Ezaya
63 A weni wii aakufuma uku Edomu,
Ku Bozila ni vyakuzwala vya makaala asuma,
Wii azwite ivyakuzwala iviyembe,
Nupya aakupita na maka?
“A nene nemuno nkalanda ivilungame,
Nemuno nakwata sana maka ya kupususya.”
2 U mulandu ci uno uyeliile ni vyakuzwala iviyenzu?
U mulandu ci uno ivyakuzwala vyako vikulolekela wa vyakuzwala vya muntu aakufena waini?
3 “Nafenyile nenga waini mu ca kufenelamo.
Kusi nanti aumwi uwangavwile.
Natwalilile ukumulyatola ala insoka,
Nupya natwalilile ukumulyatola ala indi ni cipyu.
Vyakuzwala vyane vyakandine nu wazi wakwe,
Nupya vyonsi ivikowela.
4 Napanga ukuleta icilanduzi,
Nu mwaka wa kukulula antu yane iufika.
5 Nalolekisye, lelo kutaali uwa kungazwa;
Nazungwike pano kutaali uwa kuntungilila.
Fwandi ikasa lyane lyampuswisye,
Nu ukali wane wantungilile.
6 Nalyatozile antu ala insoka sana
Nalenzile ukuti yakoleke icipyu cane
Nupya napongolwelile uwazi wao pansi.”
7 Ndalanda pali vino Yeova akalanga ukutemwa kwa cumi,
Ndalumbanya Yeova,
Pali vyonsi vino Yeova watucitila,
Kuli kuti vintu ivingi visuma vino wacitila amu ng’anda yakwe Izlaeli,
Pa mulandu nu luse lwakwe nu kutemwa kwakwe ukukalamba.
8 Walanzile ati: “Cumi kwene antu yane aana atalaleka ukuya na ucisinka.”
Fwandi wizile aya Kapususya wao.
9 Lyonsi lino yaculanga nawe kwene waculanga.
Nupya inkombe yakwe yayapuswisye.
Wayakulwile pa mulandu nu kutemwa kwakwe ni cikuuku,
Cali kwati wayanyemwile nu kuyasakamala manda yonsi aku cisila.
10 Lelo yapondwike nu kulenga umupasi wakwe uwa muzilo ukuya nu ulanda.
Lyene wizile aya umulwani wao,
Nupya wayalwisizye.
11 Nupya iwisye manda ya mpiti,
Manda yakwe Mose umuomvi wakwe, nu kuzya iyati:
“Ali kwi uwayapisizye pali yemba pamwi na ya kacema ya mfwele zyakwe?
Ali kwi uwisile umupasi wakwe uwa muzilo muli aliwe?
12 Ali kwi uwatungilile ikasa lyakwe Mose ilya kwi lunji ukuomvya ikasa lyakwe ilya maka,
Uwalenzile ukuti manzi yapatukane pa nkoleelo yao
Pakuti alenge izina lyakwe lyaiusiwa manda pe?
13 Ali kwi uwalenzile ukuti yapite umu manzi aingi,
Ukwaula ica kuyapumvyanya,
Wa mfwalasi iili umu mpanga umutaaya icili consi?
14 Mupasi wakwe Yeova wayalenzile ukupuuza,
Wakwe vino inyama zikaya umu kupuuza umu nyika.”
Vikwene avino watungulwile antu yako,
Pakuti izina lyako ilisuma licindikwe.
15 Lolekesya ukufuma umwi yulu
Kufuma umupela muno ukaikala umwa muzilo nupya umwa lulumbi,
Uzye ukucincila kwako, maka yako,
Cikuuku nu luse vili kwi?
Swemo tusikuvilola.
16 Pano wewe Tata witu;
Nanti cakuti Abulahamu atanga atumanye
Na Izlaeli kwene atanga atumanye.
We Yeova, wewe Tata witu.
Wewe Kakulula witu kufuma mpiti.
17 U mulandu ci uno we Yeova ukalekela ukuti twafuma umu nzila zyako?
U mulandu ci uno ukalekela ukuti imyenzo itu iye ikome pakuti tutaakutiina?
Tuvwile uluse nupya kwene swe yaomvi yako,
Imitundu ino wasoolola.
18 Antu yako amuzilo ikazilemo pa nsita inono.
Alwani itu yalyatola incende yako iya muzilo.
19 Pa nsita itali twaya wa yantu yano utatala wateekapo,
Wa yantu aatatala yamilwapo ukwi zina lyako.