Isamu
94 We Leza wa cilanduzi, Yeova,
We Leza wa cilanduzi, langa ululumbi lwako!
2 Katuka we Kapingula wa nsi.
Citila antu acilumba kulingana ni vicitwa vyao.
3 We Yeova, uzye aipe yalatwalilila ukufika lilaci,
Yalatwalilila ukusansamuka ukufika lilaci?
4 Mu mivwangile yao yakalanga ukuti awelewele nupya acilumba;
Aipe yonsi yakayuvwa.
5 Yakatitikizya antu yako, we Yeova,
Nu kucuzya ica upyanyi cako.
6 Yakakoma mukamfwilwa nu muntu uwafuma uku mpanga yuze,
Nupya yakakoma ana ya nsiwa.
7 Yakalanda yakuti: “Jah asilola;
Leza wakwe Yakobo asimanya vintu vii.”
8 Ilukini cintu ci mweyano mutakwata mano;
Mwe yawelewele mwe, uzye alilaci lino muliluka?
9 Uzye uwapanzile ikutwi, angafilwa ukuvwa?
Uzye uwapanzile ilinso, angafilwa ukulola?
10 Uzye aakalungika inko angafilwa ukukalipila?
Aliwe akasambilizya antu!
11 Yeova wamanya melenganyo ya yantu,
Wamanya ukuti yaya kwati umupu.
12 Uwa nsansa u muntu wino ukalungika, we Jah,
Wino ukasambilizya masunde yako,
13 Pakuti aye nu mutende mu nsita ya ntazi,
Ukufikila umwipe waponela umu ciwina.
14 Pano Yeova atalalekelezya antu yakwe,
Nanti ukusya ica upyanyi cakwe.
15 Pano upinguzi ulaya ulungame nupya,
Na alungami yonsi yalaulondela.
16 Uzye a weni aalandwilako kuli ya kacita ya viipe?
Uzye a weni aalamvwangilako kuli ya kacita ya viipe?
17 Ndi cakuti Yeova ataali akazwa wane,
Nga nafwa mpiti.
18 Lino natiile: “Ulwazo lwane lumasyetuka,”
Ukutemwa kwako ukwa cumi we Yeova kwantungiliile.
19 Lino masakamika yamvuliile,
Wanteekizye nu kunkomelezya.
20 Uzye ungapanga ucuza na ya kapingula ya ucenjezi
Lino yakaomvya masunde uku kucuzya antu?
21 Yakazanza umulungami
Nu kupingula uwa kaele ukufwa.
22 Lelo Yeova alaya a kacingilila wane,
Leza wane ali ciliwe cane ca kufisamamo.
23 Alalenga ivicitwa vyao iviipe viyawelelele.
Alayonona pa mulandu ni vicitwa vyao iviipe.
Yeova Leza witu alayakoma.