1 Samweli

20 Lyene Devedi utwike ukufuma uku Nayoti umu Lama. Waile kuli Yonatani nu kumuzya ati: “I cani cino nacita? U mulandu ci uno nacita nupya i vyani vino naluvyanya kuli ya tata yako vino yakulonda ukunkoma?” 2 Yonatani wanenyile Devedi ati: “Cico citalacitika! Kusi alakukoma. Ya tata yatalacita icintu icili consi ukwaula ukunena, ciye icikalamba nanti cinono. U mulandu ci uno ya tata yangamfisila icintu cii, cico citalacitika.” 3 Devedi watwalilile ukulapa ati: “Ya tata yako yamanya ukuti wantemwa nupya yangalanda yati, ‘Mutaleka Yonatani amanye pali cii, pano nga caya vivyo alasoka.’ Lelo nkulapa pali Yeova Leza wa umi na pali wewe kwene ukuti yasya yace yankome!”

4 Lyene Yonatani wanenyile Devedi ati: “Ndakucitila vyonsi vino walanda.” 5 Devedi wanenyile Yonatani ati: “Mutondo ulaya uwanda wa kuzevya umwezi upya, nupya ndinzile ukuliila pamwi nu mwene; uce uleke mpite nupya ndaya nkafisame umu mpanga kufikila manguzi pa wanda wakwe citatu. 6 Ndi cakuti ya tata yako yaca yuzya pali nene, uce uyanene uti, ‘Devedi wandenzile ukuti imuzumilizye asimwilile uku musumba wa kumwao uku Betelemu, pano kuuku kwene akuno ya lupwa yakwe yonsi yakupeela ilambo lya cila mwaka.’ 7 Ndi cakuti ya tata yako yaca yalanda ukuti, ‘Cili sile ningo’ ale ne muomvi wako indi nu mutende. Lelo ndi cakuti yaca yasoka, uce umanye ukuti ya tata yako yakulondesya ukunkoma. 8 Si langa ukutemwa kwa cumi kuli nene ne muomvi wako, pano wewe walenga ukuti inje mu upangano wakwe Yeova pamwi naawe. Lelo ndi cakuti nkweti umulandu, wewe kwene unkome. U mulandu ci uno ungampeelela kuli ya tata yako?”

9 Yonatani nawe waswike ati: “Citanga cicitike ukulanda vivyo pali wewe! Uzye nga namanya ukuti ya tata yakulonda ukukukoma ntanga nkunene?” 10 Lyene Devedi uzizye Yonatani ati: “A weni alanena ndi cakuti ya tata yako iyansokela?” 11 Yonatani wanenyile Devedi ati: “Tiye twapita umu mpanga.” Fwandi yonsi yoili yaile umu mpanga. 12 Nupya Yonatani wanenyile Devedi ati: “Si Yeova Leza wa Ina Izlaeli aye kambone, mutondo nanti wandaulya pa nsita ndi ikwene ndalanda na ya tata. Ndi cakuti yalalanda ivisuma pali wewe Devedi, ndakunena. 13 Lelo ndi cakuti ya tata yakulonda ukukukoma, si Yeova amfulule ne Yonatani nu kucizyapo ndi cakuti ntakunenyile vivyo nu kukuleka ukuti upite umu mutende. Si Yeova aye naawe wakwe vino wali na ya tata. 14 Uzye utalandanga ukutemwa kwa cumi kwakwe Yeova lino ncili nu umi na lino ndafwa? 15 Utaca ute ukulanga ukutemwa kwa cumi ku ya mu ng’anda yane, nanti sile alino Yeova alonona alwani yakwe Devedi yonsi aaya umu nsi.” 16 Fwandi Yonatani wapangiine upangano na amu ng’anda yakwe Devedi ati: “Yeova alafulula alwani yakwe Devedi.” 17 Lyene Yonatani walesile Devedi ukulapa nupya kwene pa mulandu na vino wamutemilwe, pano wamutemilwe wakwe vino waitemilwe.

18 Lyene Yonatani wanenyile Devedi ati: “Mutondo ulaya uwanda wa kuzevya umwezi upya, nupya ya tata yalakulonda pano pa cilimba cako patalaya umuntu. 19 Nga wandaulya wene yalakulonda sana, uce uwize ukafisame kuno wafisime uwanda uuwa umupiipi ni ciliwe cii. 20 Lyene ndalasa inceto uku ntunga yonga kwati limwi pali vino nkulasa. 21 Lino ndatuma umuomvi ndamunena inti, ‘Yanga ukalonde inceto.’ Ndi cakuti naca nanena umuomvi nati, ‘Inceto zili uku lusansa lwako, tola,’ lyene ungaca uwele, pano nkulapa pali Yeova Leza wa umi nkuti, cico cilalangilila ukuti vintu vyonsi vili sile ningo kuli wewe nupya kusi intazi ili yonsi. 22 Lelo ndi naca nanena umuomvi nati, ‘Inceto zili uku nkoleelo yako,’ lyene uce upite pano ale avino Yeova akulonda. 23 Si Yeova aye naswe manda pe pa upangano uno itupangana.”

