Ezaya
33 Kalanda kuli mwemuno mukazanza auzo, lelo mwemo mucili ukuzanzwa;
Mwemuno mukafutuka auzo lelo mutafutukwa!
Lino mulamala ukuzanza, mulazanzwa.
Lino mulamala ukufutuka, mulafutukwa.
2 We Yeova, tuvwile uluse.
Twataila muli wewe.
Uwatutungilila ni ikasa lyako cila katondo,
Uwatupususya lino tuli ni ntazi
3 Antu yakautuka nga yuvwa icongo icikalamba.
Nga wakatuka, inko zikasalangana.
4 Wakwe vino makanta aakaonona ivintu akakolongana, avino antu yalakolonganika vino yalamupokolola;
Antu yalasimwilila pa vintu vivyo kwati iumba lyakwe ya makanta.
5 Yeova alacindikwa,
Pano akaikala umupela sana.
Alalenga umu Zioni muye umulinganya nu ulungami.
6 Mu manda yaaya;
Ucisinka pamwi na mano, ukwiluka nu kutiina Yeova
Ukwaya ali Cuma cakwe, vilalenga kuye ukupusuka ukukalamba.
7 Lolini! Aonsi yaa asipe yakulila umu miseo;
Inkombe zyao izya mutende zikuloosya sana.
8 Mu miseo musi antu;
Kusi aakupita umu nzila.
9 Impanga ikuloosya nupya ikuuma.
Lebanoni ali ni nsonyi; wataola.
Syaloni wataya wa lwanga,
Nupya Basyani na Kalimeli iyalukusya mafwa.
10 Yeova walanda wati: “Lyene ndakatuka,
Ndaicindamika
Nupya ndaikuzya.
11 Mulakwata inda iyi sote ilyume nu kuvyala insaawa.
Imiyele inu iipe ilamoca wa moto.
12 Antu yalaya wi itwi ilikaya pano yakaocela mawe.
Yalociwa wa myunga ino iyatema.
13 Mwemuno muli ukutali, uvwini vino ndacita!
Na mwemuno muli umupiipi lolini maka yane!
14 Ayembu ya mu Zioni yali ni ntete;
Asangu yakuzakaza nu kuzya iyati:
‘A weni pali sweswe aangikala apali umoto?
A weni pali sweswe aangikala pano ivimbilimbili visizima?’
15 U muntu aakacita ivilungame lyonsi,
Aakalanda ivya cumi,
Uwapata ufi nu ulonsi wa ucenjezi,
Aakakana mafisakanwa,
Aasilonda ukuvwa mapange ya kuzwisya uwazi,
Nupya aasilonda ukulola iviipe
16 —Alikala umu myamba itali;
Incende yakwe iya kucingilililwamo ilaya umu vimawe,
Alaapokelela ivyakulya,
Nupya manzi yakwe yatalaasila.”
17 Amanso inu yalalola umwene mu ucindami wakwe;
Yalamulola uku mpanga ya kutali.
18 Uliusya icintu cii ica kutiinya nu kuuzya uti:
“Ali kwi kalemba?
Ali kwi uwasonkelanga imisonko?
Ali kwi uwapendanga impungu?”
19 Utalalola nupya antu awelewele,
Antu aakalanda ululimi ulutale ukuvwa,
Aasilanda ivyuvwike.
20 Lolini Zioni, umusumba uno tukakwatilamo imitebeto!
Amanso inu yalalola Yelusalemu wa ncende iya kwikalamo icingililwe,
Wi tenti ilitanga liseziwe.
Impopo zya kwi tenti lyakwe zitalasomolwa,
Nupya imyando yakwe italaputulwa.
21 Pa ncende iiya, apano Yeova Leza Umukalamba
Alatucingilila wa nguzi na wa mifolo ikalamba,
Mawato ya mu nkondo yatalizako
Nupya mawato akalamba yatalapitako.
22 Pano Yeova ali Kapingula witu,
Yeova ali Kapeela witu wa Masunde,
Yeova ali Mwene witu,
Aliwe alatupususya.
23 Imyando inu ilateluka;
Italalemelela icimuti ca ku wato nanti ukulenga itanga ukukonzoloka.
Pa nsita iiya ivintu vingi sana ivilapokololwa vilankanyiziwa.
Na alemale kwene yalasendapo ivingi.
24 Kusi umuntu aalalanda ati: “Indwala.”
Antu aalikala umu mpanga yalelelwa imembu zyao.