Ibuku Lyakwe Ciili Lyakwe Samweli
7 Lino Umwene Devedi wikazile umu ng’anda* yakwe, nupya Yeova wamulenga ukupuuza uku yalwani yakwe yonsi, 2 Umwene wanenyile kasesema Natani ati: “Nemo nkwikala umu ng’anda ya mikedali lelo Imbokosi yakwe Leza wa cumi ikwikala umwi tenti.” 3 Natani wanenyile umwene ati: “Cita consi cino ukulonda, pano Yeova ali naawe.”
4 Pa wanda kwene uuwa usiku, Yeova wanenyile Natani ati: 5 “Kanene Devedi umuomvi wane uti, ‘Yeova walanda wati: “Uzye ulinzile ukunkuulila ing’anda umwakuti naikala? 6 Pano ntatala nikalapo umu ng’anda ili yonsi kufuma pa wanda uno nafumizye antu yane Aina Izlaeli mu Ijipti kufika ni lelo, lelo nkaikala umwi tenti nu mu cikuulwa ca muzilo ivikapangwa umu ncende izipusanepusane. 7 Pa nsita yonsi ino napitanga na Ina Izlaeli yonsi, uzye natazile inena intunguluzi ili yonsi ya Ina Izlaeli ino nasoolwile ukuti yasakamala antu yane Aina Izlaeli inti, ‘U mulandu ci uno mutankuulila ing’anda ya mikedali?’”’ 8 Lyene unene Devedi umuomvi wane uti, ‘Yeova wa maumba walanda wati: “Nakufumizye umu ncende ya mulemvwe muno wacemelanga imfwele, pakuti uye intunguluzi ya yantu yane Aina Izlaeli. 9 Nupya ndaya naawe konsi kuno ulaya, ndacimvya alwani yako yonsi; nupya ndalenga izina lyako ukulumbuka wa yantu alumbuka umu nsi. 10 Ndasoolola incende iyakuti antu yane Aina Izlaeli yakikalemo nupya yalikalamo ukwaula ivili vyonsi vyakuyapumvyanya; yatalaayacuzya uku yantu aipe wakwe vino cali mpiti 11 kufuma pa wanda uno natandike ukusonta ya kapingula pa yantu yane Aina Izlaeli. Nupya ndalenga ukuti upuuze uku yalwani yako yonsi.
“‘“Nupya Yeova wakunena ukuti Yeova alakukuulila ing’anda. 12 Lino ulafwa nu kuziikwa ukwaziikwa ivikolwe vyako, ndasoolola umwanako ukuya umwene, nupya ndalenga uwene wakwe ukuya ukome. 13 Aliwe alankuulila ing’anda ilalenga izina lyane ukucindikwa nupya ndalenga uwene wakwe ukuya ukome manda pe. 14 Ndaya isi, nawe alaya umwanane. Nupya nga waluvyanya, ndamukalipila nu kumunyamba nu mukota wakwe vino antu yakacita. 15 Ntalaleka ukumulanga ukutemwa kwa cumi wakwe vino nalesile ukulanga ukutemwa kwa cumi kuli Saulo, wino nafumizye pa wene lino utatala watandika ukuteeka. 16 Ing’anda yako nu wene wako vilacingililwa manda pe; uwene wako ulatwalilila ukuya ukome manda pe.”’”
17 Lyene Natani wanenyile Devedi mazwi yaa yonsi ni cilolwa cii consi.
18 Devedi nawe wikazile pa nkoleelo yakwe Yeova nu kulanda ati: “Uzye nene weni we Yeova Mwene wa Papelapela? Uzye amu lupwa lwane aaweni pakuti uncitile vyonsi vii? 19 Nupya we Yeova Mwene wa Papelapela walanda na pa vilacitikila amu ng’anda ya muomvi wako uku nkoleelo sana; nupya we Yeova Mwene wa Papelapela vino walanda vikaomba nu ku yantu yonsi. 20 I vyani vino ne muomvi wako ningalanda kuli wewe, vino wamanya ningo, we Yeova Mwene wa Papelapela? 21 Pa mulandu na vino walavile na pa mulandu nu kulonda kwako i caticilenga ucite ivintu vyonsi vii vikalamba nupya wavisokolola uku muomvi wako. 22 Ali mulandu uno wakulisya we Yeova Mwene wa Papelapela kutaya uwaya wakwe wewe. Nupya kutaya Leza muze ukucila pali wewe; vyonsi vino tuvwa vikasininkizya icisinka cii. 23 Nupya u luko ci pano nsi ulwaya wa yantu yako Aina Izlaeli? Leza waile ayakulula pakuti yaye antu yakwe nu kuipangila izina, lino wayacitiile ivintu vikalamba nupya ivya kuzungusya. Wazinzile inko zyuze na ya leza yao pa mulandu wa yantu yako yano wakulwile ukufuma umu Ijipti. 24 Wasoolwile Aina Izlaeli kuti yaye antu yako manda yonsi; nupya we Yeova waya Leza wao.
25 “We Yeova Leza si fikilizya ulayo uno walavile uku muomvi wako na amu ng’anda yakwe nupya utwalilile ukuufikilizya manda yonsi, nupya si ucite viivi kwene vino walavile. 26 Izina lyako licindikwe manda pe, pakuti antu yangalanda ukuti, ‘Yeova wa maumba a Leza wa Ina Izlaeli,’ nupya si uleke amu ng’anda ya muomvi wako Devedi yatwalilile ukuyako. 27 Pano we Yeova wa maumba, Leza wa Ina Izlaeli, watusokolwela umuomvi wako pa kulanda ukuti, ‘Ndakukuulila ing’anda.’ Ali mulandu uno umuomvi wako watakomeleka nu kupepa ipepo lii kuli wewe. 28 Lyene we Yeova Mwene wa Papelapela wewe uli Leza wa cumi na mazwi yako acumi, nupya uutulaya ne muomvi wako ivintu vii visuma. 29 Fwandi si paala amu ng’anda yane ne muomvi wako, nu kutwalilila ukucita vivyo kwene manda pe; pano we Yeova Mwene wa Papelapela, uutulaya, nupya si utwalilile ukupaala amu ng’anda yane ne muomvi wako manda pe.”