Ezekeli

40 Mu mwaka uwalenga 25 kufuma pano twayeliile umu uzya, ku kutandika kwa mwaka, pa wanda uwalenga 10 umu mwezi, mu mwaka uwalenga 14 kufuma pano umusumba ononilwe, pa wanda kwene uuwa ikasa lyakwe Yeova lizile pali nene, nupya wantwazile umu musumba. 2 Leza wantwazile uku mpanga iya Izlaeli umu cilolwa nu kuyanteeka apa mwamba utali sana, apaali cikuulwa icalolekanga wa musumba uku kaeya.

3 Lino wamfisizye kuuku, naweni umonsi uwalolekanga wakwe koopa. Walemile umwando wakwe katani na kamuti ka kupimilako nupya wimilile pa mpongolo. 4 Umonsi wiyo wanenyile ati: “We mwana wa muntu, lolekesya, uuvwikisye nu kwikako sana mano kuli vyonsi vino nimakulanga pano acino uwiziile kuno. Ukanene amu ng’anda yakwe Izlaeli vyonsi vino umalola.”

5 Naweni ciumba icazingulwike itempele. Umonsi nawe walemile kamuti ka kupimilako akatalimfile mamita yatatu. Watandike ukupima iciumba, nupya ukutikama kwa ciumba kwalingine nu utali wa kamuti ka kupimilako, nu utali wa ciumba nao kwene walingine na kamuti kwene kako.

6 Lyene waile pa mpongolo iyalozizye uku ufumondaka nupya wakwezile pa masitepu. Lino wapimile uwingililo wa pa mpongolo wazanyile ukuti wasaalile ukulingana nu utali wa kamuti, uwingililo uze nao kwene wasaalile ukulingana nu utali wa kamuti. 7 Cila muputule wa yalinzi walingine nu utali wa kamuti mu utali nu mu kusaalala kwene. Nupya pakasi ka miputule ya yalinzi patalimfile mamita yaili na afu. Uwingililo wa pa mpongolo uwali umupiipi na kamuputule ka pa mpongolo akalozizye ukwi tempele watalimfile ukulingana nu utali wa kamuti.

8 Wapimile kamuputule ka pa mpongolo akalozizye ukwi tempele, nupya kalingine nu utali wa kamuti ka kupimilako. 9 Lyene wapimile kamuputule ka pa mpongolo nako kali mamita 4; wapimile ni ncesi zya mu mbali ya kamuputule kako, nazyo zyatalimfile mita wenga; nupya kamuputule ka pa mpongolo kalozizye ukwi tempele.

10 Ku mbali zyonsi zya ku mpongolo iya ku ufumondaka kwali miputule itatu. Miputule yonsi itatu yaali ilingane, ni ncesi zyonsi izya mu mbali zyali izilingane.

11 Lyene wapimile uwingililo wa pa mpongolo umu wipi, nao wali mamita 5, nu utali wa mpongolo nao watalimfile ukucila pa mamita 6 na afu.

12 Incende icingililwe ni ciumba iciipi iyaali pa nkoleelo ya miputule ya yalinzi umu mbali zyoili yaali masentimita 44 na afu. Miputule ya yalinzi umu mbali zyonsi zyoili nayo yaali mamita yatatu.

13 Lyene wapimile impongolo ukufuma pi paala lyonga ilya muputule wa yalinzi ukufika pi paala lya muputule uze, nupya paali mamita 13; mulyango onga walozyanyizye nu uze. 14 Lyene wapimile incesi zya mu mbali nu kuzana ukuti zyatalimfile mamita 31, wapimile ni ncesi izyali mu mbali ya mpongolo zyonsi ukuzinguluka umusolo. 15 Kufuma pa wingililo wa pa mpongolo kuyafika pa nkoleelo ya kamuputule ka pa mpongolo iya mukasi paali mamita 26.