24 Fwandi Devedi wafisime umu mpanga. Lino insita ya kuzevya umwezi upya yafisile, umwene wikazile pakuti atandike ukulya. 25 Umwene wikazile pa cilimba cino wikalangapo lyonsi mupiipi ni ciumba. Yalozyanyizye na Yonatani nupya Abineli wikazile umupiipi na Saulo, lelo pa cilimba cakwe Devedi pataali umuntu. 26 Saulo atalanzile icili consi pa wanda uuwa, pano welenganyanga ukuti: ‘Kufwile kuli icaticilenga ukuti ataya umusanguluke. Afwile watakowela.’ 27 Nupya pa wanda wakwe ciili kufuma pano ukuzevya umwezi upya kwatandikile, nupya kwene pa cilimba cakwe Devedi pataali umuntu. Lyene Saulo uzizye Yonatani umwanakwe ati: “U mulandu ci uno mwana Yese atizile mutondo ni lelo umu kulya?” 28 Yonatani waswike Saulo ati: “Devedi waposile ulusa kuli nene ukuti aye uku Betelemu. 29 Watiile, ‘Napaapata, nzumilizye mpite, pano ulupwa lwane lukupeela ilambo umu musumba. Nupya umwinane watangama, fwandi ndi cakuti unganzumilizya napaapata leka napita nkalole aina yane.’ Ali mulandu uno atiziile uku kuliila pamwi nu mwene.” 30 Lyene Saulo wasokiile sana Yonatani nu kumunena ati: “We mwana cipondoka we, uzye ukwelenganya ukuti ntamanya ukuti wasoolola ukuya uku lusansa lwakwe mwana Yese, na cico cilaleta umuzewanya pali wewe na nyoko. 31 Uwene wako utalayako ndi cakuti sile mwana Yese acili nu umi. Fwandi tuma yamwi aakuyamusenda likwene, pano alinzile ukufwa.”

32 Lelo Yonatani wanenyile isi Saulo ati: “U mulandu ci uno amakomelwa? I cani cino wacita?” 33 Lyene Saulo watozile isumo nu kulivwintila kuli Yonatani pakuti amukome, fwandi Yonatani wilwike ukuti Saulo walondanga ukukoma Devedi. 34 Lilyo kwene sile Yonatani wakatwike ala watasoka sana, nupya ataliile ivyakulya pa wanda wakwe ciili kufuma pano ukuzevya umwezi upya kwatandikile, pano wasosile sana pali vino vyali nu kucitikila Devedi na pali vino isi wamuzewanyizye.

35 Katondo Yonatani waile umu mpanga wakwe vino yuvwanyile na Devedi nupya wali nu muomvi. 36 Nupya wanenyile umuomvi wakwe ati: “Simula ukatole inceto zino nimalasa.” Umuomvi wasimwile, nupya Yonatani walasile uluceto iluya ilumupitilila. 37 Lino umuomvi wafisile pano Yonatani walasile uluceto, Yonatani wamwamile nu kumunena ati: “Uzye uluceto lumwi lusi uku nkoleelo yako?” 38 Yonatani wanenyile umuomvi wakwe ati: “Pitisya! Simula katole likwene!” Nupya umuomvi wakwe Yonatani waile atola inceto nu kuwela ukwali umusambazi wakwe. 39 Umuomvi ataamanyile upiliulo wakwe vino vyacitike; Yonatani sile na Devedi aamanyile. 40 Lyene Yonatani wapeezile umuomvi wakwe ivyanzo nu kumunena ati: “Pitanga vitwale uku musumba.”

41 Lino umuomvi wapisile, Devedi wafumile kuno wafisime ku ncende iyayelile lwa ku kaeya. Lyene wafukime pansi nu kukontama miku itatu, yatonsoline nupya yonsi yoili yalizile, nomba Devedi wacizilemo. 42 Yonatani wanenyile Devedi ati: “Pitanga umu mutende vino swensi itulapa umwi izina lyakwe Yeova ukuti, ‘Si Yeova aye kambone pali wewe nani na pa yana yako na ana yane manda pe.’”

Lyene Devedi wapisile na Yonatani waswilile umu musumba.