Isamu

65 Kulumbanya kukuloleela wewe we Leza umu Zioni;

Tulafikilizya imilapo itu kuli wewe.

 3 Imembu izincimvya,

Lelo ukavimba pa kuluvyanya kwitu.

 4 Uwa nsansa u muntu wino ukasoolola nu kupalamika

Pakuti aikala umu misolo yako.

Tulaipakizya usuma wa ng’anda yako,

Kuli kuti itempele lyako ilya muzilo.

 5 Ulatwasuka ukuomvya ivintu vya kuzungusya ivilungame vino ukacita,

We Leza kapususya witu;

Antu ya mu nsi yonsi yakutaila

Kumwi na aakaikala uku mbalama yakwe yemba.

 6 Walenzile ukuti imyamba iyeko pa mulandu na maka yako;

Wakwatisya amaka.

 7 Ukamyalalika yayemba aatiyasoka,

Kumwi na maimbi aakuipumola muli yemba alino ni cimvulunganya ca nko.

 8 Antu aaikala umu ncende zya kutali yaluvwa intete pa mulandu ni vimanyililo vyako;

Ulalenga antu aakaikala kuno ilanzi likatunkila ukufika na kuli yano yakaikala kuno likawila ukupunda ni nsansa.

 9 Ukasakamala insi,

Ukalenga ukuti iye ivunde sana.

Mu kaluzi akafuma kuli Leza mwaya manzi aingi;

Ukalenga ukuti insi yamezezya antu ivyakulya,

Pano vikwene avino wapekinye insi.

10 Ukakontelela ivyalo ivyayamo nu kulinganya umusili;

Ukautonsya ukuomvya imvula nu kupaala ivimelwa ivyayamo.

11 Ukalenga ikuya mapaalo sana cila mwaka;

Konsi kuno ukuya kukaya sana ivintu ivisuma.

12 Mulemvwe wa mulwanga ukatwalilila ukuya uvunde,

Nupya imyamba ikasansamuka.

13 Mu mulemvwe mukaya sana imfwele ni mbuzi,

Nupya umu mikonko mukaya sana ivyakulya.