Milimo ya Atumwa
12 Pa nsita iiya, Umwene Helodi watandike ukucuzya yamwi aali umu cilongano. 2 Wakomile Yakobo umwina wakwe Yoani nu lupanga. 3 Lino waweni ukuti Ayuda yatemilwe pali vino wacisile, waile alema na Petulo kwene. (Cii cacitiike umu manda ya kuzevya Umukate Uwaula Icitutumusi.) 4 Wamulemile nu kumuyalila umu cifungo, wamupeezile uku maumba 4 aayasilika pakuti yalekanila pa kumulinda. Iumba lyonga lyakwatanga asilika 4, walondanga ukwizamufumizya* uku yantu pa cisila ca Ucilo. 5 Fwandi Petulo yamusungiile umu cifungo, lelo amu cilongano yamupepelangako sana kuli Leza.
6 Lino Helodi wali apiipi nu kufumya Petulo, usiku kwene uuwa Petulo waizi pakasi ka yasilika yaili ala iyamunyepa na maceni yaili, nupya pa mulyango paali alinzi aalindanga icifungo. 7 Nomba lolini! malaika wakwe Yeova walolike, nu luswepo lwalolike umu cifungo. Lyene malaika watensizye Petulo umu mbazo, amuzyula nu kumunena ati: “Katuka zuwa!” Nupya amaceni aali uku makasa yakwe yaponyile. 8 Lyene malaika wamunenyile ati: “Ipekanye nupya zwala indyatu zyako.” Nawe wacisile vivyo kwene. Nupya wamunenyile ati zwala icakuzwala cako ica kunzi nu kundondela.” 9 Nawe wafumile atandika ukumulondela, nomba atamanyile ukuti ivyacitikanga ukupitila muli malaika vyali ivya cumi. Welenganyanga ukuti walolanga icilolwa. 10 Lino yapisile pa yalinzi ya kutandikilako na yakwe ciili, yafisile pa mpongolo ya cela iya kwingilila umu musumba, nayo yaiyulikiile. Lino yafumile, yalondiile umuseo umwi, nupya lilyo kwene malaika wasiile Petulo. 11 Lino Petulo wilwike ivyacitikanga, walanzile ati: “Lyene namanya ukuti i cumi kwene Yeova watatuma malaika wakwe uwampokolola kuli Helodi na kuli vyonsi vino Ayuda yenekelanga ukuti vimacitika.”
12 Pa cisila ca kwiluka vivyo, waile uku ng’anda yakwe Maliya nyina wakwe Yoani wino yamanga ukuti Mako, kuuku kwene u kwali antu aingi akolongine ala yakupepa. 13 Lino wakonkonsizye pa mpongolo, umuomvi umukazyana uwi zina lyakuti Loda waile pakuti akalole uwakonkonsyanga. 14 Lyene lino uvwile izwi lyakwe Petulo, watemilwe sana icakuti afilwa nu kuyula impongolo, nomba wasimwilile umu ng’anda nu kuyalanda ukuti Petulo wataimilila pa mpongolo. 15 Nayo yamunenyile iyati: “Si watupena.” Nomba watwalilile ukulanda ukuti a Petulo kwene. Lyene yatandike ukulanda iyati: “A malaika wakwe.” 16 Nomba Petulo watwalilile ukukonkonsya. Lino yayuzile impongolo, yamuweni nupya yazungwike. 17 Lelo Petulo wayasinizye ukwi kasa pakuti yate ukupanga icongo nupya wayalondolwelile vino Yeova wamufumizye umu cifungo, wayanenyile ati: “Mukanene Yakobo na ina itu api lyasi lii.” Lyene wafumile nu kuya uku ncende yuze.
18 Lino waciile, kwali sana icimvulunganya pa yasilika pali vino vyacitiike kuli Petulo. 19 Helodi walonzile sana Petulo, lino wafizilwe ukumuzana, uzilizye sana asilika nupya walanzile ukuti yayasende yakayafulule; lyene wafumile uku Yudeya nu kuya uku Kesaliya aya aikalako pa nsita imwi.
20 Helodi wasokiile antu amu Tuli na Sidoni. Nayo yuvwanyile nu kuya kuli aliwe, pa cisila ca kutonsya Blasito uwangalilanga ing’anda ya mwene, yapaapasile pakuti yapange umutende nu mwene, pano impanga yao yafumyanga ivyakulya uku mpanga ya mwene. 21 Pa wanda uno yasoolwile, Helodi wazwite ivyakuzwala vya wene nu kwikala pa cilimba ca kupingwilapo alino atandika ukulanda uku yantu. 22 Lyene antu akolongine yatandike ukupunda iyati: “Yaa a mazwi yakwe leza, asi mazwi ya muntu!” 23 Papo kwene sile malaika wakwe Yeova wamulwalike, pa mulandu wakuti atacindike Leza, nupya ingonyo zyamuliile suka afwa.
24 Nomba izwi lyakwe Yeova lyatwalilile ukulunduluka nu kusalangana.
25 Lyene lino Banaba na Saulo yafisizye ivintu vino yayatumile uku Yelusalemu, yaswilile nu kuyasenda Yoani wino yamanga nu kuti Mako.