziwa!
31 Antu ya mu Madimena iyutuka.
Antu ya mu Gebimu iyafisama.
32 Ilelo amaimilila umu Nobu.
Watakatusya ikasa lyakwe nu kulilozya uku mwamba uwaya umu musumba wa Zioni,
Pakuti atiinye umwamba apaya Yelusalemu.
33 Lolini! Umwene wa cumi Yeova wa maumba,
Akukoma imisambo ni ciunda icikalamba;
Miti itali sana ikuputolwa,
Nupya imiti ikalamba ikupona.
34 Akuputola matesi ya mu mutengo ukuomvya impasa,
Nupya uwa maka alonona Lebanoni.