Ezekeli
1 Mu mwaka uwalenga 30, mu mwezi uwalenga 4 pa wanda uwalenga 5, lino nali pamwi na antu aasenzilwe umu uzya mupiipi nu luzi lwa Kebali, iyulu lyayulike nupya natandike ukulola ivilolwa ivyafumile kuli Leza. 2 Pa wanda uwalenga 5 mu mwezi kwene uwo, kuli kuti umu mwaka uwalenga 5 ukufuma pano Umwene Yeoyakini wasendiilwe umu uzya 3 Yeova walanzile na Ezekeli* mwana Buzi simapepo umupiipi nu luzi lwa Kebali mu mpanga ya Ina Kalideya. Pa ncende kwene iiya apano ikasa lyakwe Yeova lizile pali aliwe.
4 Lyene naweni cimuza icikalamba cikufuma uku katutu, nupya kwali kumbi likalamba nu moto uwamyantulanga ivyazingulwikwe nu luswepo ulukalamba nupya pakasi ka moto paali icalolekanga wa cela iciyengese icapangilwa na goldi na siuva. 5 Mu moto mwali vimwi ivyalolekanga wa viumbwa vya umi 4, nupya vyonsi vyalolekanga wa muntu. 6 Cila ciumbwa cakweti ivinso 4 na maapa 4. 7 Vyakweti makulu aololoke ni ngazo kwati izya kana ka ng’ombe, nupya zyayengesanga wakwe koopa umwengululwe. 8 Vyakweti makasa ya muntu mwisika lya maapa mu mbali zyonsi 4, nupya vyonsi 4 vyakweti vinso na maapa. 9 Maapa yakumyanyanga. Vitakonekanga; vyonsi vyayanga sile inkoleelo.
10 Vinso vya viumbwa vivyo vyalolekanga vii: Vyonsi vyakweti icinso ca muntu ni cinso cakwe cisama ukwi lunji, alino ni cinso cakwe cipambasi kuli cimani, nupya vyonsi vyakweti icinso cakwe lyang’anda. 11 Vii avino ivinso vyalolekanga. Maapa yaviko yakonzolokelanga umupela. Vyonsi vyakweti maapa yaili akumyanyanga na yaili avimbanga umwili.
12 Vyonsi vyayanga sile inkoleelo, vyayanga konsi kuno umupasi wavitungulula. Vitakonekanga. 13 Nupya iviumbwa vyalolekanga wa malasya aakwaka, nupya cimwi icalolekanga wa luswepo lwa moto ulukalamba capitananga pakasi ka viumbwa, nu luswepo lwamyantulanga ukufuma umu moto. 14 Nupya lino iviumbwa vyapitanga nu kuwela, mipitile yaviko yali wa kumyantula kwa nkuwa.
15 Lino natambanga iviumbwa, naweni iteelo umu nsi mupiipi na cila ciumbwa icakweti ivinso 4. 16 Mateelo yalolekanga nu kuyengesa wakwe kilisoliti nupya yonsi kwene 4 yalolekanga icili cimwi. Yalolekanga kwati iteelo lyonga ilicingaana umu lyuze. 17 Lino yakupita, yayanga uku ntunga 4 ukwaula ukukoneka. 18 Malimu yaali akulu sana icakuti yazungusyanga, nupya yonsi 4 yakweti manso aingi sana ukuzinguluka. 19 Lyonsi lino ivya umi vikupita, mateelo yapitanga pamwi navyo, nupya lino ivya umi vyafuma pano nsi nu kuya umupela, mateelo nayo kwene yayanga umupela. 20 Vyayanga konsi kuno umupasi wavitungulula, konsi kuno umupasi walungama. Mateelo yakatukilanga pamwi ni viumbwa, pano umupasi uwatungululanga iviumbwa wali nu mu mateelo kwene. 21 Ngi vya umi vyapita, mateelo yapitilanga pamwi navyo, nupya nga vimilila mateelo nayo kwene imililanga; ndi cakuti ivya umi vyafuma pano nsi nu kuya umupela, mateelo nayo kwene yayanga umupela, pano umupasi uwatungululanga ivya umi wali nu mu mateelo kwene.
22 Papela ya mitwe ya viumbwa vya umi paali cimwi icalolekanga wakwe pulatifomu, icayengesanga wi we lya mutengo. 23 Mwisika lyakwe pulatifomu maapa ya viumbwa yakonzolwilwe ukuya umupela nupya yakumyanyizye. Cila ciumbwa cakweti maapa yaili akuvimba ulusansa longa ulwa mwili na yaili akuvimba uku lusansa luze. 24 Lino nuvwile iciunda ca maapa ya viumbwa, cali wa ciunda ca manzi aali nu mukuku, wa ciunda ca wa Maka Yonsi. Lino vikupita, ciunda cuvwikanga wa congo ca yasilika. Ndi cakuti vimilila, vyaponyanga maapa.
25 Lyene kuvwisile izwi papela yakwe pulatifomu iyali pa mitwe ya viumbwa. (Ndi cakuti vimilila, vyaponyanga maapa.) 26 Papela yakwe pulatifomu paali cimwi icalolekanga wi we lyakwe safilo nupya cakoline ni cilimba ca wene. Uwikazilepo walolekanga kwati umuntu. 27 Kufuma umu musana wakwe ukuya umupela naweni cimwi icayengesanga wa cela icapangilwa na goldi na siuva, calolekanga wa moto; nupya ukufuma umu musana ukuwela pansi naweni cimwi icakoline nu moto. Nupya uluswepo lwamuzingulwike 28 wa luswepo lwa mulalamfuti umu makumbi lino kuli imvula. Vikwene ali vino uluswepo ulwamuzingulwike lwalolekanga. Cino naweni cali wa ucindami wakwe Yeova. Lino naweni vivyo, nafupime nu kutandika ukuvwa kuli vino umwi walandanga.