Kusokolola Ukwapeezilwe Kuli Yoani
13 Nupya icizoka cimiliile pa mucanga wa muli yemba.
Nupya naweni icilyanyi ca mu mpanga cikufuma muli yemba, cali ni mpembe 10 ni mitwe 7, nupya uku mpembe kwali ivisote vya wene 10, lelo ku mitwe kwali mazina ya miponto. 2 Nupya icilyanyi cino naweni calolekanga wa nangu, lelo ingazo zyalolekanga wakwe zyakwe beele, nu mulomo walolekanga kwati uwakwe cisama. Ni cizoka capeezile icilyanyi amaka ni cilimba ca wene ni nsambu zya kuteeka.
3 Naweni ukuti umutwe onga wali ni cilonda iciipisye, lelo icilonda capozile, na antu yonsi pano nsi yalondiile icilyanyi ca mu mpanga ala yakuzunguka. 4 Nupya yapefile icizoka pano capeezile icilyanyi ca mu mpanga maka, yapefile ni cilyanyi ca mu mpanga ala yakuti: “Uzye a weni uwaya wa cilyanyi cii nupya uzye a weni angalwa naco?” 5 Capeezilwe umulomo uwalandanga ivintu vikalamba nu kuponta, nupya capeezilwe maka ya kuomba pa myezi 42. 6 Nupya catandike ukupontela Leza nu kupontela izina lyakwe na kuno akaikala alino na aikala umwi yulu. 7 Cazumiliziwe ukulwa na amuzilo nu kuyacimvya, nupya capeezilwe maka pa mitundu yonsi na pa yantu na pa ndimi na pa nko. 8 Nupya yonsi akaikala pano nsi yalacipepa. Ukufuma pano insi yaumbilwa, kutaya nanti awenga pali aliyo wino izina lyakwe lyalembwa umu lupapulo lwa umi ulwa Mwana wa Mfwele uwakomilwe.
9 Lekini wensi aali na matwi, auvwe. 10 Ndi cakuti umwi alinzile ukuya umu uzya, alaya umu uzya. Ndi cakuti umwi alakoma nu lupanga,* alinzile ukukomwa nu lupanga. Ukwene uli mulandu uno amuzilo yalinzile ukuzizimizya nu kuya nu utailo.
11 Lyene naweni icilyanyi ca mu mpanga na cuze ala cikufuma pano nsi, nupya cakweti impembe ziili wa mwana wa mfwele, lelo catandike ukuvwanga wa cizoka. 12 Cikaomvya maka yonsi acilyanyi ca kutandikilako ala ni cilyanyi cico cikulolako. Nupya cikalenga insi na iikalamo ukupepa icilyanyi ca kutandikilako, cino icilonda iciipisye capozile. 13 Nupya cikacita ivimanyililo ivikalamba, kumwi sile nu kulenga umoto ukupona ukufuma ukwi yulu ukwiza pano nsi ala na antu yakulolako.
14 Cikaponzya aikala pano nsi, pa mulandu ni vizungusyo vino cazumiliziwe ukucita pa manso ya cilyanyi ca mu mpanga, ala cikunena aikala pano nsi ukupanga icilubi icikolane ni cilyanyi ca mu mpanga icakomilwe ku lupanga lelo icatwalilile ukuya nu umi. 15 Nupya cazumiliziwe ukuti cipeele umupu ku cilubi icikolane ni cilyanyi ca mu mpanga, pakuti cilubi icikolane ni cilyanyi ca mu mpanga cavwanga nu kulenga ukuti yonsi aakukana ukupepa icilubi cico yaakomwa.
16 Cikapatikizya antu yonsi, asuulwe na acindame, akankala na apiina, antungwa na azya, kuti yalinzile ukwikwa ivimanyililo kwi kasa lyao ili lunji nanti pa vipuma vyao, 17 nu kuti kutaya nanti wenga uwa kukala nanti ukukazya suka sile umuntu aakweti icimanyililo, kuli kuti izina lya cilyanyi ca mu mpanga nanti inamba yi zina lya ciko. 18 Uli mulandu uno mano yakalondekelwa: Lekini aali na mano azane upiliulo wa namba ya cilyanyi ca mu mpanga, pano i namba ya muntu, nupya inamba iiyo a 666.