Yakapingula
5 Pa wanda uuwa Debola pamwi na Baraki mwana Abinoamu imvile ulwimbo iyati:
2 “Pa mulandu wakuti asilika Aina Izlaeli yali ni nyele izisi zinyepe,
Na pa mulandu wakuti antu yaipeelisye,
Lumbanyini Yeova!
3 Kutikini mwe ya mwene! Uvwini mwe ya kateeka!
Ndimbila Yeova.
Ndimba ulwimbo lwa kulumbanya Yeova Leza wa Ina Izlaeli.
4 We Yeova, lino wafumile uku Seili,
Lino wafumile uku mpanga ya Edomu,
Insi yatensile, iyulu lyafumizye manzi,
Manzi itiike ukufuma umu makumbi.
5 Imyamba yasungulwike pa nkoleelo yakwe Yeova,
Nanti sile Umwamba wa Sinai nao kwene wasungulwike pa nkoleelo yakwe Yeova Leza wa Ina Izlaeli.
6 Mu manda yakwe Syamuga mwana Anati,
Mu manda yakwe Yaeli, mu miseo ikalamba mutapitanga antu;
Alendo yapitanga umu miseo inono.
7 Mizi ya mu Izlaeli yasiile ukwaula antu;
Mutaali nanti aumwi kufikila lino ne Debola nakatwike,
Lino nakatwike nga nyina wa mu Izlaeli.
8 Yasoolwile ya leza yauze;
Lyene pa mpongolo pali inkondo.
Kutaali uwakweti icisyangu nanti isumo,
Mu Ina Izlael 40,000.
9 Umwenzo wane uli na akalamba ya yasilika ya Ina Izlaeli,
Aipeelesya ukuya umu ulwi pamwi na antu yauze.
Lumbanyini Yeova.
10 Mwemuno mukwezile pali ya punda ayenzulukile,
Mwemuno mutenzi pa nsalu zisuma,
Na mwemuno mukupita umu museo,
Elenganyini pa milimo yakwe Leza!
11 Mazwi ya yantu apeelanga manzi yuvwisile umu ncende umwaya manzi;
Kuuku kwene akuno yalandanga pa milimo yakwe Yeova ilungame,
Pa milimo ilungame ya yantu yakwe aikala umu mizi ya mu Izlaeli.
Lyene antu yakwe Yeova yaile pa mpongolo.
12 Katuka, katuka we Debola!
Katuka, katuka uwimbe ulwimbo!
Katuka we Baraki! Usende azya yako, we mwana Abinoamu.
13 Lyene asiileko yaile uku yantu acindame;
Antu yakwe Yeova izile kuli nene mu kulwisya antu ya maka.
14 Antu ya mu mukonko yafumile umu mutundu wakwe Efulemu;
We Benjamini yakukukonka umu yantu yako.
Akalamba ya yasilika yapisile ukufuma kuli Makili,
Nupya aakasenda intuwa ya muntu aakaingizya asilika yapisile ukufuma kuli Zebuluni.
15 Ntunguluzi zya mu mutundu wakwe Isakali zyali pamwi na Debola,
Nupya wakwe vino Isakali wali na Debola, avino na Baraki wali nawe.
Yamunenyile ukupita ulwa pansi ukuya uku lwanga.
Aingi amu mutundu wakwe Lubeni yatamanyile ivya kucita.
16 U mulandu ci uno wikaliile pa nyama iyasenzile ivisendo viili,
Ala ukukutika kuno ya kacema yakulizya ivya kwamila iviteekwa?
Pano amu mutundu wakwe Lubeni yatamanyile ivya kucita.
17 Gilyadi wasyazile uku mbalama ya Luzi Lwa Yodani;
Nupya u mulandu ci uno Dani wikaliile umu mawato?
Asyeli wikazile sile umu mbali yakwe yemba,
Nupya wasyazile pa ncende yakwe apakafikila mawato.
18 Amu mutundu wakwe Zebuluni isile maumi yao mu uzanzo;
Amu mutundu wakwe Nafutali nayo kwene isile maumi yao mu uzanzo lino yaile pa mwamba.
19 Ya mwene izile nu kulwa;
Ya mwene ya mu Kenani yalwile inkondo
Ku Taanaki, mupiipi nu luzi lwa ku Megido.
Yatasenzile siuva ali wensi.
20 Kufuma ukwi yulu intanda zyalwile;
Kufuma muno zikazinguluka zyalwisizye Sisela.
21 Luzi lwa Kisyoni lwayasenzile,
Luzi lwa mpiti, luzi lwa Kisyoni.
Nalyatozile antu ya maka.
22 Nkamba zya mfwalasi zyalyatolanga umusili
Lino imfwalasi zyakwe zyasimulisyanga.
23 Malaika wakwe Yeova walanda wati, ‘Tipiini Melozi,’
‘Ee, tipiini aakaikalamo.
Pano yatiizile umu kwazwilizya Yeova,
Mu kwazwilizya Yeova pamwi na amaka.’
24 Uwapaalwa sana pa yanaci yonsi a Yaeli
Umuci wakwe Hebeli Umwina Kenite;
U wapaalwa sana pa yanaci aakaikala umu matenti.
25 Wamulenzile manzi; lelo wene wamupeezile umukaka.
Wamupeezile umukaka uutimbe umu mbale ifunkane ikalamba.
26 Watozile ulupopo lwa kwi tenti ukuomvya ikasa lyakwe,
Nupya watozile inondo ukuomvya ikasa lyakwe lya kwi lunji.
Wapofile ulupopo mu mutwe wakwe Sisela,
Ulwalepwile umutwe wakwe nu kuuvungola.
27 Waponiile pa ngazo zyakwe; waponyile nu kulaala papo kwene;
Pa ngazo zyakwe apano waponiile nu kulaala;
Pano waponiile apano wacimviwe.
28 Umwanaci wasungamile pi windo,
Nyina wakwe Sisela wasungamile pi windo,
‘U mulandu ci uno iceleta lyakwe lyalengelela ukwiza?
U mulandu ci uno mitinti ya maceleta yakwe yacelelwa?’
29 Aamano sana pa yanaci yakwe acindame yamwasukanga;
Ee, nawe kwene wayaasukilanga umwineco,
30 ‘Yafwile yakwankanya vino iyapokolola umu nkondo,
Mwanaci wenga, anaci yaili, kuli cila musilika,
Kupeela Sisela icakuzwala ca makaala cino iyapokolola,
Kwika icakuzwala cino yayemvya, cakuzwala ca makaala, vyakuzwala viili iviyemviwe
Mu nsingo zya yantu aapokolwile ivintu.’
31 Fwandi leka alwani yako yonsi yononwe, We Yeova,
Lelo leka yayo aakutemwa yaye wi lanzi ilikutunka umu ucindami wa liko.”
Nupya umu mpanga mwali umutende pa myaka 40.