Ezekeli

38 Nupya kwene Yeova wanenyile ati: 2 “We mwana wa muntu, lozya icinso cako kuli Gogi wa ku mpanga ya Magogi, kuli kuti ntunguluzi ikalamba yakwe Misyeki na Tubali, nupya umusesemele ivilamucitikila. 3 Ulande uti, ‘Yeova Umwene wa Papelapela walanda wati: “Inja umulwani wako we Gogi we ntunguluzi ikalamba yakwe Misyeki na Tubali. 4 Ndakupiliula nu kukwikila maswelo umu nzekete, nupya ndaleka uye umu kulwa pamwi na asilika yako yonsi, mfwalasi na aonsi aakakwela pa mfwalasi, yonsi kwene yalazwala ivyakuzwala iviyembe, yalaya iumba ilikalamba ala yali ni visyangu ivikalamba ni vinono, nupya yonsi kwene yalakwata ya panga. 5 Aina Pesya, Aina Etiopia na Ina Puti yalaya nayo, nupya yonsi kwene yalaya ni visyangu ivinono ni visote; 6 Gomeli na asilika yakwe yonsi na amu ng’anda yakwe Togama aakaikala uku mpanga ya kutali sana uku katutu, pamwi na asilika yakwe yonsi, kuli kuti antu aingi yalaya naawe.

7 “‘“Ipekanye pamwi na asilika yonsi yano uli nayo nupya ulaya umusilika wao umukalamba.

8 “‘“Ndakufulula pa cisila ca manda aingi. Nupya pa cisila ca myaka iingi ulazanza impanga ya yantu aapuswike uku lupanga aakolonganikwe ukufuma umu yantu aingi nu kuyaikala umu myamba ya mu Izlaeli iyononike pa nsita itali. Aakaikala umu mpanga yii yaweziwe ukufuma umu yantu nupya yonsi kwene yakaikala umu mutende. 9 Uliza umu kuyazanza wa cimuza icikalamba nupya ulavimba impanga wa makumbi, kuli kuti wewe na asilika yako yonsi pamwi na antu aingi yano uli nayo.”’

10 “Yeova Umwene wa Papelapela walanda wati: ‘Mu wanda uuwa melenganyo yaliza umu mwenzo wako nupya ulakwata mapange aipe. 11 Ulalanda uti: “Nimaya nkazanze impanga umwaya imizi iitacingililwa. Nimaya nkazanze antu aikala umu mutende nupya aasiopa icili consi, yonsi kwene aakaikala umu mizi iitacingililwa ni viumba, mifiikilo nanti mpongolo.” 12 Ulelenganya ukuti umapokolola ivintu ivingi nu kuzanza incende izyononike zino ndakai mukaikala antu, alino nu kuzanza antu aakolonganikwe ukufuma umu nko aakwata ivyuma ni vintu vyuze, aakaikala pakasi ka nsi.

13 “‘Syeba na Dedani na aculuzi ya ku Tasyisyi alino na asilika yonsi aku Tasyisyi yalakuzya yati: “Uzye watukolonganika asilika yako pakuti musende siuva na goldi, ivyuma ni vikwatwa nu kupokolola ivintu ivingi sana?”’

14 “Fwandi we mwana wa muntu sesemela Gogi uti, ‘Yeova Umwene wa Papelapela walanda wati: “Pa wanda uno antu yane Aina Izlaeli yalikala umu mutende, uzye utalamanya? 15 Ulafuma uku mpanga yako ukutali sana uku katutu pamwi na antu aingi yano uli nayo, yonsi yaliza ale iyakwela pa mfwalasi, yalaya iumba ilikalamba, asilika aingi sana. 16 Uliza umu kuzanza Aina Izlaeli antu yane wi kumbi ilyatilivimba impanga. Mu manda ya kusyalikizya ndakuleta umu kulwisya impanga yane we Gogi, pakuti inko zice ziimanye lino ndaicindamika ukupitilila muli wewe ala zikulolako.”’

17 “Yeova Umwene wa Papelapela walanda wati: ‘Uzye asi wewe kwene nalanzilepo mpiti ukupitila umu yaomvi yane ya kasesema amu Izlaeli aasesime pa myaka iingi ukuti ulayazanza?’

18 “Yeova Umwene wa Papelapela walanda wati: ‘Pa wanda uno Gogi alazanza impanga ya Izlaeli ndasoka sana. 19 Mu ukali wane ukupya wa moto ndavwanga; nupya umu wanda uuwa, umu mpanga ya Izlaeli mulaya icilundumusi icikalamba. 20 Pa mulandu wane inswi zya muli yemba, vyunyi vya mu lwelele, vilyanyi vya mu mpanga, vinyama vyonsi ivikasela, na antu yonsi amu nsi vilazakaza, myamba ilaongoloka, vimawe ivikalamba vilapona, ni viumba vyonsi vilawa.’

21 “Yeova Umwene wa Papelapela walanda wati: ‘Ndatuma ulupanga umu kumulwisya umu myamba yane yonsi. Cila muntu alalwisya umwinakwe. 22 Ndamupingula nu kumuletela icikuko, antu yalafwa; ndaleta imvula iingi sana iya mawe nu umoto na maluti pali aliwe na pa yasilika yakwe na pa yantu aingi yano ali nayo. 23 Ndaikuzya nu kuilenga ukuya uwa muzilo nupya ndaimanyisya uku nko izingi; lyene yalamanya ukuti nene Yeova.’