Malango
32 Mwe ya mwi yulu uvwini vino nkulanda,
Nupya lekini amu nsi yuvwe mazwi yane.
2 Kusunda kwane kumapona wa mvula;
Mazwi yane yamatona wa lumi,
Wa mvula iikutoonyezya pi sote
Nupya wa mvula iingi iikutoonyezya pa mulemvwe.
3 Ndamanyisya antu pi zina lyakwe Yeova.
Manyisyini antu pa lulumbi lwakwe Leza witu!
4 Wene i ciliwe, milimo yakwe yaya imalilike,
Vyonsi vino akacita i vya mulinganya.
A Leza uwa cisinka aataya nu lufyengo;
Waya umulungame nupya uwa mulinganya.
5 Aliyo yacisile iviipe.
Asi yana yakwe, aliyo yaalenga.
Iinkulo ya ucenjezi nupya iipe!
6 Mwe yawelewele mwe nupya mwe yantu aatakwata mano,
Uzye avino mungacita kuli Yeova vii?
Uzye asi ali Tata winu uwamulenzile ukuti muyeko,
Uwamuumvile nu kumulenga ukuti muye uluko?
7 Iusyini manda ya ku cisila;
Nupya iusyini myaka ya nkulo ya mpiti.
Uzyini avyazi inu nayo yamamunena;
Uzyini aikolo nayo yamamulondolwela.
8 Lino Uwa Papelapela wapeezile amu nko ica upyanyi cao,
Lino wapaatukiinye ya mwana Adamu,
Wisile imipaka pa yantu
Ukulingana ni mpendwa ya yana yakwe Izlaeli.
9 Pano antu yakwe Yeova aantu yakwe;
Yakobo i ca upyanyi cakwe.
10 Wamuzanyile umu lwanga
Umu ncende umutaya icili consi, umu lwanga lwa kutiinya.
Wamucingilile nu kumusakamala,
Nupya wamusungilile kwati imboni ya linso lyakwe.
11 Wakwe viivi kwene vino cipungu akasunkanya icinsanzo cakwe,
Kupapuka pa twana twakwe,
Kuvungulula maapa yakwe pa kutusenda,
Na vino akatusendela pa maapa yakwe,
12 Avino na Yeova watungululanga Yakobo;
Kutaali leza muze uwali pamwi nawe.
13 Wamukwezizye pa ncende izitumpuke,
Pakuti alye ivyakulya vya mu calo.
Wamupeezile uci kufuma umu ciliwe
Na mafuta ukufuma umu ciliwe cikome,
14 Wamupeezile mafuta ya ng’ombe nu mukaka wa mfwele ni mbuzi,
Kumwi ni mfwele izisuma sana,
Nupya wamupeezile ya suuku ya ku Basyani na ya sawe,
Kumwi ni ngano izisuma sana;
Wamupeezile na waini uwapangilwa ni myangazi.
15 Lino Yesyuluni* winyile, watandike ukupantoka aya cipondoka.
Watuwina, watufina, nupya watuwikuta.
Nupya wasiile Leza, uwamupanzile,
Nu kusuula kapususya wakwe uwaya iciliwe.
16 Yamulenzile ukuti asoke sana pa mulandu wa kupepa ya leza yauze;
Nupya yamusosyanga pa mulandu wakuti yacitanga ivintu vya winyi.
17 Yapeelanga malambo uku viwa asi kuli Leza,
Kuli ya leza yano yataamanyile,
Ya leza apya yano yamanyile likwene,
Nupya ya leza yano ivikolwe vinu vitaamanyile.
18 Mwilile tata winu uwaya wa Ciliwe
Nupya mutiwisye Leza uwamupeezile umi.
19 Lino Yeova waweni vivyo, wayakanyile
Pano anakwe aonsi na anaci yamusosizye.
20 Walanzile ati, ‘Ndafisa icinso cane kuli aliyo;
Pakuti ince indole vino yalaya.
Pano iinkulo ya ucenjezi,
Aana aataya ni cisinka.
21 Iyandenga ukukalipa pa mulandu nu kupepa ya leza ya ufi;
Iyansosya pa mulandu ni vilubi vyao ivya sile sile.
Fwandi nani ndayalenga ukuya nu uzuwa ukuomvya antu asi uluko;
Ndayasosya ukuomvya uluko lwa uwelewele.
22 Ukali wane ukupya wa moto
Ulapya ukufika na pansi yi Lindi,
Uloca insi ni vimelwa ivyayapo
Nupya uloca imifula ya myamba.
23 Ndayavuzizya macuzi;
Ndayalasa ni nceto zyane zyonsi.
24 Yalatonta pa mulandu ni nzala
Ulwale wa mpepo ulayaponela nu ononesi uwipisye.
Ndayatumila ivilyanyi kuti viyazanze
Ni viselwa vya usungu ivikasela pa musili.
25 Aali ukunzi yalakomwa nu lupanga;
Aali umukasi yalaya ni ntete
Yonsi kwene umulumendo na nacisungu,
Akanya kumwi nu mukote.