16 Mu miputule iya yalinzi nu ku ncesi zya mu mbali umukasi ka mpongolo mwali mawindo aakweti mafulemu aakuliile umukasi ku mbali zyonsi zyoili. Mukasi ka tumiputule namo kwene mwali mawindo ku mbali zyonsi zyoili, nupya uku vipilala ivyali umu mbali yalenzileko utuncindu.

17 Wantwazile pa musolo wa panzi, nupya naweni imiputule iya kuliilamo ni ncende iyakuuzilwe na mawe ukuzinguluka umusolo. Pa ncende iiyo paali imiputule ya kuliilamo 30. 18 Incende iyakuuzilwe na mawe uku mbali ya mpongolo yalingine nu utali wa mpongolo; incende iiya yaali apisika ukucila umusolo.

19 Lyene wapimile utali ukufuma pa nkoleelo ya pa mpongolo iya pisika kufika apapelezile umusolo wa mukasi. Patalimfile mamita 52 ku ufumondaka nu ku katutu.

20 Musolo wa kunzi wakweti impongolo iyalozizye uku katutu, nupya waipimile umu utali nu mu wipi. 21 Ku mbali zyonsi zyoili kwali miputule itatu iya yalinzi. Incesi zya mu mbali na kamuputule vyalingine ni mpongolo ya kutandikilako. Wali mamita 26 umu utali nu mu wipi namo mamita 13. 22 Mawindo, kamuputule ka pa wingililo nu tuncindu tuno yalenzile vyalingine ni vyali uku mpongolo ya ku ufumondaka. Pa kufika pa musolo antu yakwelanga pa masitepu 7, nupya kamuputule kaali pa nkoleelo ya masitepu.

23 Mu musolo wa mukasi mwali mpongolo iyalozyanyizye ni mpongolo ya ku katutu na yuze iyalozyanyizye ni mpongolo ya ku ufumondaka. Wapimile utali uwa kufuma pa mpongolo yonga ukufika pa mpongolo yuze, nupya patalimfile mamita 52.

24 Lyene wantwazile uku kaeya, nupya kuuku kwene akuno naweni mpongolo. Wapimile incesi izyali umu mbali na kamuputule nupya vyalingine ni vyali uku mpongolo zyuze. 25 Kwali na mawindo uku mbali zyonsi kumwi nu ku kamuputule aka kwingilila aakoline na mawindo yonsi. Impongolo yaali mamita 26 umu utali na mamita 13 umu wipi. 26 Kwali masitepu 7 aakuyila uku mpongolo iiyo, nupya kamuputule kaali pa nkoleelo ya masitepu. Na kuli cila lucesi lwa mu mbali yalenzileko kancindu konga.

27 Musolo wa mukasi wakweti impongolo iyalozizye uku kaeya; nupya umonsi wiyo wapimile utali uwali pa mpongolo iiyo ukuya uku mpongolo yuze, napo paali mamita 52. 28 Lyene wampisizye pa mpongolo ya ku kaeya antwala umu musolo wa mukasi; lino wapimile impongolo ya ku kaeya yalingine ni mpongolo zyuze izyasyala. 29 Miputule ya yalinzi, incesi zya mu mbali na kamuputule vyalingine ni vyuze. Kwali na mawindo mu mbali zyonsi nu ku kamuputule. Mpongolo yaali mamita 26 mu utali nu mu wipi namo mamita 13. 30 Tumiputule utwali pa mpongolo zyonsi twali mamita 13 umu utali nu mu wipi mamita yaili na afu. 31 Cila kamuputule kalozizye ku musolo wa panzi, nupya uku vipilala vya mu mbali yalenzileko utuncindu, paali na masitepu 8 aakuilako.

