Ezaya
66 Yeova walanda wati:
“Mayulu i cilimba cane ica wene, ni nsi a pa kulyata ingazo zyane.
Nga lyene i ng’anda ya musango ci ino mungankuulila,
Nupya aekwi ukwayela icifulo cane ica kupuuzilako?”
2 Yeova walanda wati: “Nene napanzile ivintu vii vyonsi,
Nupya nene nalenzile ukuti viyeko.
Ndalolekesya
Pa muntu uwaicefya nupya uwaya ni ntazi aakatiina mazwi yane.
3 Aakukoma cipambasi ali wa muntu aakukoma umuntu muze.
Aakupeela ilambo lya mfwele ali wa muntu aakuvuna insingo yakwe simbwa.
Aakupeela ica upe ali wa muntu aakupeela uwazi wakwe kapoli!
Aakupeela ivinunkile ali wa muntu aakulumbanya icilubi.
Yakacita vino yakulonda aineco,
Nupya yatemwa ukucita ivya winyi.
4 Ndasoolola inzila zino ndayafulwilamo
Nupya ivintu vino yakatiina ndavileta pali aliyo.
Pano lino nayamile kusi uwaswike,
Lino navwanzile kusi uwakutike.
Yatwalilile ukucita iviipe,
Nupya vino yacitanga vyansosyanga.”
5 Mwemuno mukaika amano uku mazwi yakwe Yeova uvwini kuno:
“Aina inu amupata nupya aakamipaatula yakulanda mitumfyo mitumfyo api zina lyane iyati, ‘Yeova acindikwe!’
Lelo aliza nu kumulenga ukuya ni nsansa,
Nupya yene yalazewana.”
6 Kuli icongo ca cimvulunganya icikuvwika umu musumba, kufuma umwi tempele!
I congo cakwe Yeova aakufulula alwani yakwe ukulingana na vino yafwile ukufululwa.
7 Wakweti umwana lino insita yakwe itatala yafika.
Lino insita yakwe iya kucululuka kwa pa kupaapa itatala yafika, wakweti umwana umonsi.
8 A weni uwatala uvwapo icintu cii?
A weni uwatala walolapo ivintu vii?
Uzye impanga ingavyalwa umu wanda sile onga?
Nanti uzye uluko lonsi lungavyalwa sile pa muku onga?
Lelo Zioni wene lino wali sile umupiipi nu kupaapa waviile ana aonsi.
9 Yeova walanda wati: “Uzye ningalenga umwana ukuya umupiipi nu kuvyalwa alino nkane ukumufumya?”
Nupya Leza winu walanda wati: “Uzye ningalenga umwana atandike ukuvyalwa alino mucilikile?”
10 Zangini pamwi na Yelusalemu nupya sansamukilini pamwi nawe mwensi mwemuno mwamutemwa.
Sansamukini sana pamwi nawe mwensi mwemuno mukuloosya pa mulandu na aliwe,
11 Pano mulonka kuli aliwe nu kwikuta nupya mulateekeziwa,
Mulikuta nu kusansamuka sana pa mulandu wakuti alacindamikwa.
12 Yeova walanda wati:
“Ndalenga aye sana nu mutende wa luzi ulukukonkoloka,
Nu ucindami wa nko ulaya wa manzi aingi aali nu mukuku.
Mulasakamalwa nupya yalamusendela pa lumani,
Nu kumutoloosya pa makulu.
13 Wakwe vino nyina akateekezya umwanakwe,
Avino nani ndaamuteekezya;
Nupya mulateekeziwa pa mulandu ni visuma ivilacitikila Yelusalemu.
14 Lino mulalola ivintu vii, myenzo inu ilasansamuka,
Mafupa inu yalaya na maka wi sote iliteku.
Nupya maka yakwe Yeova yalamanyikwa uku yaomvi yakwe,
Lelo alasokela alwani yakwe.”
15 “Pano Yeova aliza wa moto,
Na maceleta yakwe wa cimuza iciipisye,
Aliza umu kufulula alwani yakwe ala watasoka sana,
Nu kuyakalipila ni vimbilimbili vya moto.
16 Pano Yeova alaleta upinguzi ukuomvya umoto,
Alaomvya ulupanga pa kupingula antu yonsi;
Nupya Yeova alakoma antu aingi.
17 “Aakaipekanya nu kuisangulula pakuti ingile umu vyalo* nu kuya uku cilubi, aakalya iminyefu yakwe ya kapoli ni vintu ivikowele na ya kuza, yonsi kwene yalononwa,” avino Yeova walanda. 18 “Pa mulandu wakuti namanya imilimo yao na vino yakaelenganya, ndiza nu kukolonganika antu ya mu nko zyonsi ni ndimi, nupya yaliza nu kulola ululumbi lwane.”
19 “Ndika icimanyililo muli aliyo, nupya yamwi aalapusuka ndayatuma uku nko izyamanyikisya ukuomvya maulapwa, kuli kuti uku Tasyisyi, ku Pulu nu ku Ludi, ndayatuma nu ku Tubali, ku Yavani nu ku vilila ivyayela ukutali, uku yantu aatuvwapo pali nene nanti ukulola ululumbi lwane; nupya yalamanyisya ululumbi lwane uku yantu ya mu nko. 20 Nupya Yeova walanda wati: “Yalaleta aina inu yonsi ukufuma umu nko zyonsi wa upe kuli Yeova, yalayasendela pa mfwalasi, pa maceleta, mu vikocikala ivifupilizye, pali ya punda na pa ngamila izikapitisya nu kuyatwala uku mwamba wane uwa muzilo uku Yelusalemu, wakwe viivi kwene vino antu yane Aina Izlaeli yakasendela ivya upe vyao umu viya iviswepe pa kuvitwala umu ng’anda yakwe Yeova.”
21 Yeova walanda wati: “Ndasoolola yamwi ukuya ya simapepo nu kuya Aina Levi.”
22 Nupya Yeova walanda wati: “Pano wakwe viivi kwene vino mayulu apya ni nsi ipya vino nkupanga vilatwalilila ukuyako, avino na ana yako ni zina lyako vilatwalilila ukuyako.”
23 Yeova walanda nu kuti: “Lyonsi lino kwaya umwezi upya na pa wanda wi sabata,
Antu yonsi yalaiza nu kufukama pa nkoleelo yane.
24 “Nupya yalapita nu kuyalola ivitumbi vya yantu aampondokile;
Pano ingonyo izilaya pali aliyo zitalafwa,
Nu moto wao utalazima,
Nupya yalaya i cintu ca winyi uku yantu yonsi.”