26 Nalondanga ukulanda ukuti: “Ndayasalanganya;
Pakuti antu yatakaiusye,”
27 Lelo ntalanzile vivyo pa mulandu wa kutiina vino alwani yangalanda,
Pano yangavyuvwila muze.
Limwi yangalanda yati: “Sweswe itucimvya;
Asi Yeova uwatacita vyonsi vii.”
28 Pano yene u luko ulusipandwa mano,
Nupya yasiiluka.
29 Ndi cakuti i yakwata mano, nga yelenginyepo sana.
Nga yelenginye pali vino vingayacitikila.
30 Uzye umulwani wenga angazinganya Aina Izlaeli 1,000,
Nupya uzye alwani yaili yangazinganya Aina Izlaeli 10,000?
Suka ndi cakuti Leza wao uwaya wa Ciliwe wayakazya
Nupya Yeova wayapeela uku yalwani yao.
31 Pano ya leza yao yataaya wakwe Leza witu,
Na alwani itu yamanya cii.
32 Yaya wa miti ya myangazi iya ku Sodoma
Ni vyalo vya mu Gomola.
Imyangazi yao yakwata poizoni,
Mikungo ya myangazi yao yalula.
33 Waini wao waya wa usungu wa nzoka,
Nupya usungu uuwo u wakwe ngosye.
34 Ivicitwa vyao navisunga,
Nu kuvimatilila umu nkoma yane.
35 Nene nkalandula nu kufulula,
Pa nsita ilinge lino yaluvyanya,
Pano uwanda wa kufululwa kwao iupalama,
Nupya ivilayacitikila viliza zuwa.’
36 Pano Yeova alapingula antu yakwe,
Nupya aluvwila uluse aomvi yakwe
Alalola ukuti iyacepelwa amaka,
Kusi uwakuyazwa nupya iyatonta.
37 Lyene aluzya ukuti, ‘Nga ya leza yao yali kwi,
Kuli kuti ciliwe cao muno yafisamanga,
38 Yalikwi aalyanga mafuta ya malambo yao,
Amwanga waini wa pa upe wa vyakumwa vyao?
Lekini ize yamwazwe.
Lekini ize yamucingilile.
39 Lyene manyini ukuti nene indi Leza,
Nupya kutaya ya leza yauze ukucila pali nene.
Nkakoma nu kupeela umi.
Nkacisa nu kupozya,
Nupya kusi angapususya umuntu ali wensi ukufuma kuli nene.
40 Nakatusya ikasa lyane umwi yulu,
Nupya nkulapa: “Nemuno nayako manda pe,”
41 Ndi cakuti nanyola ulupanga lwane ulukuyengesa
Nu kuipekanya ukuleta upinguzi,
Ndaleta icilanduzi pa yalwani yane
Nu kufulula ampata.
42 Ndaleka inceto zyane ukumwa uwazi,
Nu lupanga lwane ukulya umunyefu,
Uwazi wakwe yano yaakomwa nu wa yazya,
Ni mitwe ya ntunguluzi zya yalwani.’
43 Sansamukini mwe nko pamwi na antu yakwe,
Pano alalandula pa wazi wa yaomvi yakwe,
Nupya alaleta icilanduzi pa yalwani yakwe
Nu kusangulula impanga ya yantu yakwe.”
44 Fwandi Mose wizile nu kulanda mazwi yonsi aaya umu lwimbo luu ala na antu yakuvwako, wali na Hosyia* mwana Nuni. 45 Lino Mose wamazile ukulanda mazwi yonsi yaa uku Ina Izlaeli yonsi, 46 wayanenyile ati: “Mwasunga mazwi yonsi aakucelula yano nkumunena ilelo, pakuti muce mwanena ana inu kukonka mazwi yonsi amu masunde yaa. 47 Pano amazwi yaa asi ya sile sile lelo yalalenga muye nu umi, nupya yalalenga mukikale manda aingi umu mpanga ino mukuya umukwikalamo nga mwalamba Uluzi Lwa Yodani.”
48 Yeova wanenyile Mose pa wanda kwene uu ati: 49 “Yanga uku mwamba wa mu Abalimu, kuli kuti Mwamba wa Nebo uwaya umu mpanga ya Moabu, incende iyalozyanya na Yeliko, pakuti ukalole impanga ya Kenani ino nkupeela Aina Izlaeli ukuti yaikalamo. 50 Lyene ulafwila pa mwamba kwene uno ukuyako, nu kuziikwa wa vikolwe vyako, wakwe vino Aloni umwinako wafwilile pa Mwamba wa Holi nu kuziikwa wa vikolwe vyakwe, 51 pano mwensi mweili mutaali ni cisinka kuli nene lino mwali na Ina Izlaeli pa manzi ya ku Meliba ku Kadesyi umu lwanga lwa Zini, pa mulandu wakuti mutancindike pa Ina Izlaeli. 52 Impanga ino nkupeela Aina Izlaeli umailolela sile patali, lelo utalingilamo.”