Ezekeli

43 Lyene wantwazile uku mpongolo iyalozya uku ufumondaka. 2 Kuuku kwene akuno naweni ululumbi lwakwe Leza wa Ina Izlaeli lukwiza ukufuma uku ufumondaka, ni izwi lyakwe lyuvwikanga wa ciunda ca manzi aingi; nupya insi yaengesanga pa mulandu nu lulumbi lwakwe. 3 Vino naweni vyali wa cilolwa cino naweni lino naile* umu konona umusumba, nupya calolekanga wakwe cino naweni umupiipi nu luzi lwa Kebali; lyene nafupime pansi.

4 Lyene ululumbi lwakwe Yeova lwapisile pa mpongolo iyalozizye uku ufumondaka ilwingila umwi tempele. 5 Nupya umupasi wanyemwile nu kuntwala umu musolo wa mukasi, nupya naweni ukuti umwi tempele imuzuula ululumbi lwakwe Yeova. 6 Lyene nuvwile umwi akumvwanzya ukufuma umwi tempele, nupya umonsi umwi wizile aimilila umupiipi nani. 7 Wanenyile ati:

“We mwana wa muntu, yii i ncende apaya icilimba cane ica wene nupya apa kulyata ingazo zyane, i ncende ino ndikalapo manda pe mu yantu yane Aina Izlaeli. Amu ng’anda yakwe Izlaeli na ya mwene yao yatalakowezyapo nupya izina lyane ilya muzilo kupitila umu kupepa ya leza yauze nanti ukulikowezya ukuomvya ivitumbi vyakwe ya mwene yao lino yalafwa. 8 Lino iisile umulyango wi tempele lyao umupiipi nu mulyango wi tempele lyane, ni cisaasa ci tempele lyao umupiipi ni cisaasa ci tempele lyane ale pakasi pali sile iciumba, yakowizye izina lyane pa mulandu ni vintu vya winyi vino yacisile, fwandi nayononyile ala indi ni cipyu. 9 Lyene lekini yatwale ya leza yao ni vitumbi vyakwe ya mwene yao ukutali nani, nani ndikala muli aliyo manda pe.

10 “Naawe we mwana wa muntu londolwela amu ng’anda yakwe Izlaeli vino itempele likuloleka pakuti yuvwe insonyi pa mulandu na vino yaluvyanya nupya yalinzile ukumanya vino lyapangwa. 11 Ndi cakuti yuvwa insonyi pali vyonsi vino yacita, uyamanyisye pali vino itempele lyapangwa, vino ivintu vyatantikwa, vino imilyango ya kufumila ikala kumwi ni ya kwingilila. Uyalange vino vyonsi ivya pi tempele vyapangwa na masunde ayapo, nupya uvilembe ale yakulolako pakuti yalola vino itempele lyapangwa nu kulondela masunde ayapo. 12 Yakwene ali masunde ya pi tempele. Incende yonsi iyaya papela ya mwamba ukuzinguluka itempele i ya muzilo sana. Lola! Yakwene ali masunde ya pi tempele.

13 “Vino ivipimo vya ulambo vyali aevi: Pa nsi ya ulambo pali masentimimita umupiipi na 52, nu mu wipi namo kwene mwali masentimita umupiipi na 52. Icacinzile umwapelezile ulambo calingine ni cizanza.* Vikwene avino pansi ya ulambo paali. 14 Kufuma pansi ukufika pano iciputulwa ca kutandikilako capelezile paali mita wenga nu mu wipi namo masentimita mupiipi na 52. Kufuma pano ciputulwa ca kutandikilako capelezile ukufika pano cakwe ciili capelezile paali mamita yaili, mu wipi namo mwali masentimita umupiipi na 52. 15 Papela ya ulambo pali mamita yaili ukuya umupela nupya paali ni mpembe 4. 16 Ulambo wali ulingane papela monsi monsi, wali mamita 6 umu utali na mamita 6 umu wipi. 17 Ciputulwa cakwe ciili ica ulambo umu mbali zyonsi 4 cali mamita 7 umu utali na mamita 7 umu wipi, ni cacinzile umu mbali umwapelezile ulambo cali masentimita 26, lyene pansi ya ulambo umu mbali zyonsi paali masentimita mupiipi na 52.

“Na masitepu ya ku ulambo yalozizye uku ufumondaka.”

18 Lyene wanenyile ati, “We mwana wa muntu, Yeova Umwene wa Papelapela walanda wati: ‘Vii ali vya kulondela pa kupanga ulambo pakuti malambo ya koca yapeelelwapo nu wazi wasanswa pa ulambo kwene.’

19 “‘Uce upeele cipambasi ukuya ilambo lya pa luyembu kuli ya simapepo Aina Levi amu lupwa lwakwe Zadoki aakaombela pa nkoleelo yane,’ avino Yeova Umwene wa Papelapela walanda. 20 ‘Ulinzile ukutola uwazi umwi nu kupaka uku mpembe 4 izya ulambo nu mu makoona 4 aaciputulwa ca pakasi nu mwapelela ulambo ukuzinguluka pakuti uusangulule uku luyembu nu kuuswefya. 21 Lyene utole cipambasi, kuli kuti ilambo lya pa luyembu nu kumocela pa ncende iisoololwe ukunzi yi tempele. 22 Pa wanda wakwe ciili uce upeele sawe umusuma ukuya ilambo lya pa luyembu, nupya ya simapepo yace yasangulule ulambo uku luyembu wakwe vino yausangulwile ukuomvya cipambasi.’

23 “‘Nga waca wamala ukusangulula ulambo uku luyembu, uce upeele cipambasi umusuma na suuku umusuma. 24 Uce uvilete pa nkoleelo yakwe Yeova, nupya ya simapepo yalasansapo umusilya nu kuvipeela wi lambo lya koca kuli Yeova. 25 Cila wanda pa manda 7 ulaapeela sawe ukuya ilambo lya pa luyembu kumwi na cipambasi na suuku; vifwile ukuya inyama izisuma. 26 Pa manda 7 ya simapepo yalinzile ukusangulula ulambo nu kuupekanya kuti waomviwa. 27 Nga manda 7 yasila, pa wanda uwalenga 8 nu kuya inkoleelo ya simapepo yalaapeela malambo inu* aakoca na malambo ya mutende pa ulambo; nupya ndaazangila muli mwemwe,’ avino Yeova Umwene wa Papelapela walanda.”