Ezaya
11 Kamusambo kalamela uku cisiki cakwe Yese,
Nupya umuti uulapuuka uku misisi yakwe ulaseeka ivizao.
2 Nupya umupasi wakwe Yeova ulikala pali aliwe,
Kuli kuti umupasi wa mano nu wa kwiluka,
Umupasi wa kusunda nu wa maka,
Umupasi wa kumanya nu wa kutiina Yeova.
3 Alaazangila umu kutiina Yeova.
Atalaapingula ukulingana sile na vino walola,
Nanti ukukalipila ukulingana sile na vino uuvwa.
4 Alaapingula alanda umu ulungami,
Alaasunda umu nzila yakuti vintu vizipile afuuke aaya pano nsi.
Mazwi yakwe yalaya wa ntuwa ino alaomvya uku kumilako antu ya mu nsi,
Alakoma ya kacita ya viipe ukuomvya mazwi ya mu kanwa kakwe.
5 Ulungami ulaya wa musipi mu musana wakwe,
Ucisinka nao kwene ulaya wa musipi mu musana wakwe.
6 Umumbulu ulikala pamwi na kana ka mfwele,
Na kana ka mbuzi kalalaala pamwi ni nangu,
Nupya kana ka ng’ombe na cisama ni nyama iine vilikala pamwi;
Nupya umwance aalaavicema.
7 Ing’ombe na beele vilaaliila pamwi,
Ana yao yalalaala pamwi.
Cisama alalya isote wa ng’ombe.
8 Mwana aakonka alacinila pa muwina wa nondo,
Nupya umwana uwata ukonka alingizya ikasa umu muwina wa nzoka iya usungu.
9 Vitalaleta uyi uli onsi
Nanti ukonona vili vyonsi mu mwamba wane uwa muzilo
Pano umu nsi mulazuula ukumanya Yeova
Wakwe vino manzi yazuula muli yemba.
10 Mu wanda uuwa umuntu aalafuma muli Yese alimilila wa cimanyililo uku yantu.
Kuli aliwe akuno inko zilaalenga utunguluzi,
Nupya incende yakwe iya kupuuzilamo ilaya icindame.
11 Mu wanda uuwa nupya kwene Yeova alakonzolola ikasa lyakwe umuku wakwe ciili kuti apokolole asyalako umu yantu yakwe kufuma uku Asilya, ku Ijipti, ku Patulosi, ku Kusyi, ku Elamu, ku Syinali, ku Hamati, nu mu vilila vya pali yemba. 12 Alikila antu icimanyililo nu kukolonganika Aina Izlaeli aasalangana, nupya alakolonganika na Ayuda aasalangana ukufuma umu ncende zyonsi izya pano nsi.
13 Efulemu alata ukuya nu uzuwa.
Nupya yayo aakasokela Ayuda yalononwa.
Efulemu atalaya nu uzuwa kuli Yuda,
Yuda nawe atalasokela Efulemu.
14 Yalatentemuka zuwa umu ncende izisuluke izya Ina Filisti nu kuya uku uwondaka;
Yonsi pamwi yalapokolola ivintu uku yantu ya ku ufumondaka.
Yalazanza Aina Edomu na Ina Moabu,
Nupya Aina Amoni yalaya ateekwa yao.
Alakamya inguzi 7 iziitamo ukuomvya umuza wakwe ukaye,
Nupya alalenga antu ukulamba pa ngazo.
16 Nupya kulaya umuseo ukalamba ukufuma uku Asilya umwa kupita antu yakwe aasyalako
Wakwe vino cali uku Ina Izlaeli pa wanda uno yafumile umu Ijipti.