Mapinda
4 Yanane kutikini uku kusalapula kwako tata winu;
Mwaikako mano pakuti mwailuka,
2 Pano namamupanda mano asuma;
Mutalekelezya vino nkumisambilizya.
3 Naali umwana uwa cisinka kuli ya tata
Nupya ya mayo yantemilwe.
4 Ya tata yansambilizye nu kunena iyati: “Uwaika mano uku mazwi yane.
Uwasunga masunde yane nu kutwalilila ukuyalondela.
5 Uwalonda mano nu kwiluka.
Utailila nupya utaafuma muli vino nkukunena.
6 Utalekelezya mano nayo yalakucingilila.
Uwayatemwa, nayo yalakwazwa.
7 Mano ali cintu icicindamishe, fwandi uwalonda mano,
Nupya pali vyonsi vino ukalonda ukukwata, uwalonda nu kwiluka.
8 Uwacindamika mano nayo yalakucindamika.
Yalalenga ukuti antu yakucindika pa mulandu wa kuyalondela.
9 Yalaya wa ciyembelo icisuma uku mutwe wako;
Yalakuyemvya ni ciyembelo icisuma uku mutwe wako.”
10 Kutika mwanane nu kupokelela mazwi yane,
Nupya ulikala imyaka iingi.
11 Ndakusambilizya umu nzila ya mano;
Ndakutungulula umu nzila zya ulungami.
12 Lino ukupita, ingazo zyako zitalafilwa ukutampula;
Nupya ndi cakuti wasimula, utalapumika
13 Uwapokelela ukusalapula; utaakusuula.
Uwakusunga pano ukusalapula kulalenga uye nu umi.
14 Utaingila umu nzila ya antu aipe,
Nupya utaapita umu nzila ya antu aipe.
15 Uwataluka inzila iiyo;
Nupya utaapitamo, uwafumamo nu kupita kuze.
16 Pano yasilaala utulo suka yacita iciipe.
Yasilaala utulo suka yacisa umwi.
17 Iviipe vyaya kwati ali vyakulya vyao,
Nu unkalwe waya kwati ali waini wao.
18 Lelo inzila ya yalungami yaya wa luswepo lwa katondo
Ulukatwalilila ukuswepelako ukufikila umusanya pakasi.
19 Inzila ya antu aipe yaya wa mfinzi;
Yasimanya ivikalenga yapumike.
20 Mwanane ika mano uku mazwi yane;
Kutikisha kuli vino nkulanda.
21 Utalinzile ukuyilila;
Uyasunge umu mwenzo wako,
22 Pano aakayazana yakaya nu umi
Nupya imili yao ikaloleka ningo.
23 Pa vintu vyonsi vino ulinzile ukucingilila, uwacingilila umwenzo wako,
Pano umwaya intulo ya umi.
24 Uwataluka uku milandile ya ucenjezi,
Nu ku mazwi ya ufi.
25 Leka manso yako yalola uku nkoleelo,
Cumi kwene uwalolekesha uku nkoleelo.
26 Zifya umwakulyata ingazo zyako,
Nupya inzila zyako zyonsi zilaya ningo.
27 Utapaalukila ukwi lunji nanti kuli cimani.
Talusha ingazo zyako uku viipe.