1 Samweli
21 Lyene Devedi waile uku Nobu, kuli Aimeleki simapepo. Aimeleki uvwile intete lino waweni Devedi nupya wamuzizye ati: “U mulandu ci uno wizila wenga?” 2 Devedi waswike Aimeleki simapepo ati: “Umwene watanena ukuomba umulimo umwi, nomba watalanda ati, ‘Utaleka ali wensi amanye pa mulimo uno inkupeela na vino inkunena ukucita.’ Inalanzyanya na aonsi yane kuno tumakomenkanila. 3 Fwandi nga watukwata imikate 5 mpeele nanti ivili vyonsi vino ukweti.” 4 Lelo simapepo waswike Devedi ati: “Nkweti sile u mukate wa muzilo, mungalya sile umukate uu ndi cakuti aonsi yako yatapanzile icupo mu manda anono apitapo.” 5 Devedi waswike simapepo ati: “Anaci yasyala wakwe vino cikaya nga twaya uku ulwi. Ndi cakuti aonsi yakaya amuzilo nga twaya uku ulwi, fwandi paa pene yalinzile nu kucizyapo ukuya amuzilo!” 6 Fwandi simapepo wamupeezile umukate wa muzilo, pano pataali umukate uze, suka sile umukate uwapeezilwe kuli Leza uno yafumizye pa nkoleelo yakwe Yeova pakuti ikepo uze pa wanda kwene uuwa.
7 Muomvi wenga wakwe Saulo wali kuuku kwene pa wanda uuwa, yamunenyile ukwikala pa nkoleelo yakwe Yeova. Izina lyakwe wali a Doegi Umwina Edomu umukalamba wakwe ya kacema yakwe Saulo.
8 Lyene Devedi uzizye Aimeleki ati: “Uzye watukwata isumo nanti ulupanga? Ntasenzile ulupanga nanti ivyanzo pa mulandu wakuti umulimo uno umwene iwantuma ukulondekwa ukuomba zuwa zuwa.” 9 Simapepo nawe waswike ati: “Lupanga lwakwe Golyati Umwina Filisti, wino wakomile umu mukonko wa Ela luli kuno, lwapombwa umu nsalu kwitundu lyakwe efodi. Ndi cakuti ukululonda, ungasenda pano ali luno nkweti sile.” Devedi watiile: “Kusi ulupanga ulungacila pali lulo, mpeele lulo kwene.”
10 Uwanda kwene uuwa Devedi wakatwike nu kutwalilila ukuutuka ukufuma kuli Saulo, nupya waile afika uku mwene Akisyi uwa ku Gati. 11 Aomvi yakwe Akisyi yamunenyile iyati: “Uzye wii asi a Devedi umwene uwa mpanga yakwe? Uzye asi wino yacinilanga nu kwimbila iyati,
‘Saulo watakoma alwani masauzandi,
Devedi nawe watakoma alwani masauzandi 10 sauzandi’?”
12 Lino Devedi uvwile mazwi yayo, watandike ukutiina sana umwene Akisyi uwa ku Gati. 13 Fwandi waisangwile atandika ukucita ivintu wakwe cipena ala yakulola nako. Walembolanga pa visaasa vya pa mpongolo nu kutonyezya into pa vilezu. 14 Lyene Akisyi wanenyile aomvi yakwe ati: “Imulola ukuti umuntu wii a cipena! U mulandu ci uno mwamuletela kuno? 15 Nakwata ya cipena aingi, fwandi nsikulondekwa cipena na muze. Muntu wii atalinzile nu kwingila umu ng’anda yane.”