32 Lino wantwazile umu musolo wa mukasi ukufuma uku ufumondaka, wapimile impongolo nupya yalingine ni mpongolo zyuze. 33 Miputule ya yalinzi, incesi zya mu mbali na kamuputule vyalingine ni vyuze, kwali na mawindo umu mbali zyonsi nu ku kamuputule. Mpongolo yaali mamita 26 umu utali nu mu wipi namo mamita 13. 34 Cila kamuputule kalozizye ku musolo wa panzi, nupya uku vipilala vya mu mbali yalenzileko utuncindu, paali na masitepu 8 aakuilako.

35 Lyene wandeesile uku mpongolo iya ku katutu nu kuipima; nayo kwene yalingine ni mpongolo zyuze. 36 Miputule ya yalinzi, incesi zya mu mbali na kamuputule vyalingine ni vyuze. Kwali na mawindo umu mbali zyonsi. Mpongolo yaali mamita 26 umu utali nu mu wipi namo mamita 13. 37 Cila kamuputule kalozizye uku musolo wa panzi, nupya uku vipilala vya mu mbali yalenzileko utuncindu, paali na masitepu 8 aakuilako.

38 Muputule wa kuliilamo wayanga umupiipi ni ncesi zya pa mpongolo, pakwene apano yafulilanga amalambo ya koca.

39 Ku mbali zyonsi zyoili izya kamuputule ka pa mpongolo kwali matebo yaili pano yakomelanga malambo ya koca, malambo ya pa luyembu, na malambo ya pa mulandu. 40 Mupiipi nu wingililo wa pa mpongolo ya ku katutu paali matebo yaili panzi. Ku lusansa luze ulwa kamuputule ka pa mpongolo nako kwali matebo yaili. 41 Ku mbali zyonsi zyoili izya pa mpongolo kwali matebo 4, kuli kuti yonsi pamwi yaali 8, pano yakomelenga malambo. 42 Matebo 4 yano yaomvyanga uku malambo ya koca yapaangilwe na mawe aputulwe, matebo yayo yaali umupiipi na masentimita 78 umu utali, mu wipi namo kwene umupiipi na masentimita 78, alino ukuya umupela masentimita 52. Pakwene apaayanga iviombelo vino yaomvyanga pa kukoma malambo ya koca na malambo yauze. 43 Masyeofu aali wa cizanza umu wipi yakambatikwe ukuzinguluka iciumba ca mukasi consi; nupya inyama izyapeelwanga zyayanga pa matebo.

44 Kunzi ya mpongolo ya mukasi kwali imiputule ya kuliilamo ya kiimba, yaali umu musolo wa mukasi mupiipi ni mpongolo ya ku katutu nupya yalozizye uku kaeya. Muputule uze uwa kuliilamo wali umupiipi ni mpongolo iya ku ufumondaka, nupya walozizye uku katutu.

45 Wanenyile ati: “Muputule wa kuliilamo uulozizye uku kaeya u wakwe ya simapepo aakaomba imilimo ya mwi tempele. 46 Muputule uwa kuliilamo uwalozya uku katutu u wakwe ya simapepo aakaombela pa ulambo. Ya simapepo yaa aamwana Zadoki aafuma umu Ina Levi aasontwa ukuya pa nkoleelo yakwe Yeova uku kumuombela.”

47 Lyene wapimile umusolo wa mukasi, mu utali wali mamita 52 nu mu wipi namo mamita 52, walingine monsi monsi. Ulambo wali pa nkoleelo yi tempele.

48 Lyene wantwazile umu kamuputule aka mwi tempele, nupya wapimile ulucesi ulwali umu mbali ya kamuputule, nalo lwatalimfile mamita yaili na afu uku mbali yonga na mamita yaili na afu uku mbali yuze. Impongolo yaali mita wenga na afu umu wipi, ku mbali yonga nu ku mbali yuze nako kwene yaali mita wenga na afu.

49 Kamuputule kali mamita 10 umu utali na mamita 5 na afu* umu wipi. Pa kuyapo, antu yakwelanga pa masitepu. Mu mbali mwali incesi, longa uku lusansa longa nu luze uku lusansa luze.